‏ Leviticus 19

Biŋsu dabuŋ to gêdêŋŋa

1Ma Apômtau kêsôm gêdêŋ Mose gebe 2“Ôsôm êndêŋ gôlôac Israel ŋalau samob gebe amac atu lau dabuŋ gebe Apômtau, amacnêm Anôtô, aê tauc dabuŋ. 3Amac samob êtôm ŋacanôgeŋ atoc tenemi to tamemi sa ma taêm ênam om gebe dabuŋ ma amansaŋ ŋapep, gebe Apômtau, nêm Anôtô aê. 4Amac akac taôm ôkwi andêŋ anôtô gwam ana atom. Ma apac ki êwê ma amansaŋ anôtô jaba teŋ atom, gebe Apômtau, nêm Anôtô aê.

5“Embe akêŋ da daŋge êndêŋ Apômtau, go akêŋ ŋalêŋ gebe ênac Apômtau mataanô ŋajamgeŋ. 6Êndêŋ bêc, taŋ akêŋ da tau naŋ, to bêc, taŋ êndaŋguc naŋ, aniŋ da tau e êmbacnê. Gêŋ ŋagêdô- gêdô, taŋ ênêc e êndêŋ bêc êtu têlêac naŋ, ja êniŋ su. 7Ma embe aniŋ êndêŋ bêc êtu têlêac, naŋ oc êtu gêŋ geŋeŋ ma oc ênac aê matocanô ŋajam atom. 8Ma teŋ embe êniŋ, oc êtu tôp êndêŋ eŋ gebe eŋ gêgôm Apômtaunê gêŋ dabuŋ teŋ kêtu sec, ma senseŋ eŋ su aŋga nê lau nêŋ.

9“Ma êndêŋ taŋ amacnêm gamêŋ ŋakôm ŋanô êsa naŋ, go anac sa e êndêŋ kôm ŋamadiŋ samucgeŋ atom, ma ajoŋ gêŋ ŋasaliŋ-saliŋ sa êtu ŋamu atom. 10Aŋga nêm kôm wainŋa amboac tonaŋgeŋ ajoŋ gêŋ ŋasaliŋsaliŋ ma akôc ŋanô, taŋ kêsêlô kêsêp nom naŋ, sa atom. Awi siŋ êndêŋ lau ŋalêlôm sawa to lau jaba gebe Apômtau, amacnêm Anôtô aê.

11“Anam geŋgeŋ atom, ma anam launêŋ bôlêŋ auc atom to ansau auc lau atom. 12Atôc lemem ansau anam aê laŋôc ma aŋgôm amacnêm Anôtônê ŋaê êtu sec ŋa lêŋ amboac tonaŋ atom gebe Apômtau aê.

13“Akôniŋ nêm lau wacbaŋ amacŋa ma ajaŋgo nêŋ gêŋ su atom. Aŋgamiŋ nêm sakiŋwaga nê ŋaôli kômŋa e êndêŋ ŋaeleŋ atom. 14Apuc boa ŋac taŋasuŋbic to akêŋ gêŋ teŋ êmbôc ŋac matapec nê intêna auc atom. Atêc nêm Anôtô, gebe Apômtau aê.

15“Amêtôc biŋ eso atom. Ma ambu lau ŋalêlôm sawa ma atoc lau tolêlôm sa êlêlêc atom, mago amêtôc nêm lau wacbaŋ amac ŋa biŋgêdêŋgeŋ. 16Ôŋga biŋ êpi nêm lau atom. Ma embe ôkô mêtôcwaga laŋônêm naŋ ôkic nêm ŋac wacbaŋ aôm nê biŋ ôwiŋ atom gebe Apômtau aê.

17“Têmtac endec lasitêwa atom, awa biŋ sa êndêŋ ŋac wacbaŋ amac gebe awê kaiŋ sec êtu eŋŋa atom. 18Ôkêŋ ŋagêjô ma ôê têmtac ŋandaŋ êndêŋ taômnêm lau teŋ tôŋ atom, mago têmtac êwiŋ lau wacbaŋ aôm amboac têmtac gêwiŋ taôm, gebe Apômtau aê.

19“Ajop aêŋoc ŋagôliŋ tonec gebe akêŋ bôc kaiŋ luagêc sêŋgêli tauŋ atom. Ma apalip ŋawê kaiŋ luagêc êsêp kôm tageŋ atom, ma asô ŋakwê, taŋ sêwa ŋa gam kaiŋ luagêc kêsêp taulêlôm naŋ atom.

20“Embe ŋac teŋ ênêc êwiŋ awê teŋ, taŋ sê eŋ gêdêŋ ŋac teŋ gebe ênam ôli êtu ênê gêŋômao, mago gêjam ôli su me sêwi eŋ siŋ su atom tageŋ naŋ, go akêŋ ŋagêjô, mago êsêagêc sêmac êndu lulugeŋ atom, gebe sêwi awê siŋ kêtu taunê ŋatauo su atom tageŋ. 21Mago ŋac tau êkôc domba kapoac teŋ êna becobo ŋakatam gebe êkêŋ êtu datôp êndêŋ Apômtau êtu eŋ tauŋa. 22Ma dabuŋwaga ê wama ŋac tau ŋa domba kapoac datôpŋa tonaŋ êkô Apômtau laŋônêm êtu sec, taŋ eŋ gêgôm naŋŋa. Ma Anôtô oc êsuc sec, taŋ ŋac tau gêgôm naŋ, ôkwi.

23“Êndêŋ taŋ asô gamêŋ tau ma asê ka ŋanô aniŋŋa tokaiŋ-tokaiŋ naŋ, go alic ŋanô tau amboac gêŋ selec êtôm aniŋŋa atom e jala têlêac êmbacnê acgom. 24Ma êndêŋ jala êtu aclê ŋanô samob êtu gêŋ dabuŋ ma êtu da lambiŋŋa êndêŋ Apômtau. 25Mago êndêŋ jala êtu lemeŋteŋ aniŋ kaŋanô tau gebe ênam ŋanô taêsam êndêŋ jala samob, taŋ êndaŋguc naŋ. Apômtau, amacnêm Anôtô aê.

26“Aniŋ gêŋ todec teŋ atomanô. Aoc biŋ lasê to aŋgôm mectomaŋ atom. 27Akapiŋ nêm môkêmlauŋ su aŋga môkêmapac atom ma êm ŋasaô êtu dambê atom. 28Asa nêm ôlim êtu ŋacmatêŋa me anac bô teŋ êpi taôm ôlim atom gebe Apômtau aê.

29“Ôkêŋ latômo êtu awê mockaiŋo gebe mockaiŋ ênam gamêŋ auc e sec ênam sêga aŋga gamêŋ tau atom. 30Taêm ênam ŋoc om gebe dabuŋ ma ômansaŋ ŋapep ma otoc ŋoc andu dabuŋ sa gebe Apômtau aê.

31“Naandêŋ lau, taŋ sêkalem lau katuŋ naŋ, to lau mectomaŋŋa ana atom. Embe aŋgôm oc aŋgôm amac selec ŋapaliŋ gebe Apômtau, amacnêm Anôtô aê.

32“Ôndi sa êtu ŋac tomôdêŋa to otoc ŋamalacanô sa ma ôtêc aômnêm Anôtô gebe Apômtau aê.

33“Embe ŋac jaba teŋ êmoa êwiŋ aôm aŋga nêm gamêŋ, go ôtu kasec eŋ atom. 34Ŋac jaba êmoa êwiŋ aôm êtôm nêm lasitêwa teŋ ma aôm têmtac êwiŋ eŋ amboac têmtac gêwiŋ taôm, gebe amac taôm atu lau jaba gêmuŋŋa aŋga gamêŋ Aiguptu, gebe Apômtau, amacnêm Anôtô aê.

35“Amêtôc lau eso atom. Anam dôŋ gêŋ baliŋ to ŋawapac ma taêsamŋa ôkwi gebe ansau lau atom. 36Nêm dôŋ gêdêŋ ênêc êtu gêŋ ŋawapacŋa ma gadob to laclu anam dôŋ gêŋ êsêpŋa naŋ, solop amboac tonaŋgeŋ gebe Apômtau, amacnêm Anôtô, taŋ gawê amac aŋga gamêŋ Aiguptu amêŋ naŋ, aê. Ma ajop ŋoc ŋagôliŋ to ŋoc jatu samob ma aŋgôm ŋanô êsa gebe Apômtau aê.”

37

20:1 — 22:33 Môkêlatu tonaŋ ŋabiŋsu gebe ênam lau to dabuŋwaga sa e têtu lau dabuŋ ŋanô.