‏ Mark 15

Jesu kêkô Pilata laŋônêm

(Mat 27:1-2, 11-14; Luk 23:1-5; Joaŋ 18:28-38)

1Bêbêc kanucgeŋ lau dabuŋsêga to laumata ma biŋsutau to lau ŋanô samob sêkac sa jasêsôm biŋ kêtu tôŋ, go sêsô Jesu tôŋ ma sêkêŋ eŋ gêdêŋ Pilata gêja. 2Ma Pilata kêtu kênac eŋ gebe “Judanêŋ kiŋ aôm me masi.” Tec Jesu gêjô eŋ awa gebe “Kôsômgac.” 3Ma lau dabuŋsêga sêgôliŋ biŋ taêsam kêpi eŋ. 4Tec Pilata kêtu kênac eŋ kêtiam gebe “Aômnêm biŋ ôjô êsêac aweŋŋa gêc atom me. Ôlic acgom, êsêac sêgôliŋ biŋ gwalêkiŋ kêpi aômgoc.” 5Mago Jesu gêjô biŋ teŋ kêtiam atom, tec Pilata gê taê eŋ.

Sêsôm kêtu tôŋ gebe Jesu êmac endu

(Mat 27:15-26; Luk 23:13-25; Joaŋ 18:39—19:16)

6Kêtôm omsêgageŋ Pilata kêgaboac ŋac kapoacwalôŋa teŋ su gêdêŋ êsêac kêtôm teteŋ. 7Ma ŋac teŋ, ŋaê Baraba, gêŋgôŋ kapoacwalô gêwiŋ sêli-lausawaga, taŋ sêjac ŋac teŋ êndu gêdêŋ taŋ sêli tauŋ sa naŋ. 8Tec lau sêpi sêja ma teteŋ Pilata gebe êŋgôm êndêŋ êsêac amboac gêgôm-gêgôm gêmoa. 9Ma Pilata gêjô êsêac aweŋ gebe “Amac abe aê jaŋgamboac Judanêŋ kiŋ su êndêŋ amac me masi.” 10Gebe eŋ kêjalagac gebe lau dabuŋsêga sêkêŋ Jesu gêdêŋ eŋ kêtu têntac secŋa. 11Ma lau dabuŋsêga sêli lau sa gebe teteŋ Pilata êŋgamboac Baraba su êndêŋ êsêac. 12Tec Pilata kêtu kênac êsêac kêtiam gebe “Ma eŋ, taŋ asam eŋ gebe Judanêŋ kiŋ naŋ, jaŋgôm eŋ amboac ondoc.” 13Ma êsêac sêmôêc kêtiam gebe “Ônac eŋ êpi kakesotau.” 14Ma Pilata kêsôm gêdêŋ êsêac gebe “Eŋ gêgôm sec ondoc.” Mago êsêac sêmôêc sêôc aucgeŋ gebe “Ônac eŋ êpi kakesotau.” 15Pilata gebe ênac malô lau têntac, tec kêgaboac Baraba su gêdêŋ êsêac ma kêsôm si Jesu ma kêkêŋ eŋ gêja gebe sênac eŋ êpi kakesotau.

Siŋwaga sêsu Jesu susu

(Mat 27:27-31; Joaŋ 19:2-3)

16Siŋwaga sêwê Jesu sêja gôliŋ-waganê andu ma sêkalem siŋwaga samucgeŋ sa. 17Go sêkêŋ eŋ kêsô ŋakwê asôsamuc teŋ ma sêmoê okêm kêtu sunsuŋ jasêkêŋ eŋ kêkuc. 18Ma aweŋ gêjac eŋ to sê moalêc eŋ gebe “Judanêŋ kiŋ, ômoa ŋajamôŋ.” 19Ma si eŋ ŋa ôpic kêsêp môkêapac to sêkasôp kêpi eŋ, ma sêpôŋ aeŋduc to aweŋ gêôc eŋ. 20Sêsu eŋ susu su acgom, go sêkwalec ŋakwê asôsamuc naŋ su ma sêu tau nê ŋakwê gêsaŋ eŋ kêtiam. Ma sêwê eŋ sêsa sêja sebe sênac eŋ êpi kakesotau.

Sêjac Jesu kêpi kakesotau

(Mat 27:32-44; Luk 23:26-43; Joaŋ 19:17-27)

21Sêsa sêja e dêdac ŋac teŋ kêsa aŋga kôm gêmêŋ, Alesandere agêc Rupu tameŋi Simon aŋga Kurene. Tec sêkac eŋ g ebe êôc Jesunê kakesotau. 22Ma sêkôc Jesu sêpi gamêŋ Golgata sêja, tanam ôkwi gebe “Gamêŋ mokê-lacŋa.” 23Ma sêsuŋ wain togêŋ ŋamakic gêdêŋ eŋ gebe ênôm e gedec. 24Sêjac eŋ kêpi kakesotau su, go sebe sênac sam ênê ŋakwê, tec sêpuc kapoac gebe sêlic asa oc êkôc asageŋ. 25Oc mêŋgic lauŋ sa ma sêjac eŋ kêpi kakesotau gêja. 26Ma teto ŋabiŋ gêwiŋ gebe “Judanêŋ kin tonec.” 27Ma sêjac kêjaŋgowaga luagêc sêpi kakesotau sêwiŋ eŋ, teŋ geŋkaleŋ ênê anôŋa ma teŋ geŋkaleŋ ênê gasêŋa. [ 28Tec biŋ, taŋ teto gêc naŋ, gebe “Sêsam eŋ gêwiŋ lau sec” naŋ, kêtu tôŋ.]

29Ma lau, taŋ sêwê sêja sêmêŋ semoa naŋ, têdaiŋ gêsuŋ ma sêsôm biŋ alôb-alôb kêpi eŋ gebe “Op, aôm tau, taŋ gobe onseŋ lôm dabuŋ su ma ôkwê sa êndêŋ bêc têlêac naŋ, 30ônam taôm sa ma ôsêp aŋga kakesotau ômôêŋmaŋ.” 31Lau dabuŋsêga to biŋsutau sêsu eŋ susu amboac tonaŋ to sêsôm gêdêŋ tauŋ gebe “Lau ŋagêdô tec gêjam êsêac sa, mago gêjam tau sa jakêtôm atom. 32Kilisi, Israelnêŋ kiŋ, êsêp aŋga kakesotau êmêŋmaŋ, go talic ec takêŋ êwiŋ eŋ.” Ma êsêagêc, taŋ sêjac agêc sêwiŋ eŋ naŋ, têtaŋ pêlê eŋ amboac tonaŋgeŋ.

Jesu gêmac êndu

(Mat 27:45-56; Luk 23:44-49; Joaŋ 19:28-30)

33Gêdêŋ taŋ oc kêkô ŋaluŋ naŋ, gêsuŋbôm gêjam gamêŋ samucgeŋ auc e gêdêŋ ocmata. 34Ma gêdêŋ ocmata tonaŋ Jesu gêmôêc awa kapôêŋ gebe “Êli, Êli lama sabatani,” tanam ôkwi gebe “Aêŋoc Anôtô, aêŋoc Anôtô, amboac ondoc gôwi aê siŋ.” 35Ma lau ŋagêdô, taŋ sêkô ŋagala naŋ, sêŋô tec sêsôm gebe “Kec, eŋ gêmôêc Elia.” 36Ma ŋac teŋ kêlêti gêja kêsac mêckelep tôŋ kêsêp bu ŋamakic ma jagêsuŋ gêdêŋ eŋ gênôm ma kêsôm gebe “Akôgeŋ ma talic acgom, Elia oc mêŋêkôc eŋ su me masi.” 37Go Jesu gêmôêc awa kapôêŋ ma gêmac êndu.

38Ma obo baliŋ, taŋ geŋkaleŋ lôm dabuŋ naŋ, kêkac tau gêŋgic gêja luagêc aŋga ŋaô e jakêsu ŋalabu. 39Ma kapitai, taŋ kêkô kêkanôŋ Jesunê kakesotau naŋ, kêkô e gêlic Jesu gêmac êndu amboac tonaŋ ma kêsôm gebe “Ŋac tonec Anôtônê Latu eŋ biŋŋanôgoc.” 40Lauo ŋagêdô sêkô ec jaêcgeŋ ma sêlic sêwiŋ. Êsêacnêŋ ŋagêdô tonec Maria Magdalaŋa ma Jakobo sauŋ agêc Joses teneŋi Maria ma Salome. 41Gêdêŋ taŋ Jesu gêmoa Galilaia naŋ, lauo tonaŋ têdaguc eŋ ma sêjam sakiŋ eŋ. Ma ŋagêdô taêsam, taŋ sêpi Jerusalem sêwiŋ eŋ sêja naŋ, sêkô sêwiŋ amboac tonaŋ.

Sêsuŋ Jesu

(Mat 27:57-61; Luk 23:50-56; Joaŋ 19:38-42)

42Ŋakêtula ma sêmasaŋ tauŋ gebe ŋaeleŋ oc sêlic sabat. 43Tec kasêga towae teŋ, ŋaê Josep aŋga Arimatia, gêmêŋ, taŋ gêôŋ Anôtônê gamêŋ amboac tonaŋ naŋ. Eŋ taê kêpa sugeŋ kêsô gêdêŋ Pilata gêja ma keteŋ Jesunê ŋawêlêlaŋ. 44Pilata gêŋô gebe Jesu gêmac êndu su, tec gê go ma gêmôêc kapitai tau mêŋkêtu kênac eŋ gebe “Ŋac tau gêmac êndu su me.” 45Eŋ gêŋô kêtu katô aŋga kapitainê, tec gêwi ŋawêlêlaŋ siŋ gêdêŋ Josep. 46Ma Josep gêjam ôli obo kwalam-kwalam teŋ ma jakêkôc eŋ su aŋga kakesotau mêŋkêsabaŋ eŋ kêsêp obo tonaŋ ma ketoc eŋ gêc sêô teŋ, taŋ sêsap kêsêp poc naŋ, ma kêsabi poc jagêsaŋ sêawa auc. 47Ma Maria aŋga Magdala agêc Joses têna Maria sêlic gamêŋ, taŋ tetoc eŋ gêc naŋ.