Psa 106 | JAE | STEP | Aleluja. Anam daŋge êndêŋ Apômtau gebe eŋ gabêjam. Ênê moasiŋ oc ênêc teŋgeŋ biŋŋanôgoc.

‏ Psalms 106

PESALEM 106

Anôtô kêmoasiŋ nê lau

1 Aleluja.
Anam daŋge êndêŋ Apômtau gebe eŋ gabêjam.
Ênê moasiŋ oc ênêc teŋgeŋ biŋŋanôgoc.
2 Asa kêtôm gebe êsôm Apômtaunê gêŋsêga lasê tomalageŋ
ma asa oc êŋgôm ênê wae êsa naêtôm.
3 Aê aoc êôc êsêac, taŋ sêsap biŋgêdêŋ tôŋ
ma sêmasaŋ biŋgêdêŋ gedeŋ tôŋgeŋ naŋ.

4 O Apômtau, taêm ênam aê êtôm, taŋ taêm walô nêm lau naŋ.
Mêŋônam aê aoc sumaŋ
5 gebe jalic lau, taŋ kôjaliŋ êsêac sa naŋ, sêmoa nêŋ ŋajam ma êmoasiŋ ŋoc ŋalêlôm
gebe têtac ŋajam êsa êtu nêm lau têntac ŋajamŋa ma jamoa ôlic êpigeŋ êtu nêm gêŋlênsêmŋa.

6 Aêac to ma mimi agôm secgoc.
Aêac agôm keso to geogoc.
7 Ma mimi sêmoa Aiguptu ma tetoc aômnêm gêŋsêga sa atom, ac taêŋ gêjam nêm moasiŋ, taŋ gêjam êsêac auc naŋ atom.
Êsêac gêsuŋtêkwa ŋatoŋ kêsa gêdêŋ Lôlôc Ŋatau aŋga Gwêckoc,
8 mago eŋ gêjam êsêac sa kêtu nê ŋaêŋa
gebe êwaka nê ŋaclai sa ŋamalac sêlic.
9 Eŋ kêsaic biŋ kêpi Gwêckoc e ŋakeleŋ kêsa.
Eŋ gêwê nê lau sêsêlêŋ selom ŋamakeŋ amboac sêmoa gamêŋ ŋakeleŋ.
10 Eŋ gêgôm gêŋ tonaŋ gêjam êsêac kêsi aŋga lau, taŋ sêjanda êsêac naŋ lemeŋ
ma kêjaŋgo êsêac su aŋga nêŋ ŋacjo nêŋ ŋaclai.
11 Ŋadembom kêsiŋ lau, taŋ sêlêsu êsêac naŋ auc
e ŋanô kêsu teŋ kêsêp siŋsawa atom.
12 Gêdêŋ tonaŋ sêkêŋ gêwiŋ ênê biŋ
ma sêjam wê lambiŋŋa kêpi eŋ.

13 Mago êsêac sêliŋ ênê gêŋsêga siŋ sebeŋ
ma seseŋ ênê gôliŋ popoc.
14 Êsêac sêkêŋ gêwiŋ nêŋ ŋalêlôm ŋakalac aŋga gamêŋ sawa
ma sêsaê Anôtô aŋga gamêŋ ŋagêlêŋ.
15 Tec eŋ kêkêŋ gêŋ, taŋ êsêac têtaŋ naŋ,
mago kêkêŋ gêmac sec geseŋ êsêac.

16 Aŋga gamêŋ becŋa êsêac sêjam lêmuŋ Mose
ma sêgôm Anôtônê dabuŋwaga Aron amboac tonaŋgeŋ.
17 Tec nom gêŋac ma kêdaŋgôŋ Datan
ma kêmakop toŋ Abiramŋa auc.
18 Ja kêsa aŋga êsêacnêŋ toŋ ŋalêlôm
e jawaô geŋ alôb-alôbwaga su.

19 Êsêac sêmasaŋ nêŋ bulimakao ŋakatu gold teŋ aŋga Sinai
ma sêjam sakiŋ ŋakatu gold tau.
20 Ma sêkêŋ bôc, taŋ seŋ gêgwaŋŋa naŋ, nêŋ teŋ ŋakatu
gêjô nêŋ Anôtô nê ŋawasi su.
21 Êsêac sêliŋ nêŋ gêjam-sawaga Anôtô,
taŋ gêgôm gêŋsêga aŋga Aiguptu naŋ siŋ.
22 Ŋac tau gêgôm gêŋtalô aŋga gamêŋ tonaŋ,
gêgôm gêŋ ŋaclaisêga aŋga Gwêckoc.
23 Amboac tonaŋ Anôtô kêsôm gebe
enseŋ nê lau su.
Mago nê sakiŋwaga Mose, taŋ Anôtô kêjaliŋ eŋ sa naŋ,
kêkô Anôtônê têtac ŋandaŋ auc gebe enseŋ êsêac su atom.

24 Go sêkêŋ gêwiŋ biŋ, taŋ eŋ gêjac mata naŋ atom
ma sêbu gamêŋ ŋajam tau.
25 Êsêac têtu dindiŋ biŋ kêtôm nêŋ beclêlômgeŋ
ma sêkêŋ taŋeŋ Apômtaunê awa atom.
26 Tec eŋ gêôc lêma sa ma kêsôm kêtu tôŋ gebe
enseŋ êsêac aŋga gamêŋ sawa.
27 Go êta êsêacnêŋ wakuc êliŋ-êliŋ sêsêp tenteŋlatu ŋalêlôm
e sêmac êndu aŋga gamêŋ jaba.

28 Go êsêac sêsap Bal Peor tôŋ
ma seŋ gwam matê ŋada.
29 Êsêac sêgôm gêŋ amboac tonaŋ e sêgôm Apômtau têtac kêbôli auc
ma gêmac sec teŋ gêgôm êsêac.
30 Go Pinehas gêdi ma kêmêtôc êsêac
e gêmac sec gêôŋ sa.
31 Ŋac tau gêgôm nê gêŋ amboac tonaŋ tec lau sêlic eŋ amboac ŋac mansaŋ
ma gôlôac to gôlôac taêŋ gêjam eŋ gedeŋ tôŋgeŋ.

32 Go sêgôm Anôtô têtac ŋandaŋ kêsa aŋga bu Meriba
e Mose kêtap ŋagêjô sa gêjô êsêac.
33 Êsêac sêgôm Mosenê ŋalêlôm gêôŋ eŋ sa sec
e kêsôm biŋ tokauc masi.

34 Israel seseŋ lau samuc
kêtôm Apômtau kêsakiŋ êsêacŋa atom.
35 Êsêac sêjam tauŋ
e têtêku lau samuc naŋ lêŋ jaba.
36 Ma sêjam sakiŋ êsêacnêŋ gwam,
tec kêtu lakô gêdêŋ êsêac.
37 Êsêac sêkêŋ latuŋio to ŋac têtu da
gêdêŋ lau samuc nêŋ ŋalau sec.
38 Êsêac sêkêc lau tobiŋmê nêŋ dec siŋ gebe sêkêŋ latuŋio to ŋac kêtu da gêdêŋ Kanaannêŋ gwam.
Sêgôm amboac tonaŋ tec seseŋ nom ŋadabuŋ su.
39 Êsêac sêjac môp tauŋ tec sêkac tauŋ su aŋga Anôtônê.
Êsêac sêgôm nêŋ gêŋ amboac tonaŋ tec seseŋ poac popoc.

40 Go Apômtau têtac ŋandaŋ kêsa gêdêŋ nê lau
gebe nê ŋalêlôm kêmoatiŋ tau tôŋ kêtu nê gêŋlênsêmŋa.
41 Eŋ gêwi êsêac siŋ sêsêp lau samuc lemeŋ,
tec lau, taŋ sêkêŋ kisa êsêac naŋ, sêjam gôliŋ êsêac.
42 Nêŋ ŋacjo sêkôniŋ êsêac tôŋ
e sewec sêsô ŋacjo lemeŋ ŋalabu samucgeŋ.
43 Apômtau gêjam êsêac sa kêsêp ŋasawa ŋapaŋ,
mago êsêac gêsuŋtêkwa ŋatoŋ ma nêŋ sec gêjam sêga e kêkôniŋ êsêac tôŋ.
44 Tageŋ gêdêŋ taŋ têtaŋ tauŋ gêdêŋ eŋ naŋ,
Apômtau kêkêŋ taŋa to taê walô êsêac kêtu nêŋ gêŋwapacŋa.
45 Eŋ taê gêjam nê poac, taŋ kêmoatiŋ kêtu êsêacŋa naŋ,
ma taê walô êsêac kêtu nê têtac gêwiŋ teŋgeŋŋa.
46 Ma kêkêŋ êsêac, taŋ sêwê êsêac sêŋgôŋ kapoacwalô naŋ,
nêŋ ŋalêlôm taêŋ walô êsêac.

47 O Apômtau, aêacma Anôtô, ônam aêacmêŋ sa
ma ônac aêac sa aŋga lau samuc nêŋ êtiam
gebe aêac anam daŋge êndêŋ aômnêm ŋaê dabuŋ
ma têntac ŋajam êsa êtu nêm waemŋa.

48 Aweŋ êôc Apômtau Israelnêŋ Anôtô êndêŋ galoc to endeŋ tôŋgeŋ,
ma lau samob sêlôc gebe “Biŋŋanô.”

Aleluja.