Psa 48 | JAE | STEP | Apômtau eŋ ŋac kapôêŋ, amboac tonaŋ aweŋ eoc eŋ ŋanô aŋga aêacnêŋ Anôtônê malac.

‏ Psalms 48

PESALEM 48

Anôtônê malac ŋawê

1 Apômtau eŋ ŋac kapôêŋ, amboac tonaŋ aweŋ eoc eŋ ŋanô
aŋga aêacnêŋ Anôtônê malac.
2 Ênê lôc dabuŋ gêguŋ sa laŋgwageŋ
kêtu ŋamalac samob nêŋ gêŋ ênac mateŋanô ŋajamŋa.
Anôtônê lôc tau tec lôc Sion
kiŋ kapôêŋ nê malac.
3 Anôtô kêwaka tau sa aŋga êsêacnêŋ andulêlôm
gebe eŋ laimôkê.

4 Gôlicgac me, kiŋ sêkac tauŋ sa
ma êsêac sêwêgeŋ sêmêŋ,
5 e sêlic ma têtakê.
Êsêac selendec e nêŋ meloco kêsa ma sêc êliŋ-êliŋ
6 ma têtênêp tauŋ êndu-êndu
to sêmoa jageo amboac awê, taŋ ŋapalê kêtuŋ eŋ naŋ.
7 Aôm kôkêŋ musalô kapôêŋ
e gôjac lau Tarsis nêŋ waŋ popoc.

8 Galoc talic gêŋ tau kêtôm, taŋ taŋô naŋ,
aŋga lau siŋ undambêŋa nêŋ Apômtau nê malac,
aŋga nêŋ Anôtô nê malac,
taŋ eŋ kêwaka sa gebe êkô endeŋ tôŋgeŋ.

9 O Anôtô, aêac taêŋ gêjam aômnêm têmtac gêwiŋ teŋgeŋŋa
amoa nêm lôm dabuŋ ŋalêlôm.
10 O Anôtô, aôm waem kêsa e jagêdêŋ nom ŋamadiŋ kêtôm nêm ŋaê.
Biŋgêdêŋ kêsêp lêmam anôŋa e mêŋgêc poap tageŋ.
11 Lôc Sion êtu samuc êtu biŋ tonaŋŋa.
Juda latuŋio sênam lasê toôndugeŋ êtu aôm kômêtôc biŋŋa.

12 Asêlêŋ awê aŋgi lôc Sion auc
ma asa ŋaandulatu tuŋbômŋa sa.
13 Asala tuŋbôm tomalageŋ e êmbacnê ma asêlêŋ amoa ŋaandu towae ŋalêlôm,
gebe anac miŋ êndêŋ lau wakuc sêŋô,
14 gebe Anôtô tonaŋ kêtu aêacnêŋ Anôtô êmoa teŋgeŋ to teŋgeŋ.
Eŋ oc êwê aêac endeŋ tôŋgeŋ.
^{▼▼Lau Kora nêŋ wê teŋ.}