Psalms 49
PESALEM 49
Taeŋ kêka awamata atom gebe geŋ ŋaôma
1Tenteŋlatu samob, aŋô biŋ tonec.Amac lau, taŋ aŋgôŋ nom samob auc naŋ, akêŋ taŋemmaŋ.
2Amac lau ŋaôma latuŋi to apômtau latuŋiac,
amac lau tolêlôm ma lau ŋalêlôm sawa amboac tonaŋgeŋ.
3Aocsuŋ êsôm mêtê lasê
ma ŋoc ŋalêlôm taê ênam biŋ tokauc acgom.
4Aê jaê taŋoc êndêŋ biŋgôliŋ laŋgwa
ma jawa ŋam sa to janac gêŋ wêŋa êtaŋ.
5Êndêŋ bêc wapacŋa embe ŋacjo nêŋ biŋ alôb-alôb êkôm aê auc,
naŋ jatêc tauc êtu ageŋŋa.
6Lau sec taêŋ kêka nêŋ awageŋ
to tetoc tauŋ sa kêtu nêŋ waba taêsamŋa.
7Ŋamalac teŋ êkêŋ gêŋ ênac da tau êŋgôm êtôm atom
ma eŋ êkêŋ ŋaôli êsi tau suŋa êndêŋ Anôtô oc êŋgôm naeo amboac tonaŋgeŋ.
8Gebe katuŋ ŋaôli (gebe tamoa mateŋ jali ŋaôli) kapôêŋ secsêga,
ŋac teŋ êtap sa êtôm atomanô.
9Eŋ embe taê ênam gebe ênac da tau e êmoa mata jaligeŋ ma êsêp sê atom
oc êŋgôm êtôm atomanô.
10Aêac talicgac gebe laumêtê sêmac êndu ma lau meloc to kaucmê sêjaŋa amboac tonaŋgeŋ.
Ma êsêac oc sêwi nêŋ waba siŋ naelom lau teŋ sêkôc.
11Lau tonaŋ sê nêŋ ŋaê kêpi nom ŋagamêŋ ŋagêdô,
mago nêŋ sê kêtu nêŋ malacmôkê, kêtu nêŋ andu totêm-totêm.
12Biŋŋanô, ŋamalac tonê gêlôŋgeŋ, tec êmoa nê teŋgeŋ atom.
Eŋ kêtôm bôc, taŋ ênaŋa naŋ.
13Lau taŋ taêŋ kêpa tauŋ su naŋ,
ma êsêac, taŋ sêkêŋ gêwiŋ êsêacnêŋ biŋ ma oc têndaŋguc êsêac naŋ, nêŋ lêŋ kêtôm tonaŋgeŋ.
14Êsêac têdênaŋ tauŋ têtôm domba gebe lamboam gêwê kaiŋ êsêac.
Gêmac anô kêtu nêŋ ŋacgejob.
15Ma Anôtô oc ênam ŋoc katuc kêsi aŋga lamboam ŋaŋaclai
gebe eŋ oc ênam aê kêsi.
16Amboac tonaŋ embe ôlic ŋac teŋ nê awa êtu taêsam
ma nê andu ŋagêŋlêlôm ênsac tau ŋaô-ŋaô, naŋ têmtac sec atom,
17gebe eŋ embe êmac êndu, oc êkôc gêŋ samob tonaŋ ŋai ŋateŋ êna atom.
Ênê gêlôŋ ŋawasi oc êwiŋ eŋ êna atom.
18Eŋ embe êlambiŋ tau gebe êmoa ŋajam aŋga nom
ma lau embe sêlambiŋ eŋ gebe kêtap nê kôm ŋanô taêsam sa,
19oc ênam eŋ sa atom, eŋ naêndêŋ tamai to nêŋ lau ŋanô,
taŋ sêlic oc ŋawê kêtiam atom naŋ.
20Biŋŋanô, ŋamalac tonê gêlôŋ oc êmoa teŋgeŋ atom.
Eŋ kêtôm bôc, taŋ ênaŋa naŋ.
▼
▼Lau Kora nêŋ wê teŋ.
Copyright information for
JAE