Psa 50 | JAE | STEP | Ŋaniniŋ Ŋatau Apômtau Anôtô gêmôêc gêdêŋ nom ma kêsôm nê biŋ aŋga oc kêpiŋa jagêdêŋ oc kêsêpŋa.

‏ Psalms 50

PESALEM 50

Anôtô eŋ mêtôcwaga

1 Ŋaniniŋ Ŋatau Apômtau Anôtô gêmôêc gêdêŋ nom ma kêsôm nê biŋ
aŋga oc kêpiŋa jagêdêŋ oc kêsêpŋa.
2 Anôtônê ŋawê kêpoac lasê aŋga Sion,
taŋ kêtu malac togêlôŋsêga naŋ.

3 Aêacnêŋ Anôtô gêmêŋ togamêŋ gêmacgeŋ atom.
Ja kêdaŋgac-kêdaŋgac gêmuŋ eŋ kêsêp gamêŋ kêlaŋgaŋ.
4 Eŋ gêmôêc gêdêŋ undambê ôŋa ma gêdêŋ lau nomŋa,
gebe êmêtôc nê lau.
5 Eŋ kêsôm gebe “Akac ŋoc lau-mansaŋwaga,
taŋ sêkêŋ da sêmoatiŋ poacŋa gêdêŋ aê naŋ, sa sêmêŋ.”
6 Tec undambê êsôm ênê biŋ gêdêŋ lasê
gebe Anôtô tau eŋ mêtôcwaga.

7 “O ŋoc lau, akêŋ taŋem aê gabe jasôm biŋ.
O Israel tau, aê gabe jawa nêm keso, taŋ gôwê kaiŋ naŋ lasê. Anôtô, aômnêm Anôtô aê.
8 Aê gabe jasôm aôm êtu nêm daŋa atom
gebe matocanô galic nêm daja gedeŋ tôŋgeŋ.
9 Aê gabe jakôc bulimakao kapoac aŋga nêm andu
to noniŋ kapoac aŋga nêm sapalêlôm atom,
10 gebe gwada saleŋŋa samob
to bôc tokaiŋ-tokaiŋ, taŋ sêmoa lôc tolôc naŋ, ŋatau aê.
11 Moc samob, taŋ sêmoa lôlôc naŋ, aê kajala kêtu tôŋ
ma gêŋ, taŋ sêmoa obalêlôm naŋ, ŋatau aê.

12 “Mo embe êjô aê, oc jasôm êndêŋ aôm atom,
gebe nom samucgeŋ to ŋagêŋlêlôm samob ŋatau aê.
13 Aê oc gaeŋ bulimakao ŋamêsôm
me oc ganôm noniŋ ŋadec me.
14 Ôkêŋ daŋge êtu da êndêŋ Apômtau,
ma ôŋgôm biŋ, taŋ gôjac mata naŋ, ŋanô êsa êndêŋ Lôlôc Ŋatau.
15 Ma awam ênac aê êndêŋ bêc ôpô lênaŋa,
go janam aôm sa ma awam êôc aê.”

16 Mago Apômtau kêsôm gêdêŋ ŋac-kêkac-tau-suwaga gebe
“Amboac ondoc aôm kôsa aêŋoc biŋsu sasa ma aêŋoc poac ŋabiŋ gêc awamgeŋ.
17 Aôm tonaŋ tec godec ŋoc mêtôc
ma kôtiŋ ŋoc biŋ su gêc dêmôêmmuŋa.
18 Embe ôtap geŋgeŋtêna teŋ sa, oc wê eŋ êtu nêm sêlêb
ma mockaiŋtêna êtu nêm ŋac ôlim andaŋŋa.

19 “Aôm kôlêwaŋ awamsuŋ gêdêŋ biŋ sec
ma imbêlam geno-geno biŋdansaŋ ŋapaŋgeŋ.
20 Aôm gôŋgôŋgeŋ ma kôgôliŋ biŋ kêpi lasim
to gôga biŋ kêpi taôm tênam latu,
21 Aôm gôgôm gêŋ tonaŋ ŋai, mago aê gajam tauc tôŋ, tec taêm gêjam gebe aê katôm aôm.
Tageŋ galoc jaec biŋ aôm gebe jawa nêm kauc sa.

22 “Amac taŋ aliŋ Anôtô siŋ naŋ, taêm ênam biŋ tonaŋ acgom.
Embe masi, oc janseŋ amac su anaŋa ma ŋac teŋ êtôm gebe ênam amac sa atomanô.
23 Ŋac taŋ êkêŋ daŋge êtu da naŋ, etoc aê sa
ma ŋac, taŋ êsa nê lêŋ laŋônêm sawageŋ naŋ, oc jakêŋ eŋ êlic Anôtônê moasiŋ.”
^{▼▼Asapnê pesalem teŋ.}