Luke 15

Unǝrǝ a tara bitan bigeme se bina worro

(Mat 18.12-14)

1Oye dara ano kaso ogandu neng “ano masharra” nga rai doguna nga kuna yemasanga ye Yeso. 2Nze tuFarisi neng ano masano makirri ma Musa nga bura ogogomozo nga ya gusa, “Ono giname ma geme akasa ano masharra, maya a wucu eyabo wucu neng nye.”

3Nze ma nya nye oye o nǝrǝ. 4“Ago woi ayima ka nyi ma zen etan rrinu, nze bi vento ayimi ka nye biwurru, ai, maya deke sinu turai neng turai egem me aro wucarra, ama ngame agangarrǝ bigeme se bina worro se mana morra. 5Inga se ma morra beme, maya wuza ezalla, maya zakǝ beme openpen, 6Inga madinye atitǝu. Nze ma tisa awantano akame neng ano chǝkǝnǝ voto neng me, ma gon nye, ‘Benken ne ezalla baka se mina morra bitan abon bigeme se bina worro.’ 7Miya biza akanyi, ezalla egem me se a toma Ogomo Asharri ya wuza me Asharri baka, ono masharra ovento se mana deke masharra ma me, enan kera ezalla egemese a ya wuza baka ano eturru turai neng turai, ano ageme se nga na yete ogona nga zemen masharra ne.

Unǝrǝ a tara in ru egem me se ema wurre

8“Inga owai zen iwo iru biturru, nze bi vento biwurre, maze ma lapo orra o pitilla ma sarka atitǝumi, doguna ma gangarri beme dede se mana morra beme ne? 9Inga ma morra beme, nze ma woro awantano akame neng ano ageme se nga ya chǝkǝnǝ neng me, ma gon nye, ‘Benken ne ezalla, baka se na morra iru egemese ina worro.’ 10Ya biza akanyi, nane ze eya chǝkǝnǝ neng zalla otoma owo Ogomo Asharri Inga se ono masharra vento se mana deke masharra ma me.”

Unǝrǝ a tara asho

o tubarasa

11Yeso wucaji neng ogona, “Ama na ngona oye ono se maze abiya akame repo. 12Ono damo ayima ka nye ma gunan ashuwo kunye, ‘Tata, nyan binu abon seginna ayimi omorra okoi.’ Nze ashuwo nye ma wara nye omorra ome zal.

13“Amarro tumuru tumi, nze vana me worso togorro atume zal, nze ma ngame ama aye a nyanga ayiyau. Agemme ze ma ngame maka wurrusu omorra me a rresono. 14Se ma jamu wuna eme geme se ma zen no, nze ekomo eganka epete a nyangam me, me ma pete ayimi toyang. 15Nze ma ngame a narra etoma a oye ono nyangam me, nze ono me tipi mi ama ka wankǝli atulade atume. 16Ma narra wucu emo wucu tolade, woi mata nya me ne.

17“A bimaso ma kuri adodonzo a me, nze ma go, ‘Ane etoma ashon zal nga gina se nga ya kungku eyabo wucu, min gina awanǝng ekomo. 18Min ya wira in kuri atata okon in gom me, tata, na ngona Ogomo Asharri esharra, in kuri ngonai. 19In ta bare okuru atisan vana okoine. Ngunan an chǝkǝnǝ sakama woi ayima ane toma a kai.’ 20Nze ma wera ma me orona a kuru a shome.

“Se makada ayiyau, nze a shome ru mi. Nze ogwengwene ome a shome, nze mawerang tosong, mangame maka rapa vana ome, nze ma lǝmǝmi.

21“Nze vana me gom me, ‘Tata, mina ngona Ogomo Asharri eshara in kunkuri in woi. In ta bare kuri atisang vanoye ne.’

22“Nze a shome tisa ane etoma me, ma go, ‘Shonnone. Iraneng udi osaru onguma me, e soke me. Era nen bikakaran be yebo asokeme neng tukakau, 23akuri aranan bivare bi tokwǝnǝ bigemme atuzi, a woro wuci, a wuza ezalla. 24Baka se vana okon ogina, o nǝrǝ okon mana wǝnǝ egina se ma zen rroma. Mana worro, segina mina morra me.’ Nze nga wuza ezalla ogari errina dede.

25“Ocha ogomme ze vana ome ongono maze uja se maya kuru. Se ma we voton neng atitǝu mi, nze ma kuna a ya ye rrina a ya gari errina. 26Nze ma tisa oye one Toma ataumi, nze ma sangarra me yaze a ya wuza me. 27Nze onetumame go, ‘Ai, onadǝmu okoi zen a kuru, e ze tata okoi na guna atuzu bivare bi tokwǝnǝ bigemme baka owanoye na kuru atitǝu shammo.’

28“Se vana ongono me kuna nane nze apuru sharro me dede, nze ma nya me ne opete ataumi. Baka nane ze ashuwo nye ma suru maka wuza me tukusu ama pete ayim mi. 29Nze ma garre ma gon a shome, ‘Nǝrǝ, zal siwai sigina, miya wuzaza a kai etoma sakama orere, mi dan nya me ne eme geme se ngona guna in we ne. Zal neng nane, ngo dan nyan kokubiya amin tisa awantano akan amin wucu neng nye ne. 30Ama vana okoi ogome se mana sarma omorra okoi a tukilake, se mana ra, ngona tuzu mi bivare bi tokwǝnǝ begemme.’

31“Nze a shome gom me, ‘Vana okon, koyo odara ngo zimmi, zal eme geme se minzano, ai, ekei ze. 32Eyǝnkǝnǝ guna a wuza ezalla neng uruntu apuru, owanome okoi ogina otize ogo manǝ wǝnǝzi, a segina mana kurun rroma. Ma wurri ama segina ana morra me.’”