Luke 16

O nǝrǝ a tara ono wankǝli ane otoma se mameng magagan ne

1Yeso gon ano yemasanga mame, “Woi maze anu ono morra se ma zaka wei ono wankǝli ane toma me. Ama ngame beleng be otoma ome ogomo ago maya sharra omorra owa achakura ome. 2Nze achakura me tisa otoma me, ‘Yaze min ya kunaza me a tara kai? Darsa nane se ngo ya wuzaza etoma ekei, baka asuru akane ngo ze ma chǝkǝnǝ one Toma eken.’

3“Nze otoma me go ama biruwa, mi nan ngona innizi, ‘Achakura okon na waran ne etoma ze eken? Min gina mizemen a gata o wuza avarane, gaze miya kuna emme mo bura bisan ngra. 4Min ru epegemese miya ngona me, baka, ocha ogome se inga anarrung aye toma, ano kan a nye atitǝu.’

5“Baka nane ze ma tisa zal ana geme se achakura me tarse nye oduru aka vevento. Ma sangrra ono bibura, ‘Yaze achakura kodo tarsoi?’

6“Ma go, ‘Atego a manenye rrinu.’

“Nze ma gom me, ‘Ka emo darsa ewerre ekei chǝkǝnǝ odarsa sasa eturru shibi.’

7“Nze ma gon ono repo me, ‘Yaze ngoma kai?’

“‘Ma go tokatako te da rreno ze.’

“Nze ma gom me, ‘Ka otakarda okoi, odara eturru urru.’

8“Nze achakura me tongarra me, one etoma ogomme se mazemen magangan ne, baka rremo rrome. Rremo ya nagemese awei erruwa ekenye atogogoro to masano magina ekera ana geme se nga wei erowa ekenye atogoro to Ogomo Asharri. Baka se nga rru nane se nga ya tarse neng ana geme se nga ze eyau sakama nye.

9“Miya gosan nyi, yitane omora okonye ewei awantano nenno, baka dargemese omorra okunyi maso aneng ka nye aro chǝkǝnǝ ageme se azemen bimasone.

10“A ngo manti eyabo ebate rrezeze, oya mantǝ esaru. Ama inga mantǝ eyabo ebate rrezezene, omaru omanta egemese ekera abarene. 11Inga nyi tarru mantǝ omorra owo masano magina ne, avizi ya gara kǝnye neng mantǝ omorra o maganga? 12Inga nyi ta chǝkǝnǝ ano garra omǝtǝ eyabo ewui ne, avizi neng nya nyi epegeme se e ze ekinyi?

13“Orere mata barene ma wuza etoma a tochakura to repo ne, baka se nei ma nya me ne oye achakura me, ama barsa oye achakura me, maya wuza oye achakura me etoma, ama wizi oye achakura me. Nyi ta bare nyi tarse Ogomo Asharri, neng obarsa eruni ne.”

Maye masanga ma Musa

(Mat 11.12-13; 5.31-32)

14TuFarisi tome to kuna nane nze to yizu Yeso, baka nye ano narra iru zi. 15Nze Yeso gonnye, “Nyi narra owonko topana tonyi ayima ano, ama Ogomo Asharri ru erowa ekinyi. To gogorro togeme se ano ya kera a barsa me, toze Ogomo Asharri ze ma barsa o nǝrǝ mi ni.

16“Makirri ma Musa, neng yemasang ma to annabi maze ano ma tarse, a ngame a Yohana ono Obaptisima, ama bura bi beleng be lo be togomo to Ogomo Asharri, a suru Yohana, kǝvi ma matana doguna ama pete ayim mi. 17Asharri neng anyanga neng maso, ama ko koyabo kovento a makirri ma Musa koma worro ne.

Yemasanga a tara

o ngona a nya

(Mat 19.1-12; Mar 10.1-12)

18“Zal ono ogome se manǝrri owai ome, ma yete oye, mana muru neng owai woi geme, zal ono ogome se ma wuza a nya owai ogome se mana deke onorrome ome, me ma maya musu neng owai woi zi kǝwǝi.

Oye ono morra neng Lazaru

19“Ama we woi ono morra se ma soi tudi teru dede, tomalmal turun neng tuvo, ma wucuzu emo wucu e ngoma koyo odara. 20Ara akǝi atitǝu akame, woi maze ano ono toyang, se a gosan me Lazaru, ono ogome se tugwafu toma pate me rripung, koyo sanara arasanme alata me arakai owuno morra gom me. 21Ma narra ogona mata wucu, epegeme se ina kungkun anyanga asuru a tara ara o wucu emo wucu ewo ono morra ogomme. Ewache erasa alǝmǝ tugwafu tome.

22“Nze ageme se ono toyang tome ma wi, atoma awo Ogomo Asharri nga ra nga nganan me, nga ngameme a Ibirahim. Ono morra ogomme ma ga wǝnǝ aka wasa me. 23Ma ngame atitǝu ora maya kuna kwaiye, ma nyiza apana a me ma ni Ibirahim ayiyau, neng Lazaru. 24Nze ma tisa ma go, ‘Tata Ibirahim, kuna ogwengwene okon, Toma Lazaru ama we kobo akome ama nyi ama vaton a enleng mamang baka in kuna shammo bate, baka miya kuna kwaiye dede ayima orra ogina.’

25“Ama Ibirahim go, ‘Wuza adodonzo Vana okon, ocha ogome se ngoma da a masano, ngoma murrsa eyabo e ngoma, Lazaru ma kuna kwaiye. Ama segina maya malo, ngo gaze nga ya kuna kwaiye. 26Dan neng egem me base ne, azata akado neng nyi azen rrewo ye saru, ye gwerropo dede se ama mamarra baka tego ana geme se nga ya owulu okodo nga morra nga ngame a nyi a gemme ne. Tego ana geme se nga ya nini ara a woro ne.’

27“Nze ono morra ogomme go, ‘To, tata, miya tukusu, toma Lazaru ama ngame atitǝu awa shon, 28baka minzen aweno ankǝ shibi anarrome, ama ngame maka gunan nye, tego nye nga ra nga pete ara buru agina ne.’

29“Ibirahim go, ‘Nga zen Musa neng annabi, a nga kuna epegeme se nga ya bima nye.’

30“Ono morra me, ‘Magarre ma go aye, tata Ibirahim, Inga woi were ayimi in sau ma ngame a nye nga ya ka beleng be Ogomo Asharri nga deke masharra ma nye.’

31“Ibirahim go, ‘Inga nga ta kuna yemasang ye Musa neng to annabi ne, kowoi were asuru in sau, nga ze ma kuna kame ne.’”