Luke 18

O nǝrǝ a tara beroromo

koyo dara

1Nze Yeso nya ano yemasanga rrome oye o nǝrǝ ogome se nga neng wuza beroromo a koyo dara do vongke ne. 2Nze ma go, “Ama na morra oye ano bi beleng a aye ape se mazemen beye bo Ogomo Asharri ni, mata nǝrǝ woi neng sete apana ne. 3Ape agemme okorro owai yanu, se ma ngame ze a ono bi beleng ogursu beleng agusa, ‘Zuzu do maganga ayimi beleng begina a woro neng ono nya me ne akan.’

4“A bura ma nya me ne, nze ata dakano ne, nze ma go ama biruwa, ‘Emmo guna in ta kuna be yebo Ogomo Asharri ne ntanǝrrǝ woi neng sete apana ne. 5Baka owai ogina na daman, miya mala kame. Nzuzumi maganggang a yimi beleng begina, baka ngonan ganno arasa koyo odara.’”

6Nze Achakura go nye, “Kunane eme geme se ono odera obi maganggang na buku. 7Ogomo Asharri ze ma wonko ano ageme se ma zake anagemese nga wuzaza beroromo atiyǝ neng odara magangan ne? Nyi nǝrǝ mama mala akanye sasa ne? 8Miya bizaza akanyi, maya zuzu akanye magangan sasa, zal neng nane, ocha ogome se mi Vana Ono ya kuru, maya morra ono nya biruwa o Ogomo Asharri a masano ma me?”

O nǝrǝ a tara oFarisi

neng ono kaso ogandu

9Yeso ma buku oye o nǝrǝ ogina ano ageme se nga yete topana tonye ano magangan, nga yizizi odangara ano. 10Ma go, “A mana ngona aye ano anka repo se nga pete Atitǝu Awo Ogomo Asharri, baka nga wuza beroromo. Ono vento ayim mi akanye oFarisi ze, ano vento gaze ono kaso ogandu. 11Nze oFarisi me wera ma tore, ma bura beroromo, maya tonngarra apana a me, maya gusa, ‘Ogomo Asharri mina kokan, nǝrǝ min ze me sakama odangara ano ne, ano kasa to gogorro tano ne, min zemen masharra ne, ano musun awai ano, min ze me sakama ono kasa ogandu onini ne. 12Min tuna apana akan owucu emo wucu ka repo a tumuru sunare, Inga nyizai eyabo vento ayimi eyabo biturru se na morra akoyaya zal.’

13“Ama me ono kasa ogandu ogomme maka tore ayiyau, mata bare ma nyiza a ji akame asharri ni. Baka ocharra apuru ma duzu apana akame. Agusa, ‘Ogomo Asharri kuna ogwengwene okon, mi ono masharra ze!’”

14Yeso go, “Miya biza ka nyi, ano kasa ogandu ogome ma kuru atitǝu akame, ono ze Ogomo Asharri mana buza me a masharra ma me, dan sakama O farisi ne. Baka zal ono ageme se ma nyiza apana akame a ya duzu a me, ono ogome se ma duzu apana a me, a ya nyiza a me.”

Yeso ma vati abiya taye

(Mat 19.13-15; Mar 10.13-16)

15An ngai nga ran abiya akanyi a bate bate, baka Yeso ma vati nye taye. Ni se ano yimasanga rrome nga nǝrǝ nane, nze nga bura bokara ano me. 16Nze Yeso ma tisa abiya a bate bate a nga rai voto neng me, nze ma gon ane yemasanga rrome, “Deke ne abiya a bate bate a nga rai emi. Tego i tuna nye ne. Baka togomo ta Ogomo Asharri ta tonye ze. 17Gangan ze miya gosan nyi, zal ono gome se mata ka togomo to Ogomo Asharri ma chǝkǝnǝ Ogomo omene, sakama vana obate ne, mazema chǝkǝnǝ vano Ogomo Asharri ni.”

Ono saru ono morra

(Mat 19.16-30; Mar 10.17-31)

18Oye ono saru o tuYahudi ma sangarra Yeso ma go, “Achakura o ngoma, mi nan ngona in ni ze in morra rroma ye gemese ezemeng bimaso ne?”

19Yeso ma garre ma gom me, “Yaze ngo ya gosan mi ono ngoma? Ono ngoma ze ma nu ni se Ogomo Asharri base. 20Ngo ru eme geme se makirri ma buki, ‘Tego oteten owai woi ne, tego owo woi ne, tego wuza yekǝri ne, tego owe rreshaida yenporre ne, tego oyizi ashoye neng a yiwi ni.’”

21Nze ono me ma garre ma go, “Emma bura otarse makirri ma gina amin da vana.”

22Yeso kuna nane, nze ma gom me, “Eyabo vento yanu se ngo dere. Ngame ka rǝsǝ eme geme se ngo zen no zal oware ano dera agata, oya morra omorra o Ogomo Asharri. A bate ngo ra otarson.”

23Neng okona beleng begeme, nze biruwa abeme be charro dede, baka me ono morra ze dede.

24Ni se Yeso nǝrǝ biruwa abeme ba charro, nze ma go, “E yapu dede ano morra ma pete a togomo to Ogomo Asharri! 25Baka eya kera a birankome be pete a yiwo ye alabira, a ngo guna ano morra ma pete a togomo to Ogomo Asharri.”

26Ana geme se nga kuna beleng begemme nze nga go, “To inga nane ze avizi a morra obuza.”

27Yeso go, “Eme geme se ekirka ono, eta kirka Ogomo Asharri ni.”

28Nze Bitrus go, “To e gina woro na deke epegeme se woro zan no zal, woro na tarsoi.”

29Yeso ma garre ma gon nye, “Miya beze akanyi magangan, woi zemanu se maya dekǝ atitǝu, ne owoi, ne anawaname, ne ana shome, ne abiya baka togomo to Ogomo Asharri ni, 30se ma neng dera omorra to gogorro tugina chebete a masano magina. Magaya morra rroma ye egemese ezemeng bimaso ne.”

Yeso ma ga buki nane se maya wǝnǝ

(Mat 20.17-19; Mar 10.32-34)

31Nze Yeso wonki ane yemasanga rrome biturru neng repo ageme owulu vento, ma gon nye, “Egina se woro ya ngame a Urshalima, ayeme se zal to gogorro togome se to annabi nga darsa a tara me Vana Ono ya binja. 32A ya wǝtǝ akan ano ageme se dan tuYahudi toze ne, nga yizun, nga won epem me, nga shitin taye ayi pun. 33Nga ya sheta akan, nga kuri nga won, odara otaro miya wera neng rroma.”

34Nze ano yemasanga rrome nga ta ru biwo be beleng begeme se Yeso na buku ne. Ama pate bewo be beleng beme a nye, ezema ngona nga ta ru neng eme geme se maya bi mi ni.

Yeso ma ngona

oye uru a ngamo

(Mat 20.29-34; Mar 10.46-52)

35Ni se Yeso we voto neng Jariko, nze oye uru gina se maya chǝkǝnǝ a binu be orona maya wesa biruwa ano. 36Ni se ma kuna ano chabete adoko waka, nze ma sangarra ano yaya ze ara.

37Nze nga gon me, “Yeso o na Nazarat maze waka.”

38Nze ma nyiza emelo dede ma go, “Yeso! Vana Dauda! Kuna ogwengwene okon!”

39Anagemese nga ze a ji neng Yeso nga bokara a me, nga go guna go wete, nze ma vati puku rremilo dede, maya gusa, “Ngo Vana Dauda, kuna ogwengwene okon!”

40Nze Yeso tore, ma go a ran me a mi, ni se ma rai voto, Yeso sanngarra me. 41“Yaze ngo ya narra ita woi?”

Nze uru mi ma garre, ma go, “Ono saru, miya narra in morra niya ara.”

42Nze Yeso gom me, “Morra onǝrǝra ara! Onya ka biruwa boi na ngonai a ngamo.” 43Ayem me mawa dorra ma morra onǝrǝra ara, ma tarse Yeso, maya tongarra Ogomo Asharri, ni se ano zal nga nǝrǝ nane, nze nga dorra a tongarra Ogomo Asharri.