Luk 19 | JerSC | STEP | 12 Yeso ma pete a Jariko, maya waka ayimi ape me geme,

Luke 19

Yeso ma buza Zakka

1 12 Yeso ma pete a Jariko, maya waka ayimi ape me geme, 2 nze oye ono, ono sarru ano kasa ogandu, se a gosan me Zakka. Baka nane me ono morra ze dede. 3 Maze a narra unǝrǝ ne avize Yeso ogomme, nze mata morra unǝrǝ a me ne baka me mata bare asharri ni, baka ano na binja chebete. 4 Baka nane ze nze ma waka a ji neng toson, nze ma morra oye otiti osaru a kerro orona, nze ma nyanu ma chǝkǝnǝ, baka ma ni Yeso me, baka maya waka a regemme ze.

5 Ni se Yeso denye a rame, nze ma nyiza apana a me asharri ma gom me, “Zakka, shonno sasa o tu! Kane miya chǝkǝnǝ ogen ze a ngo atitǝu.” 6 Nze Zakka ma shonno matu, ma kame neng ezalla a ngame ama atitǝu.

7 Ni se ano nga ni eme geme se Yeso na wuna, nze nga bura ogogomozo, nga go, “Mana pete atitǝu ono masharra ze ganka!”

8 Nze Zakka ma wera ma tore ma gon Yeso, “Achakura, kuna kan, miya wara omorra okon ka repo in yete owulu vento inya ano tuyan, ono ogome se min mana ka eyabo ekeme orona oworo, miya kursa akame anu kanaze.”

9 Nze Yeso gom me, “Kane Ogomo Asharri na buza ana atitǝu gina, baka ngoma vana Ibirahim ze. 10 Baka Vana Ono ma ra ze a gangarri ana geme se nga na worro, ama buza nye.”

O nǝrǝ a tara
tomina beturru

(Mat 25.14-30)

11 Se nga ya kunaza epegeme se maya bi mi, Yeso ma me obi oye o nǝrǝ mi, baka mana ngona voto a pete a Urshalima, ma nya oye nǝrǝ a nga rru se ogona togomo to Ogomo Asharri toma wonko sasa ne. 12 Nze ma gon nye, “Ama zen woi o na kura togomo se mangame amayen nyanga tal, ano ogona maka morra a gatama rai ma wucu togomo tang nyanga me. 13 Nze ma tisa arere akame anka biturru, nze ma nya koyo ono vento irru se a gosan eme mina ^{▼▼Mina iru ze maze eme chebete ocha Yeso sakama epe egeme se ama nyiza osoja ne one etoma avara a tumuru rrinu.} bi vento, ma gon nye, ‘Chuwala tare neng no emoran eyabo ano se mina kuru.’

14 “Ama ano ape akame nga ma nya me ne, nze nga tome aye toma a ma marro a nga go, ‘Woro dan garre ono ogina ma woze togomo a tara akado ne.’

15 “Zal neng nane ama nya me togomo tome nze ma kuri, nze ma tome aka tisa arere akame zal ano ageme se ma nya nye iru, baka ama ru epegeme se nga na morra a tara irumi.

16 “Ono bura ra ma tore ma go, ‘Achakura mina shuwalaza tare na morra mina biturru a tara be vento se ngona nyan.’

17 “Nze achakura me gon me, ‘Orere, ngona ngona eme ngoma a tara eyabo bate, na nyai tope biturru owoza togomo anu.’

18 “Orere o repo ma rai, ma go, ‘Achakura, na morra mina shibi a tara ovento se ngoma nyan.’

19 “Achakura ma gon ono gome, ‘Ngo ya wuza togomo a tope shibi.’

20 “Nze woi ayimi arere ga rai, ma go, ‘Achakura, ka mina vento okoi, na gorkuza o mina a kajankale in we. 21 Baka emma kuna beye boi, baka ngo oye ono ze se ngo pu tuyan, ngo ono nǝrǝ oyita eme geme se ngo dan weyane, neng onarra koke iyabo se ngo dan birra ne.’

22 “Nze ma gom me, ‘Ngo orere uburu ze! Ya gwinta kai belen, a tara egemese ngona buku nang anu a kai. Ngo ru se mi ono pu tuyan toze, min yesa epegeme se min dan weyanne, min koke epegeme se dan min na birra ne. 23 Baka yaya ze ngo dan ngamen iru eken a banki ne, anu guna inga minkuru amin morra eyabo a tara me ne?’

24 “Nze ma gon ana geme se nga ze a torre arame, ‘Kane mina vento kome, a nya orere ono tomina biturru.’

25 “Nze nga gon me, ‘Achakura, ma zen tomina biturru.’

26 “Miya gosan nyi, ‘Zal ono gome se ma zen iyabo, a ya vati akame anu, ama ono gome se ma min no ne, ko ebate se ma zen no a ya kame a me. 27 Ano nyaminakan gaze, ana geme se nga ma barsa min wuza togomo a tara ka nye ne, ran nye emma a ji a wuza nye.’”

Yeso ma pete a Urshalima

(Mat 21.1-11; Mar 11.1-11; Yoh 12.12-19)

28 Ni se Yeso buku nane, nze ma gǝte nyi a ji angame a Urshalima. 29 Ma denye voto neng tugwiri to Betafaji neng Betani se taze osara owo se a gosan ome Owo Titi tuZaitun, nze ma toma anka repo ayimi ano yemasanga rrome, 30 ma gon nye, “Pete ne ogwiri gome e nyi a ji, neng opete okonyi, nyi ya ni kojake se woi dawa nyana nu ni atǝsǝ, ibuzi beme e ranno. 31 Inga woi sanngarra nyi, ‘Baka yaze nyi ya buzu beme?’ Egon me, ‘Achakura ya narra beme.’”

32 Baka nane ana geme se ana toma nye nga ngame, nze nga ka morra nane meze se Yeso na buka a nye. 33 Nze nye abuzu bejake beme, nze ano bejake beme gon nye, “Baka yaya ze nyi ya buzu beme?”

34 Nze nga go, “Achakura ze a narra beme.”

35 Nze nga ran beme a Yeso, nze nga lata tudiya tonye a tarra kojake kome, nze nga we Yeso a tarra me. 36 Maya yemi tano, nze ano dorra a lataza tudiya tonye orona.

37 Ni se ma we voto a pete a Urshalima adenye ara geme se oruna me tu asuru Owo Titi tuZaitun, nze zal ano yemasanga rrome ngaye ezalla, nga nyiza amelo a tongarra Ogomo Asharri, baka towoza to emo damara se nga ni.
38 “Nga ya gusa, ono sana ze ogomo ogome
se maya ra ayimi rriji ye Ogomo Asharri!”
“Eshammo iya chǝkǝnǝ a Asharri,
ano ya tongara Ogomo Asharri
se maze sun ayimi a sharri!”

39 Nze toye tuFarisi, se nga ya yimma ano me, nga gon me, “Achakura, bokara ano yemasanga rroi a nga maye!”

40 Nze ma garre ma go, “Miya gosan nyi, inga ana gina nga maye, azuwa gina a ya tongaran kan.”

Yeso ma rriwa baka Urshalima

41 Ni se ma ra voto, ma ni ape Urshalima, nze ma dorra rrewa neng maji. 42 Ma go, “Atingo kane gina nyi ru epegeme se iyara neng ochǝkǝnǝ shammo ita reze, e gina se nyi taruni segina iya gorkuza ze e nyi. 43 Ocha ya ra se ano nya me ne kǝ nyi, nga ya siya udǝrnu nga rrimmi nyi nan no, nga tuna nyi osuru a koyo owulu. 44 Nga ya wuza akanyi neng abiya ka nyi zal, nga ma deke yeye rrizuwa a tara yeye ne atogoro tumene, baka se nyi mata ru ocha ogome se Ogomo Asharri ma rai a buza kǝ nyi ne.”

Yeso mamara Atitǝu Ogomo Asharri

(Mat 21.12-17; Mar 11.15-19; Yoh 2.13-22)

45 Nze Yeso ma pete Atitǝu Awo Ogomo Asharri, nze ma me onǝra ano rǝse to gogorro tome. 46 Maya gosan nye, “Ama darse a belen be Ogomo Asharri, ‘Atitǝu wa akan a ya chǝkǝnǝ atitǝu beroromo ze,’ ama segina nyi na ngona a me aro gorkono awa kǝri.”

47 Nze ma sure egem me maya deko yemasanga ayimi Atitǝu Awo Ogomo Asharri, nze ana sasaru a tupiris neng ano masano makirri ma Musa neng ana sasaru owa ano me, nze ngame ugangarǝ urna woname. 48 Ama nga dere orona ogome se nga ya wuna me, baka se ano zal nga ze a rakara a me baka nga kuna olo belen nga bome nga ta barsa belen be vento babume be waka nye ne.