Luke 20

Ama sangara Yeso a tara a gata me

(Mat 21.23-27; Mar 11.27-33)

1Oye dara Yeso ma pete Atitǝu Awo Ogomo Asharri maya yimasanga, maya bezeze ano beleng be lo kuna, nze ana sasaru a tupiris neng ano yimasanga makirri ma Musa a gora neng ana sisaru awano nga ra wa me. 2Nze nga gon me, “Bezedo avizi na nyai a gata ageme se ngo wuzaza togogoro togena nan no?”

3Nze Yeso ma garre ma gon nye, “Min gaza sagarra ka nyi, beye beleng. Bezenne, 4obaptisima se Yohana wuza ano avizi ma nya me a gata me, Ogomo Asharri ze ne ono ze?”

5Nze nga bi a nye a topana nga go, “Inga woro go, ‘Ogomo Asharri ze oma nya me a gata me,’ maya guna, ‘Baka yaya ze nyi mata garra neng me ne?’ 6Inga woro go, ono zen a nya me a gata gina, ana chebete gina ya wuza kado neng azuwa, baka nga garra guna Yohana annabi zi.”

7Nze nga gara nga gon me, “Woro ta ru ono geme se ma nya Yohana a gata me ne.”

8Nze Yeso gon nye, “Mim ma beza ka nye, ne a gata ayu zi miya wuza to gogorro tugina tome neng no ne.”

O nǝrǝ a tara ana geme se ana deke uja a nye a tare

(Mat 21.33-46; Mar 12.1-12)

9Nze Yeso ma nya oye o nǝrǝ mi ma go. “Ama na morra oyo ono se ma zen uja owo inabi, nze ma nyan an ngai ana vara, a me ma ngame a maye in anyanga, nze maka dakano a gemme. 10Ni se ocha owo worso to gogorro toja to rai, nze ma toma oye orere kome ama ngame ana geme se nga ka a rame, ama kaka iburi otiti inabi ageme se aze binu babun, ama nze nga tǝrrǝ mi nga kursimi tare tu wǝ. 11Nze ono jamme ma ga toma oye orere me gaze, nze anetuma me gaze nga ga tǝrrǝ mi, nze anetuma me nga tarrume dede nya me emme, nze nga kursimi tare tu wǝ. 12Nze ono jamme ma ga toma oye orere owo taro, me gaze nga ga tǝrrǝ mi nga pilame nga vangǝlimi a maro odarnu.

13“Nze ono ja inabi me ma go, ‘Segina yaze emo ngona? Ya toma vano okon se maza base mi simin barsa, ayimi nga nan nǝrǝ isansang bitini babume!’

14“Ni se ano wankǝli uja me ni mi, nze nga go a nye a topana, ‘Ni ono kawa me, a wo me, a binu babume bi chǝkǝnǝ babodo.’ 15Nze nga surun me amarro uja o inabi nze nga wome.

“Oniyo ko nye yaya ze ono ja inabi maya wuna ane toma me? 16Maya ra ma wuza ano wankǝli uja inabi me ama nya an ngai owankǝli uja inabi me.”

Ni se ana geme se nga ya rame kuna nane, “Tego Ogomo Asharri deke awe nane ne!” 17Nze Yeso nǝrǝ nye ma go, “In nya ze bewo be beleng begina ayimi beleng ba Ogomo Asharri?
“‘Izuwa ye geme se ano se ya ogora nga ma nya me ne,
ye ze ezuwa egem me se ema mantǝ atitǝu me!’

18“Zal ono ogeme se ma rezi a tara izuwa, maya pusu, inga izuwayeme ye ze ye gara ono yiya wara kame ma we enbeni.”

Bi sangarra a tara o nyiza ogandu a Kaisar

(Mat 22.15-22; Mar 12.13-17)

19A yinaze ano yimasanga makirri ma Musa, neng ana sasaru a tupiris nga narra ome Yeso. Baka nga ru se maya bi o nǝrǝ beleng biginna a nye a topana ze. Ama nga ta memene baka nga ya beye ba ano.

20Zal nan nane nga we a ji a me, nze nga tome an ngai a nga we sakama ana ngoma, ano ngona, ma buki eyabo a meme masharra aka buku ogomo Roma ma wuna a meme. 21Ano me nga sangarra Yeso, nga go, “Achakura, woro ru se beleng nga boi neng yemasanga rroi maganga maze, ngo ta kuna beye be woi ne, ngo wuza yemasanga orona owo Ogomo Asharri ayimi magangan. 22Unǝrǝ koi erreze ogona Kaisar kai ogandu a woro ne aye?”

23Yeso ma ru eme geme se eya nye erowa, nze ma gon nye, 24“Nyan ne odinari. In minu ne neng, rriji ya avizi a tara me?”

25Nze nga garra nga go “Ye Kaisar ye ze.”

Nze ma gon nye Inga nane ze, “A nyi nya Kaisar eme geme se e ze e Kaisar, e nya Ogomo Asharri eme geme se e ze ewo Ogomo Asharri.”

26Nze nga ta morra epegeme se nga ya miya kame nan no aja no ne, baka mana gara derte. Nga go wete neng oga rome emo damara maza nye.

Bi sangarra a tara

ana geme se nga wiju

nga ya wera

(Mat 22.23-33; Mar 12.18-27)

27Nze toye tuSaduki nga rai, ana geme se nga gusa iyabo zema nu sakama ano wiju nga werse ne, nga sanngarra Yeso nga go. 28“Achakura, Musa ma darsa do ma go, ‘Inga owanomo ono wi, ma deke owai da abiya ne, nze owanome wuza a nya owai me da ma morra owano me abiya.’ 29An ngai maze ano nye sunare, rreno anarrome zal, ono bura ma woze a nya owai, ma wi da abiya ne. 30Ono repo ma ga wuza a nya owai me mara ma wi da abiya ne. 31Ono taro ma ga wuza a nya owai me mara ma wi da abiya ne. Nane me ze anka sunarre nga wiju da abiya ne. 32A bimason owai me ma ga wi. 33To nze segina owera ano weju, owai me ya chǝkǝnǝ owai avizi a nye? Baka zal anka sunareme nga wuza a nya me.”

34Yeso gon nye, “A masano magina, anarrome ya wuzaza a nya, a ya nyiza awai a rra nya. 35Ana geme se Ogomo Asharri na nerǝ, nga denye guna mata wersaza nye ayima ano weju, a nga pete a regeme se maya togomo a yima Asharri, nga ze ma wuza a nya ne. 36Baka nga ma ga kurro nga ga wǝnǝ ne, baka se nga chǝkǝnǝ sakama a toma Ogomo Asharri. Nga na chǝkǝnǝ abiya awo Ogomo Asharri baka se nga na werra a surro ano weju. 37A tara ano wiju se nga werse za se nyi ma sangara a tara me, Musa mata pate iyabo ne, ayimi belen bo Ogomo Asharri se ma darsa a tara epe otiti obate onan ogome se orra ya wucu me. Musa ma tisa Achakura, ‘Ogomo Asharri owa Ibirahim, Ogomo Asharri owa Ishaku, Ogomo Asharri owa Yakub.’ 38Me dan Ogomo Asharri owa no weju ne, Ogomo Asharri owa ana geme se nga zen rroma ze. Baka ano zal dan rroma zal baka oko meze.”

39Nze an ngai ano masano makirri ma Musa se nga maze atore ayemme nze nga gom me, “Achakura, ngona buku derte.” 40Nze tuSaduki tu ta ga barre to sangara me iyabo ne.

Bi sangarra a tara Kiristi

(Mat 22.41-46; Mar 12.35-37)

41Yeso ma sangara nye ma go, “In ni ze a ya gunan Kiristi vana Dauda ze? 42Dauda neng apana kame ma go ayimi Zabura,
“‘Achakura ma go a Achakura okon,
“Chǝkǝnǝ imi owulu oware belai.
43Miya wuna ano nya me na kai,
a nyanga a ngo kaya nye.”’

44“Dauda ma go neng Almasihu, ‘Achakura.’ To, in ni zi a ya gusa nan me vana Dauda?”

Yeso mawunki ano yemasanga ye makirri

ma Musa totenye

(Mat 23.1-36; Mar 12.38-40; Luk 11.37-54)

45Ocha ogome se ano maza a rakara me, Nze Yeso ma gon ano yemasanga rrome, 46“Kane shauwo neng ano masano makirri ma Musa, nye ano narra awo soi tudi tosasarro nga ya wasa, ano narra oko ayimo ukasuwa, ano narra chǝkǝnǝ atura tuchǝkǝnǝ to ana sasarro togura to beroromo, neng torra chǝkǝnǝ to ana sasarro aro buki. 47Nga ze ano wucu to gogorro tawai ageme se ana rroma ka nye na wiju, nze a wuza beroromo be lantan doguna a ni nyi, ai nga ya kuna kwaiye dede.”