Luke 24

Yeso ma wera esau

(Mat 28.1-10; Mar 16.1-8; Yoh 20.1-10)

1Ama suru odara ovenke nze ara sane neng usunzu pimpim, awai me nga ngame esau meneng tukwakwa tu onya olo se nga mamarra. 2Nze nga morra ana tipi rrizuwa aranu esau me. 3Nga pete ayim mi nga ta nǝri rripung ye Achakura Yeso ne. 4Nye atore adodonzo ageme, nze An ka repo gina atore voto neng nye, nga zen tudi tomalmal turun pouwo dede. 5Neng beye, awai me nga tǝngǝ topana anyanga. Ama ano me gonnye, “Baka yaya ze nyi ya gangarrǝ ono rroma ara in sau? 6Maze ma nu ni, mana wera esau. Donza neng epegeme se ma beze nyi ama da a nyanga ma Galili. 7Ma go, ‘Nane ze a ya nya Vano Ono a tare tano masharra, a gapa me, a dara otaro a ya werse za me.’” 8Nze awai me nga donza neng beleng ngabu me.

9Se nga kuru asuru esau me, nze nga buku ano biturrun ono vento a ane yemasanga rrome neng odagara ano zal nze nga biya nye togogoro togome se ana kuna nga na ni. 10Awaya geme se nga beze ane yemasanga ye Yeso epegeme se ana wuza, nga ze, Maryamu asuru a Magadala, neng Yowana, neng Maryamu ayun Yakubu, neng aye awai se nga zen nye. 11An toma me nga yete beleng ba awaya geme sakama beze min apana ne. Baka nanezen nga mata wuna beleng beme erowa ne. 12Ama Bitrus wera! Ma ngame esau meneng toson. Matǝnganǝ, magǝkǝnǝ ayim mi, ma ni bitu beme a kerro. Nze ma kuru atitǝu neng emo damara a tara eme geme se mana nǝrǝ.

Yeso ma wonko An ka repo

(Mar 16.12-13)

13A dara vento ogomme, An ka repo ayimi ano tarse Yeso nye atano a ngame akaye kagwiri se a gosan kame Imawus. Asuru a Urshalima a nga ma Imawus tomel sunare ze. 14Nye ayimi tano a bi beleng a nye a topana a tara togogorro tugumese ta wonko. 15Nye ayimi beleng, nze Yeso ma ra ma morra nye nze nga gora tano. 16Nze Ogomo Asharri pate nye a ji tego nga ru mi ni.

17Nze ma sangarra nye ma gon, “Ya yedano ye ze nyi zanu a nyi a topana, atano?”

Nze nga dorra nga tore ti, neng ocharo apuru. 18Ano vento ayima akanye, se a gosan me Kiliyobas magarre ma go, “Ngo ogen ze a Urshalima, se ngo ta ru eme geme se ya nga na a nyanga ayimi asero seginna ne?”

19Nze ma sangarra nye ma go, “Ya togogorro toze?”

Nze nga gom me, “To gogorro togeme se ta morra Yeso a Nazarat. Me annabi ze ma nye a gata ama woze emo damara ano zal. 20Ana sasaru a tupiris neng aye ana sasaru akado nga wǝtǝ mi a ogomo Roma a ma gwinta me beleng nga wome akura a gapa me ama wi. 21Embasa woro mawesa biruwa maze maya buza Isaraila! Egina, dan e gina ze basa ne kane tumuru tutaro gina se emegena ma wonko. 22Ban nanne aye wai se nga zen woro nga ngame esau meneng usunzu oginna nga ka kuru neng beleng be emo damara. 23Nga go nga dan morra ekeze me ayimi esau me ne. Ama nga na ni atoma awo Ogomo Asharri ana geme se nga na ngo nan nye Yeso dan rroma. 24Aye anarrome ayima kado nga ngame esau me nga morra epe gemme nane me se awai me ma buki, nye ma nga mata nǝrǝ Yeso ne.”

25Nze Yeso gunan nye, “Nyi alakere, nyi ta ngamo garran neng eme geme se to annabi nga buki ne! 26Se Kiristi na kuna ma kwaiye magina kamo guna, a nya me togomo tome?” 27Nze ma bezeze nye zal eme geme se beleng be Ogomo Asharri ba buki a tara me, asuru ayemasanga ye Musa arawa to takarda to annabi zal.

28Ocho ogome se nga ngona voton ogwiri ogome se nga ya ngame ano, nze Yeso ngona ogo maya waka, 29nze nga lantara atu kusu nga gom me, “Chǝkǝnǝ neng woro uwarru na ngona odara gina na gǝti.” Nze Yeso tarse nye ma ngame a nye atitǝu maka chǝkǝnǝ neng nye.

30Se nga chǝkǝnǝ nga ya nǝrǝ wucu emo wucu, nze ma yete yeborode ma gon Ogomo Asharri kokan, ma pose ma nya nye. 31Ayemme nze a ji akanye apuku, nze nga ru mi. Nze ma melmo a nye. 32Nze nga gon topana tonye, “Erowa na runtu do se manana a bi beleng neng woro orona abezeze akado beleng be Ogomo Asharri?”

33Nze nga dorra nga wera ocha ogomme nga kuru ape a Urshalima. Nze nga ka morra a toma Yeso anka biturrun ono vento neng an ngai ara vento, 34nga ya gusa, “Ai, gangan ze Yeso na wera. Managa wonko a Bitrus.” 35An ka repo gemme, nga bi a toma anka biturrun neng ono vento, neng ana geme se nga teze ara vento neng nye. Nga bi epegeme se eta morra nye orona, nan nane se nga turu se Yeso ze, ocha ogome se matu ze aposa aborode.

Etoma egem me se Yeso

ma nya ane yemasanga rrome

(Mat 28.16-20; Mar 16.14-18; Yoh 20.19-23; Tuw 1.6-8)

36Nga da a tara beleng beme nze nga ni Yeso atore azata akanye, nze ma gon nye, “Eshammo Ogomo Asharri chǝkǝnǝ nyi!”

37Nze nga ma kera dede nga ya gusa ononoi ze nga na nǝrǝ. 38Nze ma gon nye, “Baka yaya ze nye na kerkene, nyi ya damozo e nyi erowa? 39Nǝrǝ ni tare ton neng atawa akan ai mizi neng apana akan. Dorron ne e kone, baka ononoi mazemen binama ne neng sewune, nane se nyi na ni mizan no.”

40Ni se ma buki nane, nze ma woko nye tare tome neng atau wa me. 41Nye ayimi damozo baka uruntapuru neng emo damara, nze ma gon nye, “Nyi zen emo wucu a yi na?” 42Nze nga nya me ko binbin bate keke ko biginu, se ana pusu, 43nze ma kai ma wucu a nye a nǝrǝ me.

44Nze ma gon nye, “To gogorro tugina toze min ma buki e nyi, amin da nan nyi, neng ogona a ya binja eme geme se ama bi a tara akan ayimi yemasanga ye Musa, neng tutakarda to annabi neng Zabura.”

45Nze ma puki nye biruwa anu guna nga rru bewo be beleng be Ogomo Asharri. 46Nze ma kure ma gon nye, “Na nem meze abuki a Kiristi ago maya kuna kwaiye, a daro otaro maya wera ayima esau. 47A yimi rrijarron a ya bizeza ano masano odeke masharra neng oviski esharra. A ya bura me a ape a Urshalima. 48Nyi ma nǝrǝ espegina meneng tuji ta tonyi, nyizi ya bukumi an ngai epegeme se nyi ma nǝrǝ neng tuji tonyi. 49Egina miya Toma kǝ nyi neng eme geme se Ashuwo ma go maya toma kǝ nyi neng no. Ama da denta ne ayima ape, se ana nya nyi a gata a suru Asharri.”

Ana yete Yeso

angame Asharri

(Mat 16.19-20; Tuw 1.9-11)

50Nze ma surun nye a ngame ama ra ape aka denye a Betani. Ayem me ma nyiza tare Asharri ma vati nye taye. 51Maze ayimi uvati akanye taye geme, nze ma warna neng nye, nze azǝkǝmi a ngame Asharri. 52Nze nye nga girwǝnǝ me a anyanga, nga kuru ape a Urshalima neng uruntǝ puru chebete. 53Koyo odara nga ya ayimi Atitǝu Awo Ogomo Asharri nga ya tongara Ogomo Asharri.