Luke 11:37-54

Yeso ma puku tupuru tuFarisi neng

ano yemasanga ye makirri

(Mat 23.1-36; Mar 12.38-40)

37Nze Yeso ayimi bellen, nze oye oFarisi ma tisa Yeso ama atitǝu, anu guna nga wuci emo wucu. Nze Yeso ngame baka nga wuci eyabo wuchume. 38Nze oFarisi ma nǝrǝ se Yeso mata zurro oware ne kamung nga wuci eyabo wucu mi ni, nze okerkene meme.

39Asharri gon me, “Nyi tuFarisi nyi kwizuzu amarro mpoto neng eso, ama ayema ka nyi, nyi ya binja neng everra neng everra neng ayabebo. 40A lakerra kǝwǝi, dan Asharri ageme se ma wei a kai, dan mazema wei ayim mi ni? 41Atongo nyi ya nya ano tuyan epegeme se nyi zan no, ko yayya ekinyi eta chǝkǝnǝ da madini.

42“Nyi neng narrǝ, nyi tuFarisi! Nye nyiza Ogomo Asharri uzaka zal neng togorro to oyaje otunango neng odangara tunango tu obi zal. Nze nye na nya me ne owoza magagan neng tubarsa togomo ta Asharri. Epegeme se e ze nyi ta wuza geme, dan neng odeke udangaran me ne.

43“Nyi neng narrǝ, tuFarisi nye narra guna ata nya nyi, tora tuchǝkǝnǝ tusasaru togura to beroromo, a kuru agirwanǝ abeze nyi okowu ukasuwa.

44“Nyi neng narrǝ, nye yankǝnǝ in sau ma geme se mamang eyabo a tara me ne se ano ya nga na nu bo nane, nga ta ru epegeme se nga ya kayanu ne.”

45Nze ono vento ayimi ano masano makirri ma Musa ma gon Yeso, “Achakura, inga ngogo nane, ai, woro ma ngona tinza do.”

46Yeso garra, ma gon nye, “Nyi neng narrǝ nye ano masano makirri ma Musa nye na binja ano otirra makirri odendeng a nga zakǝ, ama nye neng topana tonye, ko nan rrebo nye ta dorre ne anu guna nye malanye ne.

47“Nyi neng narrǝ, nyino se ya in sau ma rezeze ma to annabi ana geme se tunongona tonye Toma wuza. 48Nyi nan topana tonye, nyi mama buki, nyi kuru nyi garra epegeme se tunongo tonye Toma wuza ano bezeze taye to Ogomo Asharri, nyi ga siya in sau ma me. 49Emeze se rremo ye Ogomo Asharri yemago, ‘Ya Toma ka nye to annabi neng ano yetuma. Nga ya wuzan an ngai ayima akanyi, nga nyan an ngai uwahala.’ 50Baka nane a ya wucu ano zamano gina tomono, baka nga wuza a to annabi zal, sunnga suru obura masano, 51tuna surre owona Habila, arawa Zakariya, ono gome se ama wuna a garwa obagadi ohadaya neng ara a sansang ayimi akura sarru. A miya gosan nye, a ya wucu ano ozamane gina tomono, baka epe gemme zal!

52“Nyi neng narrǝ, ano masano makirri ma Musa, nye na pate ogora uru eyabo, nye nan topana tonye nyi dan pete ne, nye dan deke ana geme se nga ya narro pete, nga pete ne.”

53Ni se Yeso deke ayemme ayem me, nze ano masano makirri ma Musa, neng tuFarisi nze ngamo mantarra neng me, nga ya rraza me neng bi sangarra me togorro chebete, 54nga ya gatama a nga na me rremo ama buku eme geme se e ze me derte ne.
Copyright information for JerSC