1 Corinthians 11

Shik ban a mud ba zub mud

1Bil la gǝr ma mi pak, wa ma ɓil gǝr ma Kristi pak ka. 2Ba kaak wun, nakunla wun ba ki rangas ban na mi a ɓaal koyab gǝr, ma wun ba ki bil gǝr ma shik wun nga shangmi. Wun ki pak wama shikka ɓi wun. 3Marak mi, mi yat ti wun dilla mud koyab munabud Kristi na, mud koyab muna maam biɗi na, mud Kristi Koǝl la. 4Koyab munabud ma kamaam Koǝl, ko i shap kun la Koǝl na muɗi ma zuɓun, i kyamas ma muɗi na ma. 5Koyab maam na kammaam Koǝl, ko i shap kun la Koǝl, yi sǝn zub muɗi ɓera, i kyamas ma muɗi na ma, wa ya mwan mudti. 6Muna maam ma ye zub muɗi ɓera, ɓi mwa muɗi; na gǝr nzun na ɓi mwa muɗi she ɓi zub muɗi. 7Sǝn bwad ti bud zup muɗi ɓera, nakunla, yi na kam pur yid na gul la Koǝl. Maam kwad yi kam gul la bud. 8Muna bud sǝn pur a yid maam ɓera, maam na pur a yid mun na bud. 9Koǝl sǝn pak bud nakunla maam ɓera, maam na i pi’i nakunla muna bud. 10Nakunla wamya, nu’um langlang na ɓi maam zub mudya, mi ɓi kǝman na, ɓi maam ya tak kap mun ma bud. lakunla muntum ɓal Koǝl. ɓi maam zup muɗi ɓi kam gulla biɗi gha. 11A ban Koǝl, mu na bud ya gǝb ɓal ya na maam na ɓera, maam ya gǝb ɓal ya na mu na bud tǝra. 12Wama ya pak maam nga a ɓal bud, wa mya na maam ɓi ɓil bud ka. Koyab gǝr a ban Koǝl la. 13Rang ɓi muɗu, buɗan ɓi maam kam Koǝl na muɗi wurassa? 14Wama Koǝl pak su gha, gǝr nzun na ɓi mu na bud nuk na nywang ma bwalan a muɗi. 15Na muna maam ma nywang muɗi ɓwalan, ba kum gul na bi ni, maam ma Koǝl pak nywang ma ɓwalan ɗi, lakunla ɓi nywang ma zup mud ka ɓi. 16Na ɓomaan gha ɓal wun ma yi shak kid na kun ma mi’mi, Bwaɗan na ɓi daal na su, su gha na gǝr ma su pak ma nga’al wa mya ɓera. Ti’is ban raam la ɓa bil Kristi wa mya na.

Tangas kid a mud ban li gǝrlin la Matadla

17Nakunla kun ma mi shappi wun na ma ɗarak mi, mi gha kaak ɓi wun ɗira, ba raam lawun sǝn yuna gǝrma bwaɗan ɗi wun ɗira. 18Gang dumi, Nwak na wun na raam ma, mud wun gǝɓǝn, nya’am tak ti’is gǝr ɓa miin na. 19Nu’um na lang - lang bya kum wamya a nzwak wun, na kunla ɓi ya kum ba dil ɓoɓa kaan a ɓaal wun. 20Ashe wun na raam ma, ba gǝrlin la Matadla la wun li ɓera, 21wun na ba li, koyab ɓo ɓi li gǝrlin li, ye yal tak nyimi ɓera. ɓomaan nzal walam yi, ɓomaan ju’an har gǝrlin waalam yi. 22Wun gha na la, ma wun li wun nu a bana ɓera? ko wun kimassa raam la ɓoɓa bil Matadla, ko wun pak bung ɓi ɓoɓa ya gha na gǝrmaan ɗira? Mi shappi wun na mani? A kak bi wun no? mya kak ɓera.

Ba li gǝrlin la Matadla

23Gǝr ma nyak ban Matadla na pabi wun: Matadla Yesu, a duk ma a pi gha, i dab burodi, 24ma i kaak, i bwun i shap na,“Yida nami, ma mi pabi wun, ki pakna wuna ɓi wun kum ki rangas sa bǝna gha.” 25Wamya kwad, takwad ya lim gǝrlin i dap kwar gǝrma nun, ina,“kwar maami la pip kun na a ɓaal kil la; ki pak na wina, wunna ba nu, ɓi wun ki rangas bǝna gha.” 26Mǝsma wunna ban shak burodi mi, na ba nu ɓal kwarmi, wun ba shap kun ba wu la Matadla tuban ba kad li. 27Nakunla wa mya, ɓoma sha’am burodi mi, ko i num a bal kwar mi, a njar ma bwaɗan na ɓera, yi sǝn pak tǝktǝk ɓi yid na kil Kristi ɓera. 28Ɓi koyab ɓo rangas ɓa li, kasa i shak burodi ko i nu ɓal kwar miya. 29Ɓo ma sha’am ko i num i sǝn dil ba nuk la yid Matadla ɓera, i tangas ma nzu ɓi muɗi. 30Wa mya kwad, ɓoɓa bilin a ɓal wun yi sǝn shiin ɗira, ti’is ɓaan ya gha na ɓǝs sira. ɓobaan nwangam tulu, ya wum na ma. 31Suna pya’asma mudsu kasa su li, Koǝl gha rang nzu ɓi su ɓera. 32Na Matadla na rang nzu ɓisu, nakunla ɓya gi rang nzu gha ɓisu na munnza ɓera. 33Nakunla wa mi ya, ɓi nyima, wun na raam ma ba li, ki yala tak biib wun. 34Nzal la ba wal ɓomaan, ɓi li gǝr a lah, nakunla ɓi ba raam la wun gi yu na nzu ɓi wun ɓera. Mina nyum, ti’is gǝr ɓya mi n a nyum ki mi shappi wun.