1Cor 16 | JgkSC | STEP | Tutumi, a mut germa wun ram lakunla ban ya’an ɓoɓa la Koǝl.Neˈem langlang ɓi wun pak wama shapka ɓiɓi ikilisiya ɓa Galatiya ɓe pakka.

1 Corinthians 16

Ban yaˈan ɓo ɓa la Koǝl

1 Tutumi, a mut germa wun ram lakunla ban ya’an ɓoɓa la Koǝl.Neˈem langlang ɓi wun pak wama shapka ɓiɓi ikilisiya ɓa Galatiya ɓe pakka. 2 I lib duk ma mwak ma koyab duk ma kyastad, koyab ɓo i ɓal wun ɓi ki shik mun wurub i ɓal germa yiki pad, iki shik ba she mina yum, kasa kiwun ram ɓa. 3 Lakunla, mila tumban she pa nggub ma kam ya bɨ ɓoɓa wun yak takya ɓe saan germa wun ramma i Urushalima. 4 La bwaɗam na ɓi mima ɓa mɓer she pangat kwa’at la ya.

Ger ɓa a yad i ban ka kus

5 Mila koma ɓal Makidoniya, mi yuna ban wun: Lakunla mi purna ɓal Makidoniya. 6 Sǝn wa mi jing nwangan la wun gap, she ɓeng la na malam, nakunla ɓi wun yaˈana pyeng bana mi ɓerra. 7 Sǝn yadta ɓil ban wun sen wun ki ghar twaɗak ɓa; mi yadta wal mun ɗukɓan la wun, ma matadla la ya’am. 8 Ama mi jamna i Afisa ɓi sa lib Pentekos. 9 Lakunla Koǝl tam ngala njer ma pak shangan gaan shangmi i bini, ko ma ɓiɓǝn ɓo gwak ka bana. 10 Ma Timoti la yum, yak na yi na ɓuk rwab, lakunla gaan la Koǝl la yi ki pak, wama mi pak ka. 11 Nakunla wa, gin kyamas sa yi ɓa, mak na yi ɓi yu bana jedjed, nakunla mi gha sǝn njer ban yu li na ɓi nyam su. 12 Tutumi i mud nyumsu Apollos: Kamam yi shangmi ɓi sa ban wun la ɓi nyumsu. I sǝn yad ban kaa tutumi ɓa. Ama yi kaa ra ma yila paɗam njer.

Malas kun

13 Nǝk na na shiri lawun, njam na na shiini a ban mak ɓal lawun, nǝk na na shiina ɓal, na shiini. 14 A ɓaal gǝrma wun pak, pak ni na yad mamiin. 15 Wun dalma ɓi nyama na, lala Istifanus la ɓwal ban mak ɓalya i mut Yeso i nzaal Akaya, ya la mak mudya shangni i ban pa nyappi ɓoɓa la Koǝl. 16 Mi kam wun ɓi wun bil ɓel ɓoɓi la pyang ɓoɓa panngat mutya i ɓal gaan la Koǝl, la ban bung ma bali. 17 Ɓaala pup ma shangni na ban yu la Istifanus, Fartunatus la Akaikus, gǝrma nu’um ɓa wa ɗaat la wun na yu bana. 18 Nakunla a pup ma ɓaal la, kap na la wun, ɓel ɓoɓa ɓwaɗan ɓe pa gul le. 19 Ɓi Ikilisiya ɓa mbyat Asiya ya ban lak wun. Akila la Biriskila na Ikilisiya ɓa ya ki ram a la li, ya ban lak wun shangmi i ɓal lwak Matadla. 20 Pyang ɓi nyumsu i bini ya lak wun. Lak na bibwun wun ki mak kun wun a tak kid bibwun a ɓaal yad mamiin ma rangan. 21 Mi, Bulus sa la nywangal lak mi ɓi wun la ɓwa’a. 22 Pyang ɓoma yi yed Matadla ɓa, ɓi Koǝl kan kunɗi. Yuu, Matadla. 23 Gǝr ɓa ɓwaɗan la Matadla Yeso ɓe nǝk la wun. 24 Ɓi yad ma miin ma me gha na yi ɓi nǝk na wun ɗaat a ɓaal Matadla Kristi Yeso. Amin.