1Cor 2 | JgkSC | STEP | Ɓi nyama, a mǝs ma yu la kun la Koǝl li wun ma swaram na, sǝn yu la ban daal kun ma shaɓan ko sak la ɓo ɓa.

1 Corinthians 2

Shap i mud Kristi ma a pang a mud nggun

1 Ɓi nyama, a mǝs ma yu la kun la Koǝl li wun ma swaram na, sǝn yu la ban daal kun ma shaɓan ko sak la ɓo ɓa. 2 Lakunla kud ma ɓaala ki suma i ban wun na, mi gha shap kun ɗi wun i mud kun maan ɗa she Yeso Kristi, mi ngaal ba shap kun a mud ban pangi mud nggun. 3 Ma yu i ban wun, mi gha la shiin ɗa, yaɗa ki ɓil la wup. 4 Kun laa lakunla Koǝl ma shap pi wun, sǝn pak gaan la sak la ban kyam mud ti wun ɗa, ama sheem nyap la Wuus la Koǝl ɓi pak gaan li, i ban shik kun li la ban shap bwaɗan kun li. 5 Lakunla ɓi ban yak kun maamiin la wun gan gus i mud sak la ɓo ɓa, ama i mud nyap la Koǝl.

Sak ma pur i ban Koǝl

6 Pyang la wa, suki shap kun sak ɓi ɓoɓa gul a ban yak kun maamiin. Mimi ba ɓyal sak la ɓoɓa munnza mi na ɓa. Ba ban sak la ɓoɓa nwang rangan ma ɓaal munnza mi ma yi ɓwaran ɗa. 7 Su shap sak ma swaramna ma pur i ban Koǝl, yi ɓak swaramna munmun. Ma mimi na sak ma Koǝl kuɗi shik yin koko, kasa ban pang munnza. 8 Ko mwak, i ɓaal ɓoɓa nwang rangan ma munnza mi sǝn pwan ɓaal sak mi ɓa, kana ya daal ma, a ka sǝn pang Matadla ma la gul li a mud nggun ɗa. 9 Ama wama a nywangal gha na,
“Gǝr ma Koǝl kudti pak ɓi ɓoɓa a yiɗi,
ɓǝsǝn ɓo sǝn ki sǝn ɗa,
ɓo man sǝn ki wak ɓa,
ɓo man sǝn ki rangas sa na ya paan gǝrman wana ɓa.”

10 Ama Koǝl shi’in su la gǝrɓi i kab ban Wuus li. Lakunla Wuus li ɓi tumun koman i mud koyab gǝr, la gǝrɓa la Koǝl ɓa swaram na ma ki su daal la. 11 Yana gamban daal gǝr ma ɓaal ɓomaan, she wuus la ɓoma ma ɓaal yiɗi? Wama kwad, ɓomaan na gamban daal gǝr ma Koǝl ɓi rangas sa she Wuus li ngalang. 12 Ama su sun yak wuus la munnza mi ɓa, lakunla su yak Wuus ma puri ban Koǝl. Ɓi su daal gǝrma Koǝl pa ɓi su na ɓal pupna. 13 Su shap kun ɓi ɓiwun, su sun pak gaan la sak la ɓǝsǝn ɓo ma a shik ban nga ɓa, ama su shap kun ɓa Wuus la Koǝl shik su gha. Su shap kun ɓa miin ma ɓaal Wuus la Koǝl ɓi ɓo ɓa ya ɓaal Wuus. 14 Ama ɓoma yi gha la Wuus, yi gha yak gǝrɓa pur i ban Wuus la Koǝl la, lakunla i bǝni kap nggwar na, yi gha gamban pwan ɓaal ya ɓa lakunla i ban Wuus la ɓo ki pwan ɓaal li gha. 15 Ɓoma Wuus la ki bil la yi kwad, yi ki rangan nzu ɓi ko man, ama ɓoman nga rang nzu ɓi ɓa.
16 Wama nggup ma shap ka, “Ya la daal gǝrma Koǝl ɓi rangas
har ɓi yi’ili gha?”

Ama ban rangas kun la su la Kristi na.