1Cor 3 | JgkSC | STEP | Ɓi nyama, sǝn gamban shap kun ɗi wun wa ɓoɓa Wuus la ki bil la ya ɓa. I karkun wa, shaɓan kun ɗi wun wa ɓoɓa munnza na, wa ɓoɓa mbasak mun na i baal Kristi.

1 Corinthians 3

Boɓa pak gaan la Koǝl

1 Ɓi nyama, sǝn gamban shap kun ɗi wun wa ɓoɓa Wuus la ki bil la ya ɓa. I karkun wa, shaɓan kun ɗi wun wa ɓoɓa munnza na, wa ɓoɓa mbasak mun na i baal Kristi. 2 Paam yam kiɓǝr ri wun kyam, sun pa gǝrliin ma shiin na ɓa, lakunla, wun sǝn pak ma gamban li gǝrliin ma shiina ɓa. Tuban i tutumi, wun sun gamban li ɓa. 3 Na kula gǝrma wun pak na maɗarakmi, gaan la yid na. Lakunla buk la shak kid ka i nzwak wun. Ma buk na shak kid ka nzwak wun mi, kamaam na wun pak gaan yid, wun sun kalat tara, wun pak gǝrma ɓi ɓo ɓi pak. 4 I mud na, ɓomaan la shaɓam na, “Mi bil Bulus,” Maan kwad she i shap na, “Mi bil Apolos,” Mi sun kam na ba gaan la yid na wun pak ɓara?

5 Ya na Apolos? Ya na Bulus? Ba su ɓoɓa pak gaan la Koǝl la ɓara? Koyab ɓo pak gaan ma Koǝl mak ɓi pak. 6 Ɓyalam ɓyal, Apolos swaɓam yam ɓi ɓyal ma, ama Koǝl la mak ɓi ɓyal ma gul. 7 Lakunla wa, na ɓoma ɓyal ma na ɓoma swap yam ɓi ɓyal ma, ya gha kun gǝrman ɗa, she Koǝl ma mak ɓi ɓyal ma gul. 8 La ɓoma ɓyal, la ɓoma swab yam ɓi ɓyal ma, ɓaal ya mwak na. Ko make ɓi kumun nda kwat wama i pak gaan gha. 9 I mud wa, su ɓi ngga gaan na a ɓal gaan la Koǝl, wun kwad wa pu’ul la Koǝl na, na ban ma ɓa’an li.

10 Lakunla ɓwaɗan gǝr ma Koǝl pak ɓa, swaɓam tak ban ɓak ban wa gyaal na. Tutumi ɓomaan nga ɓak ban i muɗi. Ama nǝ’ǝm lang-lang ɓi koyab ɓo daal wo ma yi ɓak ka muɗi. 11 Lakunla, ɓomaan nga sabtak ban ɓak ban ɗang la ma a swabti’i ɓa, Yeso Kristi na tak ban ma ɓaan ma.

12 Koyab ɓoma la ɓa’am ban, i mud ban ma a swabtak ban ɓak la azurfa, la zinariya, la taal ɓa yala, la nggun, la daasa, la ngwaal, 13 ɓwaɗan gaan la koyab ɓo ɓi purun a pu’ul geligeli, a tangal la Kristi. Lakunla bǝs ɓi kaman gaan la koyab ɓo ma yi pak. Bǝs ma ɓi pya’asa gaan la koyab ɓo ma yi pak. 14 Laana bǝs sǝn toon gaan ma ɓo pak i mud ban swabtak ban ɓak ban ma ɓa, yi ya’an kwad li. 15 Laana bǝs toon ma ban ma yi ɓak ma, ɓo ma ɓak ban ma ɓi ɓwaran ban la kwad li, yi nggiiɗi ɓi kumun yak mud, ama yi wa ɓoma a tangas purun i ɓaal bǝs na.

16 Wun la nggiid wun, wun sǝn daal ma na wun La la Koǝl na ɓa, Wuus la Koǝl nǝ’ǝn i ɓaal wun ɗara? 17 Koyab ɓoma su’um La la Koǝl, Koǝl ɓi suk ni; lakunla, La la Koǝl ma rangan, wun na La lii ma.

18 Gan swar na mud wun ɗa. Laana ɓomaan rangas ma na i sa’an tutumi, she ɓi kaɗan muɗi nggwar, lakunla ɓi gus ɓoma sa’an nga. 19 Lakunla gǝr ma munnza sǝn wa sak na, i ban Koǝl las la nggwar na. Wama a nywangal nga ^▼▼, “Koǝl ɓi ki bwalan ɓoɓa sa’an i ɓal sak le”; 20 A nywangal la na, “Matadla daal ma na rangas bung la ɓoɓa sak i nggur ra.” 21 Lakunla wa, ɓi ɓomaan gan wal kun ki’ili na ɓomaan ɗa! I mud na pyang gǝr ɓa ɓiɓi la wun na, 22 ko Bulus, ko Apolos, ko Kefas, ko munnza, ko wuus, ko lu, ko gǝrɓa tutumi, ko gǝrɓa dum, pyang ɓa la wun na. 23 Wun la Kristi na, Kristi la Koǝl na.