1Cor 4 | JgkSC | STEP | Ya’an na ɓi ɓiɓo sǝn su ɓoɓa pak gaan ɗi Kristi na, ɓoɓa Koǝl pa gǝrma swaramna ɓe i tak ɓuk ya.

1 Corinthians 4

Ɓi muntum ɓa la Kristi

1 Ya’an na ɓi ɓiɓo sǝn su ɓoɓa pak gaan ɗi Kristi na, ɓoɓa Koǝl pa gǝrma swaramna ɓe i tak ɓuk ya. 2 I mud wa, gǝr ma a yad i ban ɓoɓa pak gaan na ɓe pak gaan le tǝktǝk. 3 Ama sǝn shela ɓa, ɓi wun kas nzu ɓa, ko ɓi ɓa shap nzu kas nzu ɓa i ban sǝn la ɓǝsǝn ɓo. Mi gha kas nzu ɓi mwaɗa ɓa kwad. 4 Ɓwa twangan, ama ma sǝn puruna ɓa. Matadla laa kas nzu ɓa. 5 I mud wa, gan kas na nzu a mud ɓoman ɗa, tun ki mǝs sǝn pak ɓa; yal na ban kad la Matadla. Yi la shik gǝli-gǝli gǝr ɓa swaram i tu’um, i dab ban mak ɓi daal gǝr ma ɓo kud i ɓaal ya. I mǝs ma Koǝl li kakka ɓi koyab ɓo wo ma ya’an nga.

6 Tutumi, ɓi nyama, pa’an gaan na Apolos na mwaɗa a kam nga ɓi wun, wama a shap ka na, “Gan ghara gǝrma a nywangal i ɓaal nzu ma ɓa.” Gin wun pani gul li ɓomaan taɓi ɓomaan ɗa. 7 Yap ɓo la shappu na u taanɗi ɓo ɓaan? Ma la wu gha la yi ma Koǝl la pa ɓu ɓa? Laa wana, ma la mak ki u ɗab muɗu wa ba a paan ɗu ɓa? 8 Wun moor wun kumum pyang gǝrɓa wun yad! Wun gusum ɓoɓa gǝrɓuk! Wun gusum ɓi rangan su ba gǝrman na ɓa! kaa wun ɓi rangan na maamiin, she su nwang rangan ma na ɓi wun! 9 I ban sǝn la, Koǝl shi’im gǝligǝli na su muntum na, su na takwad koyab gǝr, wa ɓoɓa a kas nzu ɓe wu gǝligǝli, lakunla su gusum gǝrma munnza mi kap na ɓi ma yak taktum la Koǝl la ɓiɓo ɓi mak mus si su. 10 Su gusum nggwar lakunla Kristi, ama wun sa’an I ɓaal Kristi! Su sǝn shiin ɗa, ama wun shiin na! A paan gul li wun, aa paa bung ɓisu! 11 Tuban tutumi su gha na nzal na wulan yam, su ki mak lu’ut ma sǝn ɓwatta lakunla swa na yi ɓa, aki walsu shangmi, swa na la ɓa. 12 Su ki pak gaan na ɓuk su shangmi. Ɓo ma kaan kun a mud su, su ki ma’an sambarka ɓi; ana ban ta fwang nasu, suki taan ɓaalsu. 13 Ana daɗam ɓi su na lwak, suki shap na numun kun ɗiya. Tutumi, su gusum wo vur ɓi ɓoɓa munnza mi, gǝrma koyab ɓo ɓi sǝn wo taam na, gǝrma ya pak nama ɗarami. 14 Sun nywangal mi ɓa pa zuun ɗi wun ɗa, ama ɓa tangas kitti wun i mud na, wun mun ɓala na ma mi yad wun. 15 Ko ma wun nga na ɓo ɓa shik wun ɓa bǝlǝn i ɓaal Kristi, ama wun nga na tad ɓa bǝlǝn ɗa, lakunla rǝ’ǝm tadwun i ɓaal Kristi, i kap ban shap ɓwaɗan kun la Koǝl. 16 Lakunla wa, mi kam wun ɓi wun pak ɡǝrma mi pak. 17 Lakunla wa,tumum na Timoti ɓi wun, ɓola ma mi yat, yi ɓoma pak kun ma miin na a ɓaal matadla. Yi watti mak ɓi wun rangas, byal ban nǝk la i ɓaal Kristi Yeso, ma nǝk tǝk-tǝk na gǝrma miki kam, i koyab ban i ɓaal ɓo ɓa bil Koǝl. 18 Ɓoɓaan i ɓaal wun ban nga’at mud ya, ya sǝn wo mi gha yu ban wun ɗa. 19 Ama ka gan ɗa mi yuun ban wun, ma Matadla la ya’am ti’e, mi sǝnǝn tak kun woma ɓoɓa ki nga’at mud shap, na byal nyap ma yana yi. 20 Lakunla ban nwang rangan la Koǝl, ba ban daal ban shapkun na galang ɓa, ama nyap ma yi gha nayi na. 21 Mana wun zaab wu? ɓa yu ɓi wun na mbwar, ko na kun ma yidwun ko i ɓaals ban yad?