1Cor 6 | JgkSC | STEP | Nana ɓomaan i ɓaal wun nga na ga’ala a nzu’e na nyimi ma bil Yeso, sǝn ɓodti kaan zwal a dum ɓoɓa sǝn bil Yeso ɓa, akarkun wana, kaan ni zwal ga’ala ɓalwun a dum ɓoɓa bil Yeso.

1 Corinthians 6

Ɓe gin kun ban kan zwal a ɓaal ɓoɓa bil Koǝl la

1 Nana ɓomaan i ɓaal wun nga na ga’ala a nzu’e na nyimi ma bil Yeso, sǝn ɓodti kaan zwal a dum ɓoɓa sǝn bil Yeso ɓa, akarkun wana, kaan ni zwal ga’ala ɓalwun a dum ɓoɓa bil Yeso. 2 Wun sǝn daal la na ɓoɓal Koǝl na shap nzu ɓi ɓoɓa munnza ɓara? Nana wun na shap nzu ɓi ɓoɓa munnza, ki wun gam ban rang mbasak na nzu a zwak bibwun ɗara? 3 Wun sǝn daal la na, su rangan nzu ɓi muntum ɓal Koǝl lara? Na na wana na la ɓoɓa munnza na kar ɗa’a yiɗi? 4 Na kunla wana, ma na mak na wun ki kaan zwal biib wun a dum ɓoɓa, ban raam la ɓoɓa Ikilisiya sǝn ɗap ya kun gǝrmaan ɗa. 5 Mi shap kun ma mimi ɓi nzuun kun ban wal wun nga, ɓomaan nga zwak wun ma sa’an ma gamban rang nzu a ɓaal ɓoɓa bil Yeso ɓara? 6 Akarkun wana, she ɓoma bil Yeso ɓi kaan zwal li a mud nyimi i ban rang nzu a dum ɓoɓa sǝn bil Yeso ɓa! 7 Ban kaan zwal biib wun sǝn num ɓa ɓi ma’an kiit la Ikilisiya na ma. Sham ɓi wun yakti’e ɓi ɓomaan pak ɓiɓin kun ɗi wun. Yak na ti’e ɓi ɓomaan limǝs si wun. 8 La mi, wun na pak ɓiɓin kun na ban limǝs si bibwun har la nyim wun ɓa bil Yeso! 9 Wun sǝn daal lana, ɓoɓa pak ndarak kun, ya ko ban nwang rangan la Koǝl la? Ɓe gin swarwun ɗa, na ɓoɓa nwang na maam na bid, na ɓoɓa bil Koǝl ɓaan, na ɓoɓa nwang na maam ko bid ɓa a kud nggwam ɓi ya, 10 na ɓi nggip, na ɓoɓa nggǝrǝm nggǝrǝm, na ɓoɓa nu ɓi gǝrɓaan, na ɓoɓa kas tak bibya, na ɓoɓa pak sak ki yak gǝrɓal ɓiɓo pyang, ya kumban ko nwang rangan la Koǝl la. 11 Ɓoɓaan a ɓaal wun yin wana, ama Koǝl gussum wun, yi kaɗan ma wun ɓaɗang, yi gǝɓǝn su la ɓiɓǝn gǝr i ɓaal lwak matadla lasu Kristi na Wuus la Koǝl la su.

Pa ni gul li Koǝl na yid wun

12 Koyab gǝr a ya’am ti’e ɓa pak, ama ba koyab gǝr na mak ɓa li dum ɓa. Koyab gǝr a ya’am tiˈe ɓa pak, ama ba mi ɓyak la koyab gǝr na ɓa. 13 Apak gǝrliin ɓi bum, bum kwat na kunla gǝrliin, ama Koǝl li su’un ya pyang. Yidsu ba ma nwang la maam na bid ɓa ngurun na ɓa, ama yidma la kunla Koǝl na, yidma la matadla na. 14 Wo ma Koǝl ya’ad Matadla i ɓaal ɓa wun, yi ya’ad na su kwad i ɓaal nyap li. 15 Wun sǝn daal la na yidwun la Kristi na ɓara? mi ɗap yid Kristi pangat na yid maam ma nggurun wu? Ayo, ka pak ɓa. 16 Wun sǝn daal lana, ɓoma na pangat ma yiɗi na maam ma nggurun, yiɗi gusum ɗik na la maam ma. A nywangal la na,“ya ɓari ma gusum nyam yid ma ɗi”. 17 Ama ɓoma pangat ɗa na Matadla yi gussum yid ɗik nayi, a ɓaal wuus. 18 Gǝpna na ban nwang na maam ko bid ɓa nggurun! Ɓiɓin gǝrma ɓo ɓiki pak pyang sǝn dul na yiɗi ɓa. Ama ɓoma nwang na maam ko bid ma nggurun, pa’am ɓǝsǝn kun ɓi yiɗi. 19 Wun sǝn daal lana, yid wun lal wuus la Koǝl la ɓara? Ma yiki rǝk a ɓaal wun, ma wun yak a ban Koǝl? Ba wun kun mud wun ɗa. 20 A kurum wun na kwat ma shangmi, na kunla wana pani gulli Koǝl na yid wun.