1Cor 9 | JgkSC | STEP | Ba mi kun muɗa ɓara? Ba mi muntum la Kristi na ɓara? Sun sǝn Matadla Yeso ɓara? Ba a kab bana na wun yak Matadla ɓara?

1 Corinthians 9

Gǝrma ɓwad ɓya pa ɓi muntum ɓal Yeso

1 Ba mi kun muɗa ɓara? Ba mi muntum la Kristi na ɓara? Sun sǝn Matadla Yeso ɓara? Ba a kab bana na wun yak Matadla ɓara? 2 Na ba mina muntum la Kristi na a ban ɓoɓaan ɗa, mi muntum liina a ban wun! Nakunla wun na gus gǝrma a sǝn na mi muntum la Yeso na a dum Matadla. 3 Nama mimi na mi taban nga ɓi moɗa, a dum ɓoɓa ya yad ban kas nzu ɓa. 4 Ashe su gha na nyap la ɓe pa gǝrliin ma su li na ma su nu ɓara? 5 Su sǝn gamban ɗap maam ɓi su kara yi tak su ɓara? Woma muntum ɓal Kristi ɓaan ɗi paka, na ɓi nyim ɓal Matadla na Kefas ɓara? 6 Kan mina na Barnabas na gus ɓi su langlang ɓi su pak gaan na ɓuksu kasa ki su li? 7 Yap ɓoma ki pak gaan kudngin na li na muɗi? Yana ki bungus sum nggun anab, ama ye li mun ɓa ɓara? Yana ki yal gǝr, ama ye nu kiɓǝr ɓara? 8 Mi shap kun ma mimi shap la ɓiɓo na nggalang wu? Nzu la Musa sun shap wana ɓara? 9 A nywangal la ɓaal nzu la Musa, “gin makni nggun kun ɗi ndak a mǝs ma yi pak gaan nyalak gǝr a sum ɓa.” Kunla ndak na she’el Koǝl nggalang wu? 10 Kun mamimi, ba yi shap na su ɓara? Lang lang na kunla su na. Na kunla, ɓoma gup ban na ɓoma swak gǝr, ɓwaɗan bya mak ɓaal a mud gǝrma ya kum a sum maya pak gaan nga ɓaali ma. 11 Suna ɗaar ma byal ma Wuus a ɓaal wun, sǝn ɓippa suna liim mor gǝrma ɓuk wun. 12 Nana ɓoɓaan ɗi kumun gǝrmaan a banwun, la su gul taanɗi laya. Ama su sǝn pak gaan na nyap ma su gha na yi ɓa. Su taam ɓaal su na koyab gǝr, na kunla ɓisu gin ɗak na kun ma ɓwaɗan la Kristi ɓa. 13 Wun sǝn daal la na, ɓoɓa pak gaan, a la la Koǝl aki kum gǝrliin laya bana ɓara? Ɓoɓa pak gaan a ban dung ban, aki kum gǝrliin laya a ɓaal gǝrɓa a naat a mud ban dung ban ma. 14 Wana kwad, Matadla shabɓan na, ɓoɓa ya shap kun la Koǝl li ɓiɓo, aki kum gǝrliin laya a kapban shap kun la Koǝl li ɓi ɓo. 15 Ama sǝn pak gaan na ban yak mud maan a ɓaal ɓa ɓiɓi ɓara, ba mi nywangal kun ɓa mimi ɓiwun kun ban pakka ɓa wana ɓa, sham ɓa wu, na ɓa shik ɓomaan ɗi ɗa’an mi na ban ngaat mwaɗa a mud kun ɓa ɓi ɓi. 16 Gaan ban shap kun ma ɓwaɗan ɗi ɓiɓo, ɓi gin ma’a ɓa wal ke’el la ɓa, re’em ɓaa ke’el ɓa shapkun la Koǝl li ɓiɓo. Mi re’en gǝr shuur mina sǝn shap ɓwaɗan kun la Koǝl li ɓiɓo ɓa. 17 Mina shabɓan kunla Koǝl na kunla ɓaala ɗaban ɗa, mi kumun kwat ban Koǝl, nana ba ɓaala na ɗap pa, mi paan nggalang ɓe nana pa’am gǝrma ana ɓa pak. 18 Mana kwat la wu? kwat la yi na, mi na shabɓan kun ma ɓwadan, a pe’e nggur. Mi gha pak gaan na ban yak mut la ɗat a ban shap ɓwadan kun la Koǝl la. 19 Koma mi ba ɓyak la ɓomaan na ɓa, ama kaɗan na moɗa ɓyak la koyan na, a kum ban tangas ɓiɓo gha ɓa ɓǝlǝn ma mina gaman. 20 A ban ɓa Yahuda, gusum wo Yahuda na, a kum ban tangas ɓa Yahuda gha. A ban ɓoɓa bil nzu la Musa, kaɗan ma moɗa wo ɓoɓa bil nzu la Musa na, (Ko ma mi gha tak ɓuk nzu ɓa) ɓa kumban tangas ɓoɓa ya tak kap nzu. 21 A ban ɓoɓa ba nzu la Musa na a bil la, kaɗan ma moɗa wo ɓoma ya bil nzu la Musa ɓa, (Mi sǝn kam na nzu la Koǝl gha na nyap a mwaɗa ɓa, nzu la Kristi gha na nyap a mwaɗa) a kum ban tangas ɓoɓa ya gha tak kap nzu ɓa. 22 A ban ɓoɓa sǝn shiin ɗa a ɓaal ban yak kun ma miin, re’em fuum ɓa kumban tangas ya gha. Re’em koman ɗi ɓiɓo ɗang ɗang, ɓa kumban tangas ya ɓe kumban yakmud ka a koyab njar. 23 Mi pak kun ɓa ɓiɓi pyang na kunla kunma ɓwadan, a kum sambarka ma bali gha, 24 Wunsǝn daal la na, a ɓaal dat ban ɓang miir, pyang laya a ɓangan miir, ama ɓo ɗik a ɓaal ya na kum kwat. Ɓang miir ma, woma wu kum kwat ka. 25 Pyang ɓoɓa a pak dat ma, she ana taam ɓilǝn yidya amud woma a pak dat ma gha, a pak ɓe kum kwat ka ma yi daɗan, ama lasu su pak ɓisu kum kwat ma bat bat ka. 26 Na kunla wana, ba mi ɓang miir ma nggurun ɓa, ba mi wal lo la wo ɓoma ki wal yuut na ɓa. 27 Ayo, miwal yaɗa, kaɗan ni wo ɓyak la na, na kunla ɓi gin rǝk na, shabɓan kunla Koǝl ma ɓwaɗan ɗi ɓiɓo, ama ɓwar ban na kwat ma bat bat ta.