1Ti 3 | JgkSC | STEP | Shap ma na koyab ɓoma yadti gus ɓoji i ɓaal ikilisiya yii yaɗan ɓi pak gaan ma ɓwaɗan miin na.

1 Timothy 3

Ɓoma yadti gus ɓoji

1 Shap ma na koyab ɓoma yadti gus ɓoji i ɓaal ikilisiya yii yaɗan ɓi pak gaan ma ɓwaɗan miin na. 2 Lakunla wa ɓi ɓoma mak ɓaali na yi gusun ɓoji i ɓaal ikilisiya nǝk ɓi ɓwad ɓi gan kumi la ban pak gǝr ɓa kyamas mudta, maami mwak, yi gha la bwal ɓaal, yi gha la wad mud, yi pak gǝr tǝktǝk, yi gha la ban yak ɓobit, i daal na ban shik ɓo shangmi, 3 yi gha ki kyam gǝr ɓa wuli ɓa, yi gha yad yid ma walan ɗa ama yi jing, yi gha ki nga’at ɓaal ɓoɓa, yi gha la nggǝrli wurup pa. 4 She ɓi gus na yi ɓoma daal ban wad la li na, yi ɓoma shik mun ɓa li pa gul li la ban pak gǝrɓa i shappe na. 5 (La na ɓo maan sun daal ban wad la li ɓa, wake la yi gamban suntak ka ɓi ikkilisiya la Koǝl?) 6 Ba ɓoma piiɓi na ban yak tubi ɓa i mud na yi piip na ɗu’uli na i taanɗi koyab ɓo she i tuko i ɓaal ɓyal nzu ma a kas shik ɓi sheɗan. 7 Ɓi pak gǝrɓa ko ɓoɓa sun mak ɓaal la daal na yi ɓoma kaan na, lakunla ɓi gan tuko i ɓaal gǝr nzuun ɗa la i ɓaal tarko la Sheɗan.

8 Wana ma kwad na ɓoɓa pak gaan i ɓaal ɓoɓa bil, she ɓe rǝk ɓoɓa ya’an ɓi pa gul le, ya la ɓaal ɓa ɓwaɗan, ya gha ki kyam yam ɓilin nggun ɓi ki wal ya ɓa, ko ya gha ngal wurup i njar ma ɓwad ta. 9 Ɓe li dum la ban ki wad miin la yak kun ma a shik gǝligǝli la ban rangas bum ^{▼▼bum ko bung} ma ɓwaɗan. 10 She a na pya’as ma ya a kumum ya tǝktǝk, kasa ki a mak ya ɓe pak gaan ɗi ɓoɓa bil ɓa.

11 Wana ma ɓi nǝk la maam ɓa la ya mak ɓi ɓo pa gul le. Ya gha shap ɓi’in kun i mud ɓo ɓaan ɗa ama ya ɓoɓa bwal ɓaal ya na ɓo ɓi mak ɓaal i mud ya i koyab gǝr.

12 Ɓi ɓoma yi pak gaan ɗi ɓoɓa bil yak maam ɗik, la ɓi wad mun ɓa li la la li shangmi. 13 Ɓo ɓi paan gul li ɓoɓa pak gaan ma kaan i ɓaal ɓoɓa bil. I mud wa ye gaman ban shap kun wup ka ɓa i mud yak kun mamiin la ya i mud Kristi Yeso.

14 Ko ma mak ma ɓaala na mi yuuna bunu ka gan ɗa, mi ngywangal kun ɓi lakunla, 15 mi na ji ganam i bǝni, wu daal la wama ɓoɓa la la Koǝl ɓi ki pakka. La la Koǝl yi na ikilisiya la Koǝl ma ɓǝs yi ki paan shiin ɗi kun mamiin wa jigo na la wama shiin swabtak nda ɓi pa shiin na ɓi nda. 16 Ɓo maan na gamban ɓiin na gǝrma Koǝl shik su gha nggala kun na ɓa:
Kristi ta i pur la yid ɓo,
Wuus la Koǝl shik ɓo gha na yi na Ɓola Koǝl,
Muntum ɓa la Koǝl sunum yi,
A shaɓam ɓwaɗan kun i muɗi ɓi ɓoɓa tak ya ɗangɗang i koyab ban,
i pyang ban ɓa ɓoɓa mak ɓaal shap kun i mud Kristi she ɓo mak ɓaal ya i muɗi.
Koǝl ɗab mi i takkoǝl.