1Ti 4 | JgkSC | STEP | Ama Wuus la Koǝl shap kun ɓi wama ɓo daal la na i ɓaal nwang ɓa malas ɓoɓaan ɗi shi’in yak kun mamiin la ya, a kaɗan na ɓaal ya a ban wuus ma swar ban la gǝrɓa ɓi’in kwa’ar ki shik ɓo gha.

1 Timothy 4

Shap ɓa Timotawus ɓi bil

1 Ama Wuus la Koǝl shap kun ɓi wama ɓo daal la na i ɓaal nwang ɓa malas ɓoɓaan ɗi shi’in yak kun mamiin la ya, a kaɗan na ɓaal ya a ban wuus ma swar ban la gǝrɓa ɓi’in kwa’ar ki shik ɓo gha. 2 Shik ban ɓa wami pur i ban ɓoɓa pak wa ye shap kun ɓa miin ama ye shap ngwangwa. Ban rangas kun la ya wuum wa a toon na bǝs lyang. 3 Ɓyal ɓoɓi ɗak ɓo la ban kud nggwam la a mak na ɓi gan li gǝr ɓaan ɗa. Ama Koǝl pak koyab gǝrliin ɓi ɓoɓa mak ɓaal la daal kun li mamiin ɓa yak gǝrliin ma a kaak ɓi. 4 I mud na koyab gǝr ma Koǝl pak ɓwaɗan maan nga ma ɓo ɓi ɓiin ɗa. I karkuni yak ya la ban kaak, 5 lakunla kun la Koǝl la ban kǝmi mak ɓi yak na ɓwaɗan.

6 Wu na shi’im gǝrɓi ɓi ɓoɓa mak ɓaal, wu gusun ɓoma pak gaan ma ɓwaɗan la Kristi Yeso. Koǝl kwad yi ɗǝ’ǝs na wu i kab kun ɓa miin la ɓwaɗan shik ban ma u bil. 7 Ɓi gǝrmaan gan pangaɗu la zaan ɓa ka pa gul li Koǝl la; i karkun wa, she u yi’il muɗu la gǝrɓa Koǝl yad. 8 Ɓwad la ban masak kil i yid gab na lakunla ɓi yiɗi nyap ka. Ama ban ki pak gǝrɓa Koǝl yad taanɗi koyab gǝr, lakunla ɓi ya’an na ɓo ki yi ɓǝs i munnza la takwad yi la wuum.

9 Shap mi shap mamiin na ɓwaɗan ɗi ɓo yak ti’i la ɓuk rwap 10 (mimi la mak ɓi su ki pak gaan ma bungǝn shangmi), i mud na su ma’am ɓaal su ɓi Koǝl ma ɓǝs ma yi na yak mudti ɓo pyang, tum ba ɓoɓa mak ɓaal la.

11 Shik ɓo la kun ɓi la mak koyab ɓo ɓi pak kun ɓa u shab ɓa. 12 Gan yak ti’i ɓi ɓomaan kyamas su ɓa lakunla wu mun na, ama she wu rǝk ɓoma ɓoɓa bil ɓi pak wama wu ki pakka i ban shap kun, i pak lu, i yad lu, i yak kun mamiin lu, laa i rǝk ma ban pak ɓǝsǝn kun na ɓa. 13 Kasa ki yu, pa muɗu ɓi ban ɓal, ban shap, la ban shik ɓo la kun la Koǝl. 14 Gan ɓiin ban pak gaan laa gyaal ma wu na yi ma a pa ɓu a kab shap la ɓi mayak taktum ki ɓi ɓoji ɓa raam mak ɓuk ɓu mi ɓa.

15 Pak gǝrɓi la ɓaalu mwak; pa muɗu pyang ɓi ya, lakunla ɓi koyab ɓo sun ban li dum lu gha. 16 Shik kid na wama nǝk lu gha la gǝrma u shik ɓo gha i mud Koǝl. Ɓi ban pak gǝrɓi gan purru mudta, lakunla wu la pa’am wana, wu ya’an muɗu la la ɓoɓa wu’u.