1Ti 6 | JgkSC | STEP | Pyang ɓoɓa mak ɓaal ɓa ɓyaak na ɓe pa gul li ɓatad ya shangmi, lakunla ɓi ɓomaan gan shap ɓi’in kun i mud lwak Koǝl la shik ban laa su ɓa.

1 Timothy 6

1 Pyang ɓoɓa mak ɓaal ɓa ɓyaak na ɓe pa gul li ɓatad ya shangmi, lakunla ɓi ɓomaan gan shap ɓi’in kun i mud lwak Koǝl la shik ban laa su ɓa. 2 Ɓyaak ɓa matadla ɓa la ya ɓoɓa mak ɓaal i kun mamiin na ɓe gan shik ban pa gulle ɓa lakunla ya nyim ɓa la ya na. I karkun wa, she ɓe ki pak gaan ma nga’al ma ndwang lakunla ɓoɓa a pak gaan ɗi ya ma ɓoɓa mak ɓaal na a yaɗan ya ma kaan. Ɓiɓi na gǝrɓa wu shik ya gha u dab ban mak ɓe pak.

Ban yad wurup

3 Koyab ɓoma shik ban ma sun pak tǝktǝk la kun la Matadla laasu Yeso Kristi la shik ban ma sun ya’an njar ma bil Koǝl la, 4 yi ɓoma ɗap muɗi na i sun daal gǝrmaan ɗa. Yi ɓoma yad shakkid i mud kun na. Mi ɓi ki yuun na buk, la ban nga’at ɓaal, la ban suk lwak, na ban rangas na biib ya pa’am ɓi’in kun, 5 la ban ki shakkid la ɓoɓa rangas ban la ya ɓwad ta, ɓa pak mamiin ka ɓaal ya ɓa. A rangas na ban pak gǝrɓa Koǝl yad ɓi mak ɓe kumun wurup.

6 Ama su la pa’am gǝrɓa Koǝl yad ɓi gamam su ɓi ɓwaɗan ɗi su shangmi. 7 Lakunla ma a ɓil su su sun yu la gǝr maan i ɓuk su i munnza ɓa kwad a mǝs ma su la wuum su gha gamban ɗab gǝrmaan i ɓaali ɓa. 8 Ama su la nga la gǝrliin la lu’ut ɓa ma’an, mii ma gamam su. 9 Ama ɓoɓa yad ban raam gǝrɓuk, ye tukon i ɓaal pya’as, i ɓaal tarko la ban yad gǝr ma nggur ma mak ɓo i njar ma ɓwad ta ɓe bung shangmi. 10 Ban yad wurup shangmi ɓi ma’an ban pak ɓi’in gǝr ɗangɗang. Ɓoɓaan mak ɓaal shangmi i mud wurup, a kyang shi’im yak kun mamiin, ya bungǝm i njar ɗangɗang a yuum na ɓaal su’un ma shangmi i mud ya.

Tangas kid ɓi Timotawus

11 Ama wu ɓo la Koǝl na, she u ɓang shik gǝrmi pyang, bil tak ban pak tǝktǝk, nǝk ma Koǝl yad, yak kun mamiin, ki yad ban, ki wad ɓaal, la pak jingjing. 12 Wa ɓwaɗan kudnggin ma wal lo ma yi gha pa muɗi i ban wal lo ɓa, wu ma, gan pa muɗu i mak ɓaal i mud Koǝl la ban pak gǝrɓa i yadta. Wad la ɓu’u rwap wuus ma badbad ma Koǝl tu’ulu ɓu kum, ma u shap ɓwaɗan kun i muɗi i dum bǝlǝn ɓo. 13 Mi mu’u i dum Koǝl ma pa wuus si koyab gǝr, la dum Kristi Yeso, ma ki yi shap shaida i dum Buntus Bilatus shap kun ma ɓwaɗan na, 14 ɓu pak gǝrɓa ɓe gan kum ɓi’in gǝrma ye shap i muɗu ɓa. Pak mimi har tangal ma ban taa pur la Matadla laasu Yeso Kristi, 15 ma Koǝl ɓi mak ɓi pak i mǝs ma tǝktǝk. Koǝl ma yi gha la sambarka yi mwak la Nwang Rangan, yi na Rangan la ɓi rangan la Matadla la ɓi matadla. 16 Yi na nggalang ma yi gha wu ɓa yi nǝk ɓaal mwaas ban ma ɓomaan na gamban yu tuu ɓa. Ɓomaan sun ki suni ɓa ɓomaan nga kwad ma yi gamban suni ɓa. Ɓi gul la nyap gus li na ma badbad! Koǝl yak ti’i.

17 Mak ɓoɓa ya gha na gǝrɓuk i ɓaal munnza mi na ɓe gan ɗap mud ya ɓa ko a mak ɓaal i mud gǝrɓuk la ya, maa ka mak ɓaal i mud gan li ɓa. I karkun wa, ɓe mak ɓaal i mud Koǝl yi ma ki pa koyab gǝr ɓi su lakunla ɓi ɓaal su nwang nga. 18 Mak ya ɓe pak ɓwaɗan gǝr, ɓe gus ɓoɓa pak bǝlǝn gaan ma ɓwaɗan, ɓe yad ban ki pa gǝr la ɓaal mwak, la ɓe ki gǝp gǝr ɓi biib ya. 19 Ya la pa’am wami ye raam gǝr ri mud ya maa gus ban swabtak nǝk ma munnza ma yu, na lakunla ɓe kum wuus ma badbad.

20 Timotawus, sun tak ɓi gǝrma Koǝl pa ɓu. Ta muɗu i ban shap kun ɓa nggur ma tǝr wup Koǝl, la ban shap nggwar shakkid ɓa ɓo ki sun wa ban daal ban na, ama ngwangwa na. 21 I ban bil daal ban ma ngwangwa mi la ɓoɓaan moor a gǝp ka la njar yak kun mamiin. Ɓi yad la sambarka la Koǝl gus si wun.

Ɓi wun kum yad la sambarka la Koǝl.