2Cor 1 | JgkSC | STEP | Nggup mi pur ban Bulus muntum la Kristi Yeso woma Koǝl yadka, na nyimsu Timoti. Mi nyongal li ban raam la ɓa bil Yeso ɓa Korinti, na ɓoɓa Koǝl tarya aɓaal nzaal Akaya pyang.

2 Corinthians 1

Ban lakban la Bulus

1 Nggup mi pur ban Bulus muntum la Kristi Yeso woma Koǝl yadka, na nyimsu Timoti. Mi nyongal li ban raam la ɓa bil Yeso ɓa Korinti, na ɓoɓa Koǝl tarya aɓaal nzaal Akaya pyang. 2 Ɓi ɓoɗan gǝr na pwalan ɓaal la Koǝl ma su kum ban tadsu na Matadla Yeso Kristi bil la wun.

Koǝl ma pa ɓaal nwangan

3 Sukak ɓi Koǝl tadla Matadla Yeso Kristi, tad ma sǝn shuur ma gullun na Koǝl ma swar ɓaal, 4 yina ki swar ɓaal lisu aɓaal bung ɓalsu pyang, ɓisu kumban pa pwalan ɓaal gha ɓi ɓoɓa bung na su’un ɓaal ti’e ɗang ɗang, a kap ban pwalan ɓaal masu kumban Koǝl. 5 Woma ban bung la Kristi bil ɓaal yidsu gha, wana kwad akap ban Kristi su kumun nggal ɓaal pwalan la Koǝl. 6 Su kumun bung nakunla ɓi wun kum ta ɓaal na ban yakmud ka, wana kwad suna kumun ban ta ɓaal, sukum ɓi wun kum ban ta ɓaal gha, ɓi mak wun ɗi wun ta ɓaal wun nga, na ɓyal bung ma su bung. 7 Su gha na mak ɓaal ma shiina a mud wun, na kunla su daal lana, woma wun bung nga a ɓaal bung lasu, wana kwad, wun kumun ban ta ɓaal a ɓaal ban ta ɓaal lasu. 8 Ɓi nyima, su yad ti wun daal ɓyal bung masu bung a nzaal Asiya. Su kumun mudsu aɓaal bung ma gullun, su purun ma ɓaal, su sǝnwo lasu mallam. 9 Mamiin, a ɓaal su, su wak wo a kasam nzu lu ɓi su. Ama Koǝl shik wana ma na kunla ɓisu gin sǝn shiin la mudsu ɓa, ama i mud shiin la Koǝl yima ya’ad ɓawuun. 10 Yi ya’am mudsu a ɓuk gǝr wup ma gaman ban myer su, su yaˈam tiˈe mamiin na yi yaˈan mudsu kwad. Yina su yak tiˈe a muɗi na, yilin dum na ban yakmud ti su. 11 Woma wun ya’an sugha na ban kam Koǝl. Ɓǝlǝn ɓiɓo ɓi ka’an ɗi Koǝl na kunla su, la kunla sambarka ma su kum i kap ban yak bǝlin ban kam Koǝl.

Bulus Shiˈim Ban Ka Kyan

12 Tutumi gǝrma su wal ke’el su gha naami, su daal la ɓaal su na, su reˈem rek ma kaˈan a munnza, woma su rǝkka na wun a ɓaal kyarassa yid, na ban rǝk ma ɓaal ɗik woma Koǝl li yad ka. Su pak wana ba na sak ma munnza ɓa, ama na ɓwaɗan pak la Koǝl. 13 Nakunla su sǝn nywangal gǝrman ma ki wun ɓal ko daal la, ama mi yad ti wun daal ɓaal koman gǝli gǝli, 14 woma wun daal sugha gap gap, wun yu daal lasu pyang , har wun gaman ban wal ke’el wun a mud su, woma su wal ke’el su gha a mudwun, a lib ban yu la Matadla Yeso. 15 Walam keˈela mud wun shangmi, na pak na yad ban ka sǝn ban nga nawun na dum kasa, na kunla, ɓiwun kun ban kum sambarka gha njiri ɓari. 16 Yad ban kaa sǝn ban nawun amud njarla ma kaa Makidoniya, kǝr kad bil ban wun mina ban kad, ɓi wun kumban yaˈana na gǝrɓuk wun amud njar la ma kaa Judiya. 17 Mǝsma mak ken ma ɓaala wun sǝn wo sǝn daal gǝrma mi pak ɓǝra? ko pa’an woma ɓoɓa munza ɓi pak ka, ɓa kum ban naa na, “Aa “ko kǝr kad na “Ayo wu?” 18 Woma Koǝl la shaɓan kun, ye kǝr kalat ta, wana na kun ma su shap pi wun ba ma “Aa” na ko “Ayo” na ɓa. 19 Na kunla mun ɓo la Koǝl, Yeso Kristi, ma su shap kunli ɓi wun, na mi, na Sila na Timoti, ba “Aa” na ko “Ayo” na ɓa, ama kunli ma “Aa” na ko yab mǝs. 20 Koman bǝlǝn shapshik la Koǝl, “Aa” na, a ɓaal lwak Kristi, wana kwad, a kab bini, ɓi Koǝl yak tie na su ki shap, ɓi lwak Koǝl kum gul gha. 21 Tutumi Koǝl la mak su, na wun ɓisu jaam na shiin ni a ɓaal Kristi. Yina tar su. 22 Koǝl ma’am ɓuk rangan li, amud su ɓi guska na su liina, yi she’em Wuus li a ɓaal su, ɓi gus shangan gǝr ma yi paɓi su a dum. 23 Koǝl na sǝn gǝrma pak, sǝn kad a Korinti ɓa, nakunla ɓa gin kǝr pa bung nga ɓi wun ɗa, 24 su sǝn mak wun nga na keˈel amud ban yak kun lawun mamiin ɗa, ama su pak gaan na wun ɓi wun kum ɓaal pupna nga, na kunla wun jamna na nyap i ɓal ban yak kun a miin lawun.