2Cor 12 | JgkSC | STEP | Ko ma sǝn ɓwadta, ama ɓwalam langlang na ɓa wal keˈela. Tutumi, mi shaɓan kun a mud gǝrɓa Matadla Yeso Kristi woos mǝssa ɓa sǝn, na gǝrɓa swaram na ɓa yi kama gha.

2 Corinthians 12

Gǝrɓa Koǝl Woos Mǝssi Bulus Ɓi Daal

1 Ko ma sǝn ɓwadta, ama ɓwalam langlang na ɓa wal keˈela. Tutumi, mi shaɓan kun a mud gǝrɓa Matadla Yeso Kristi woos mǝssa ɓa sǝn, na gǝrɓa swaram na ɓa yi kama gha. 2 Daal la ɓomaan a ɓaal Kristi ma liina byang lumko yiin na mi, ma a ɗiɓi karayi tak koǝl ma taat. ko yi gha ɓaal yid, ko ba yi gha ɓaal yid ta, sǝn daal la, Koǝl la daal nggalang. 3 Daal la kwad ɓomi, ko yi gha ɓaal yid, ko ba i ɓaal yid ta, sǝn daal la, Koǝl la daal. 4 A ɗibi kara yi tak Koǝl, yi wa’am kun ɓaan kwad, ma ki ɓo shap pa, ɓili ɓa adak ɓo ban shap. 5 Mi walan keˈela na byal ɓo mimi, ama me wal keˈela na mwaɗa ɓa, she ɓa wal ke’el la amud kiit la. 6 Ko kana mi walan keˈela me gus lir ra, lakunla miin na mi shap. Ama shiˈim mama, lakunla ɓi ɓomaan gin ɗaɓa na ngaˈal na gǝrma mi ki shap ko pak ɓa. 7 Lakunla ɓa gin wal keˈel la ɓa, i mud nggal gǝrɓa swaramna ma sǝn na masa, she a mak yid kwanan ɗa ma gus wo ji na a ɓaal yaɗa, sheɗan na tum muntum li ɓi ki ta fwang nami, lakunla ɓi mwaɗa gi gul gha ɓa. 8 Njiri taat na ki kam Matadla ɓi gǝr mimi kum sha’a gha, 9 ama yi na ɓana, “ɓodan gǝr la ma pa ɓu gamma wu, lakunla i kap ban kiit na aki sǝn nyap la ma tǝk tǝk i ɓal tǝr nyap lu.” Lakunla wa mi liin dum na ban wal keˈela na kiit la na ɓaal puup na la ki;it lami, ɓi nyap la Kristi bil gha na mi. 10 Lakunla wa, ɓaala puup ma na kiit la, na woma a limis ka ɓa, na ban nu bung, na ban ɓiina lakunla Almasihu, na ban kyam bung tiˈe ɗang ɗang. lakunla, mǝs ma kiit ka, a mǝs mana mi gha na nyap.

Ɓaal Bulus Waam A mud Ɓoba Bil Yeso A Koranti

11 Ko ma kaɗan na mwaɗa wo lir ra, ama wun na ma’a gha. Ka wun na ɓwat ti wun shap kun ma ɓwaɗan i mwaɗa, ko ma ba mi gǝrmaan na ɓa, tunma sǝn kiit a dum “nggal muntum” ɓal wum ɓi ɓa. 12 Gǝrma yi kam na mi muntum na yana, gǝrɓa a sǝn mi pak, na gǝr sheel, na gǝrɓa aki sǝn dwang ɓa a zwak wun, pak ɡǝr ɓiɓi a zwak wun na ban taa ɓaal. 13 I kap njar makya na wun kiit ka na tǝ’ǝs ɓoba ɓil Yeso? She ko lakunla sǝn gus bung ɓi wun ɗa? Nana wana na zub ni mbuk ɓa mud! 14 Tutumi, paˈam yaɗa mi kara ban wun ma njiri taat. Ama me gus bung ɓi wun ɗa, lakunla wun na mi yad ba gǝrɓuk wun na ɓa. sǝn num ɓi mun ɗap bung la tadya ɓa, karkun wa she ɓi tad ma ɗap bung la mun ɓali. 15 Mi gussum na puup na ɓaal ɓa pa pyang gǝr ma mi gha na yi ɓi wun, mi paan mwaɗa kwad. Ɓa kumban yaˈan wun nga, Wun kaɗan na yad lawun mamiin takwad, nakunla yaɗan wun mamiin wu? 16 Ai wun daal lana sǝn rǝk ɓiwun myal wo gǝr bung naɓa. Ama ɓomaan i ɓaal wun ɗi sǝn wo mi pak sak ɓa kunbam limud ka ɓi wun na ngwa ngwa. 17 Ko ma tumun ɓoɓaan i ban wun, ama sǝn pak gaan na koyab ɗik i ɓaal ya a yak gǝrmaan i ban wun ɗi mwaɗa ɓa. 18 Kaman Titus ɓi ka ban wun,na nyimsu maan ma bil Yeso. Titus ma lin mǝssi wun wu? Ashe gǝrɓa yi pak na gǝrma ɓaali sǝn gus gǝr ɗik na la ɓara? 19 Ɓaanɗa wun sǝn wo su yad ban purun mudsu a dum wun. Ba wana na ɓa Su ki shap kun mimi woma Kristi ɓi yad tisu shap a dum Koǝl, ɓi lak ma mi yadya mamiin, daal la na pyang gǝrma su pak su ki pak ma ɓak wun na. 20 Mi ɓang na ɓaanɗa mina yum mi kum ki wun kalad ma wun taam gǝrɓaan ma ɗang na wo mami yadwun nga, ɓaanɗa wun kum reˈem ɗang kwad ba wama wun yadban sǝnna ɓa. Wuppi wal lami, ɓaanɗa akumun lo na buk na ndarak ɓaas na ban gǝb ɓaal ɓiɓo na ɓoɓa dat na lwak ɓi ɓoɓaan, na ɓoɓa shap las, na ɓoɓa gullun mud, na yad mud, na ban dat ɓaal, na ban kas ɓo, na ban gulun mud, na ya’at ɓaal ɓiɓo. 21 Mi wak wup mina kǝr yuum ban wun Koǝl ɓi maˈan ɓa wak nzuun a dum wun, ɓaala ɓi daɗan lakunla ɓoɓaan i ɓaal wun ɓa pak ɓiɓin gǝr tiˈe ɗang ɗang, ama ya sǝn yak tubi ashik ndarak kun ɗa, wobi ban nwang na maam ko bit ma a sǝn kud nggom ɓiya ba, na ɓi tǝr nzuun, na ban yad yid ma ya pak.