2Cor 13 | JgkSC | STEP | Ɓi gussun ban yula ban wun ma njiri tat nami: A nywangal ɓaal kun la Koǝl na,”Reˈem na ko yap kun ma ana shaɓan a kun ɓo ɓari ko taat gusum mamiin”.

2 Corinthians 13

Ban Tangaas Kit La Bulus Ma Malashi

1 Ɓi gussun ban yula ban wun ma njiri tat nami: A nywangal ɓaal kun la Koǝl na,”Reˈem na ko yap kun ma ana shaɓan a kun ɓo ɓari ko taat gusum mamiin”. 2 A ban yula ma ɓari a ban wun, tangas ma kitti ɓoɓa pak ɓisǝn kun na tiˈǝs ɓi ɓo pyang be shik ban pak ɓisǝn kun gha. Tutumi ma me gha na wun ɗa, mi kar tangassa kitti wun nakunla mina yum, ɓoɓa pak ndarak kun ɓa koko ɓi na ɓoɓa kǝr pak ndarak kun a takwad ya pyang me shik ya ɓa. 3 Wun na yad ban daal la na lang lang Kristi na shap kun a kap ɓana, yi ba yi fuum na ɓa a ban wun, ama yi kaman nyap li a ɓaal wun. 4 A kap ban tǝr na a pǝngi gha a mut nggun, ama yi gha ɓǝs a kap ban nyap la Koǝl. Ko su ɓiɓi su sǝn shiin ɗa a ɓaali, ama a kap ban nyap la Koǝl su reˈen ɓǝs na yi nakunla, ɓisu li dum nga na ban pak gaan masu pak a ɓaal wun. 5 Pyassi mud wuun ɓi wun sǝn nga kan wun nga ɓaal bil kun mamiin la Kristi. Pyaˈassi Mud wun. Ashe wun sǝn daal lana Yeso Kristi gha a ɓaal wun ɗara? Wun na sǝn daal la gussum na wun tukom a pyaˈas ma nama. 6 Maˈam ɓaala na, wun daal la na, su sǝn tuko ban pyaˈas ma ɓa. 7 Tutumi su gha kam Koǝl na ɓi wun gin pak ɓiɓǝn gǝr ra, ba su yad ban na su lim ban ɗa, ama na kunla ɓi wun kum ban pak gǝr ma tǝk tǝk ka, ko ma ɓi ɓo ɓi sǝn wo su kiit ma su sǝn gam ɓa. 8 Su ɓilin kun mamiin su gha kudtak ɓi bur ra. 9 Su gha na ɓaal pwalan a mǝs ma su fuum na; ama wun shiin na. Wana ma na su kam Koǝl gha ɓu wun gam gha. 10 Nakunla wana na nywangal gǝrɓi ɓi wun tun ki mi gha a ban wun ɗa. Nakunla mina yum ɓi gin rǝk ɓa keˈel ɓa ngang ɓi wun mud ta, i kap ban nyap ma Koǝl pa ɓa, nyap ma Koǝl pa ɓa ma ɓakwun na ba ma goos wun na ɓa.

Lak Ban Ma Malashi

11 A malassi, ɓi nyama, she jing lawun, rǝkna tǝk tǝk, wak ni kamla yak na tie na bibwun na ban nuk jad jad a nzwak wun. Wona na Koǝl ma yad ma miin na fwalan ɓaal ɓi reˈen na wun. 12 Lak ni biib wun na ban gǝk biib wun na kyarasa ɓaal wun. 13 pyang ɓi ɓoɓa bil Yeso ɓa kyarasssa ba lak wun. 14 Motti ɓwaɗan pak la Matadla Yeso Kristi, na yad ma miin la Koǝl, na ban pangat mud la Wuus la Koǝl, ɓi rǝk na wun pyang. Koǝl yak tiˈe.