2Cor 3 | JgkSC | STEP | Su swaɓan tak ban kak mudsu, reˈem langlang na ɓisu nywangal nggup ma kam mudsu ɓi wunnu, ko wun nywangal nggup ma kam mudwun ɗisu su?

2 Corinthians 3

Ɓoɓa pak gaan mud Piip shapshik La Koǝl

1 Su swaɓan tak ban kak mudsu, reˈem langlang na ɓisu nywangal nggup ma kam mudsu ɓi wunnu, ko wun nywangal nggup ma kam mudwun ɗisu su? 2 Wun na nggid wun na nggup lasu, ma a nywangal a ɓaal su, woma ko yab ɓo ɓi sǝn gha ɓe ɓal gha kwat. 3 Wun kamam na wun ɓi nwangal la nggup la Kristi na, gaan masu pak a ɓaal wun na mak wun ɓi wun rǝk wana. Nggup mi, a sǝn nywangal na gǝrma nywangal gǝrra, ama a nywangal na Wuus la Koǝl ma ɓǝs, ba amud taal ma nywangal gǝr ra, ama a ɓaal ɓaal ɓǝsǝn ɓiɓo. 4 Su shap kun ma mimi nakunla langlang su daala na wana na adum Koǝl akap ban Kristi. 5 Ba nyap lasu na pak gaan mi ɓa, ama nyap lasu pur ban Koǝl. 6 Yi ma’am su taam ge’el amud ban shap - shap-shik la Koǝl, ba a kap ban nzu ma a nywangal la, ama a kap Wuus li. Nzu ma a nywangal mi na yuna lu, ama Wuus li ɓi paan ɓǝs.

7 Na na ban nywangal nzu la Musa ma a nywangal a mud taal ma nywangal gǝr, yun na ban pa gulli Koǝl, ma ɓoɓa Israila sǝn gam ban sǝn kun mǝs Musa ɓa. Na kunla gulli, ko ma gulli ma yi ɓwaran na. 8 Nana wona na, gulma a kum a kap ban Wuus la Koǝl ɓi rǝk wokya? 9 Nana gǝrma yuna lu gha gul, gǝrma yuna ban pak gǝr tǝktǝk ɓi Koǝl fa, ka yaˈal wana na gul lara? 10 Shapshik ma yin kana gul la ma ɗarak mi ɓa, masu na pangat mayi na piip shapshik. 11 Nana gǝrma yi bwaran ɗi yun na gul, gǝrma ka bwarra gulli ya’al la wana. 12 Na kunla wana, tun ma su gha na ban mak ɓaal ma gullun, su shap kun na ɓaal shiina. 13 Ba su wo Musa na ɓa, ma zub gǝr mǝssi ɓi ɗak Israila na ɓan sǝn Malas la gǝr ma bwaran. 14 Ama ɓaalya shinna, ɓi tuban lina gǝr gha ma yi ɗak ya ban sǝn kun ma miin ma ɓaal ban shapshik ma yin a mǝs ma ya ɓal gha. Kamam na tuban lina a sǝn ɗap gǝrma zup kun mǝssi ma ɓa, na kunla Krsisti na gallang ma gam ban ɗap gǝrma zup mǝs ma. 15 Ɓi tuban tutumi, mǝs ma ana ban ɓal nggup la Musa, she gǝrma zuɓ ɓaal ya. 16 Ama ɓona kad ma ban Matadla, a fwaɗan gǝrma zub mǝs ma ɓi. 17 Tutumi, Matadla yina Wuus la Koǝl, ban ma Wuus la Matadla gha bana na ban yakmud ka. 18 Ama pyang lasu, ɓoɓo a sǝn zub mǝssi su ɓa, wo gǝrma sǝn mǝssa, Su mwas na ban mwas na gul la Matadla, a kalad ma su ɓi su li dum na ɓan rǝk wo yi. Kalad ma a kalad su mi yunna gulli su ma pur ban Koǝl, ma yina Wusli.