2Cor 4 | JgkSC | STEP | Lakunla wa, ma sǝn shuur la Koǝl na mak ɓisu pak gaan mi i kap ban ɓwaɗan gǝr la Koǝl, ɓaal su gha ɓun ɗa.

2 Corinthians 4

Gǝrɓuk Ma A Shik A Ɓaal Shaˈar

1 Lakunla wa, ma sǝn shuur la Koǝl na mak ɓisu pak gaan mi i kap ban ɓwaɗan gǝr la Koǝl, ɓaal su gha ɓun ɗa. 2 A karkun wana, subinma ɓi ɗarak kun ma ɓi ɓo ɓiki pak ma swaramna, la ɓi ger nzuun; su sen pak gaan la ban swar ɓo ɓa, su gha kalat da kun la Koǝl la. Ama kap ban shik kun mamiin gǝli gǝli, koyab ɓo ɓi shaɓan kun mamiin la su a dum Koǝl a ɓaali. 3 Ama na ɓan shap bwaɗan kun masu shapmi swaramna, swaram na twaɗak i ɓan ɓoɓa ɗap njar ɓan wu. 4 Ya sǝn yak tiˈe ɓa na kunla shedan ma ɓoɓa munza ɓi pa gulli tab ma ɓaalli ɓoɓa sǝn bil Yesu ɓa, ɓe gin sǝn ban mwaˈas la ɓwaɗan kun ma ki shik gul la Kristi ɓa, ma yina jijid Koǝl la. 5 Ba ɓwadan kun ma mudsu na su shappa, ama ɓwaɗan kunla Yeso Kristi na, amud na yina Matadla, su kwad wa byak ɓa lawun na lakunla Yesu. 6 Lakunla Koǝl shaɓan na, Ɓi ɓan mwaˈas a ɓaal tuˈum,” yila mak ɓi ban mwaˈas li mwaˈas i ɓaal su, ɓi kumban pa ban mwaˈas ka ɓi ɓibo ɓe daal gha na ɓiɓo ɓi sǝnǝn gulla Koǝl a kap ban Kristi. 7 Pyang na wa, su ɓa shaangan gǝrba la Wuus la Koǝl, su gussum wo shaˈar ma shik shaangan gǝr. Su nuˈun wama ɓi shikna Koǝl yina mana nyap a mud koyap gǝr, ba suna pak ɓa. 8 A ki gaˈat na su a koyab njar, ama su sǝn purun ɓaal a mud gaan ma ɓa. A mǝs ɓaan suki kumun ɓunun ɓaal ama su sǝn purun ɓaal la. 9 Aki pa ɓung ɓisu koyap njar, ama Koǝl sen shik su ɓa; A ɗaɓam su a wal ma nzaal, pyang la wa a sen wal su ɓi su wu ɓa. 10 Koyab mǝs su kun lu, woma a pak ɓi Yesu, ɓe kum a shik ɓel nǝk la Yesu i kap ban yidsu ma yi wun. 11 Rǝk lasu a munnza mi, su kun lu lakunla Yesu, ɓe kum ban sǝn ban rǝk la Kristi a ɓaal yitsu ma wu. 12 Yina pak na su kun lu, ɓi wun kum ɓǝs ka. 13 Nywangala nggup la Koǝl shapna, “yaˈam tak kunla la Koǝl na pak na shapka”. Su shap kunna Wus ma yak kun ma miin dik, su shap kun mi na kunla su yaˈam tak kun ma. 14 Su daal ma na Yi ma ngaˈat Matadla Yesu i ɓaal ɓa wun, su ɓa Yi ngaˈat na su na Yesu, I yun su kwad i dumi la wun. 15 Mimi pyang a pak ɓi wun kum ban li dum nga, lakunla ɓi ɓo gywak a sǝn ɓwaɗan gǝr la Koǝl ɓe kaak ka ɓi, bi kum yun gulun ɓi Koǝl, har be pa gulli Koǝl.

Ban Rǝk Mud Ɓal Yak Kun Mamiin

16 A mud wa, ɓaal su sǝn ɓun ɗa, ko ma yidsu ɓiki suˈun, wuus lasu yiki kaɗan piɓi koyap mǝs. 17 Lakunla mun ɓung masu ki kyam mi ka gan ɗa, ama ɓi yun na nggalla gul ma bat bat ma ngaˈal ɓung ɓa pyang. 18 Nakunla wa, su sǝn mak mǝsu a mud gǝrɓa ɓiɓo ɓiki sǝnna mǝs ya ɓa, su mak mǝssu a mud gǝrɓa aki sǝn na mus ɓo ɓa. Na kunla gǝrma ɓiɓo ɓi sǝn ma, yi kangar malan, ama gǝrɓa a sǝn ɗa, ka malla