2Cor 5 | JgkSC | STEP | Su mor daal ma na, ya la gwaˈas puk ma mimi, ma yina yidsu ma munnza mi, Koǝl na ngidi i ɓaˈam la ɓi su i tak Koǝl. Lama, ba ɓo na ɓak ɓa ama yi gha ma bat bat.

2 Corinthians 5

KOƏL ƁI PAAN PIP YID TI SU

1 Su mor daal ma na, ya la gwaˈas puk ma mimi, ma yina yidsu ma munnza mi, Koǝl na ngidi i ɓaˈam la ɓi su i tak Koǝl. Lama, ba ɓo na ɓak ɓa ama yi gha ma bat bat. 2 Tutumi so gim, su sǝn njar mǝs ma ɓe mak yidma tak Koǝl ma ɓisu. 3 Lakunla yana maˈam yid ma ɓisu, su gha nuk na lumun yidsu ɓa. 4 A mes ma su nǝk i ɓaal yid ma munnza mi, su ki gim lakunla gaˈad ma su ki pad. Ba su yad ɓe purun yidma munnza mi ɓisu ɓa, ama su yad ɓe mak yid ma tak Koǝl ma ɓisu, lakunla gerɓa ka wuɓa mi, ɓi kalad gǝrma yi wu mi pyang. 5 Koǝl na ngidi yina paksu i shik na kunla pip yid mami, she yi pa Wuus si ɓi su wo mundum la gǝrma miin ma a pad su a dum. 6 Lakunla wa, su gha la nyaɓan ɓaal, su daal na kwad, har su la som na ɓaal yid mi, kisu nad ma na lalsu ma ban Matadla. 7 Lakunla ban nǝk ma ban yak kun ma miin la su pak, ba la sǝn ma mǝs na ɓa. 8 Lang lang su gha la nyaɓan ɓaal, ama ɓa shappi wun su ngaˈal ban yad ɓi su ngeb la yid mi, ɓi su nǝk la Matadla i tak koǝl. 9 Dum na wa pyang, su yat ɓi ɓaal Matadla Puup na su, ko su gha munnza mi ko i takkoǝl. 10 Lakunla lang lang na kap lasu ɓi su jam i dum ban kas nzu la Kristi, ɓi koyab ɓo kum kwad la germa i pak i ɓaal yid mi, ko ma shanga, ko ma ɓyaˈa.

GAAN BAN KO NZWAK ƁIƁO

11 Tun ma su daal ma ban ɓang wup Koǝl, la pak la su ki nyab taksu ban tangas ɓaal ɓoɓaan ɓe ɓang wup Koǝl. Koǝl daal ma su pyang, mi mak ɓaala na kwad na wun dalla wana a ɓaal wun. 12 Har i mǝs mi kwad ba su kak mudsu i dum wun ɗa, she su pa njar ban wal keˈel wun i mud su, ɓi wun kum wama wun kaɗan kun ɗi ɓoɓa ki wal keˈel la germa ya la yi, ba germa ɓaal ya ɓa. 13 Nana ɓi ɓo sǝn wo su ngwar na, to lakunla Koǝl na, Nana su ba ngwar na ɓa, to, ai germa bwaɗan na ɓi wun. 14 Ban yad mamiin la Yesu Kristi i ban su, yi la myel mud ti su, lakunla wa su yaˈam tiˈe kakap, ma ɓomaan wum lakunla ɓiɓo pyang, ashe gussum na kwad, lu yuma mud ɓiɓo pyang. 15 Na kunla yi wun lakunla ɓiɓo pyang, ɓi ɓoɓa yana ɓǝs, ɓe gin kar nǝk ɓa mud ya ɓa i dum, ama be nǝk la ɓoma wu lakun laya. Yi lwak kwad l ɓaal ɓa wun la kun laya. 16 Tutumi, su sheˈem ban sǝn ɓo woma ɓǝsǝn ɓo ɓi sǝni gha, ko ma yin su ki sǝnin Kristi wana, a dum su gha kad sǝni wana ɓa. 17 Lakunla wa, nana ɓo yi ɓaal Yesu, pip ɓo na, geˈes ban pak ger ngar ɓwaram, tutumi, koman gusum piɓi. 18 Pyang mimi kwad pak la Koǝl na, Yi ma ko nzwak su la nggidi i kap ban Kristi, i kad i pa gaan ban ko nzwak ɓi su: 19 Koǝl, i kap ban Yesu, la yi ki ko nzwak ɓiɓo ɓa munnza la nggiɗi. Yi gha ki ɓal ɓibǝn ger i mud ya ɓa. Ama Koǝl paam gaan ban ko nzwak ɓiɓo la yi ɓi su. 20 Lakunla wa, su kar kun Yesu, wato, Wo Koǝl ɓi shap kun ɗi ɓiɓo i kap ban su. Su kam wun lakunla Kristi, ɗeˈes sa nzwak wun la Koǝl. 21 Yi ma sǝn ki pak ɓiɓǝn ger ra, Koǝl kaɗani gǝr ma a dung ban lakunla ɓiɓǝn gǝr lasu, lakunla ɓe kaɗan su ɓoɓa ya pak tektek la Koǝl i kap ban Kristi.