2Cor 7 | JgkSC | STEP | Ɓi nyama ɓa mi yad ya mamiin, tun ma a paˈam shik tak kun ɓa ɓiɓi ɓisu, su gǝb na yid su a mud gǝrɓa ya ta taam na su a yid su ko a ɓaal su. Ɓi rǝk lasu gus ma kyarasa ma tǝktǝk a ɓaal ban ɓang wup Koǝl.

2 Corinthians 7

1 Ɓi nyama ɓa mi yad ya mamiin, tun ma a paˈam shik tak kun ɓa ɓiɓi ɓisu, su gǝb na yid su a mud gǝrɓa ya ta taam na su a yid su ko a ɓaal su. Ɓi rǝk lasu gus ma kyarasa ma tǝktǝk a ɓaal ban ɓang wup Koǝl.

Pup na Ɓaal La Bulus A mud Ɓan Kalat La Ɓoɓa Korinti I Kap Ɓan Bil Kristi

2 Kam na ban yad ma miin ɗi su, su sǝn pak darak kun ɗi ɓoman ɗa, su sǝn dat na ɓoman ɗa, su sǝn yak gǝr la ɓwa man na keˈel la. 3 Sǝn shap wi na kula a nana wun paˈam ɓiɓin kun ɓera, wa ma ɓak shap ka bi wun, wun gǝr ba yat na bansu, ko so na ɓǝs ko su wuun so gǝp ɓǝra. 4 Yaˈam tiˈe na wun shangmi, mi dap muda tak koǝl na kula wun, a ɓaal bung ɓal su kap yida shiina; mi gha na pupna ɓaal. 5 Ma su tu ban a Makidoniya, su sǝn wus sa, a pan bung bisu ko yap kap, suna purma gin aki yal su na lo, a ɓaal mula kwad, su ba ɓaal wap. 6 Ama Koǝl, ma yi pa shiin ɗi ɓoɓa ɓunun ɓaal, yi maˈam ɓi yit su shiin na ba yu la Titus. 7 Ba na kula ba yuli ɓǝra ma, ama woma wun pa shiin ɗi na pwal ɓaal lisu, yi shappisu wama wun yad ban sǝna gha, na pina ɓaal lawun a mud gǝrma pak, na wa ma wun kut tak kaba. Na mak ka na ɓaala puup ka shangmi. 8 Nana diɗan ɗi wun na ɓaal na kula gǝrma nyuwal li wun, ɓaala sǝn pak ngga diil na kula wa mya bera, ɓak ɓaala pina, na kula ndiila na gǝrma nyuwal mya diɗan di wun na ɓaal, ama ba dat la ɓaal wun mya sǝn gan dera. 9 Ko ma gǝrma paˈam woma, mi gha na ɓaal puupna, ba ɓaala puupna na ɓaal suˈun la wun ɗa, ama na kula ɓaal pina la wun maˈam wun ba kalat njar la wun. Wun paˈan ɓaal pina ɓili ma Koǝl li yat, na kula gǝrma su pak ma, su sǝn pak darak kun ɗa. 10 Ɓaal pina ma Koǝl shik ɓi kum su, yiki kalat na ɓo ɓi kat i ban Koǝl, ɓi kum ba yak mud ma miin. ama ɓoma yi ka pak ngga diil la! Ama ɓaal pina ma munza ɓi yuna yi, ɓiki tangassa lu. 11 Sǝn na byal ɓaal pina ma Koǝl shik ɓi kum wun yuna yi. Yi maˈam wun kamam banma wun sǝn pak tǝktǝk ɓa. Yi maˈam wun pak ɓaas, wup wal wun kwad. Maˈam ɓi wun mak ɓaal wun sǝn yad mud wun ɗera. Wun rǝk ma diˈisa nakunla ɓi wun tangas kitti ko yap ɓoma pak darak kun wama ɓwadka. A ban mi, wun kamam na a koyap njar wun sǝn pak darak kun ɗa. 12 A mǝs ma nywangal nggup ma yin ɗi wun,sǝn sheela na ɓoma pak darak kun ma ɓa, sǝn sheela na ɓoma a pak darak kundi ɓa. A karkun wana, nywangal na, Koǝl daala na wun maˈam sheel lawun a mudsu shangmi. 13 Na kula wa mya na ɓaal su shiin nga, takkwad ɓaal shiin na ma su kum, ɓaal su pup na shangmi, na kula pup na ɓaal ma Titus kum, wun yaˈan ma yi shangmi ma wun pa nyap pi. 14 Nan ɗi na, muɗa tak koǝl na kula wun, na kunla wun sǝn pa nzuun ɗa ɓǝra, wa ma pyang gǝrma su shappi wun, miin na, wa mya na ban wal keˈel su na wun a dum Titus ma miin na. 15 Titus ɓi yaɗan wun shangmi, tun ba yina rangaas ma wa ma wun bil kuli gha ɓa, na gul ma wun pa ɓi, a mǝs ma wun yiˈi gha na wup na yid ɓinin ta. 16 Ɓaala pupna na kula nyaˈam tiˈe na wun shangmi.