2Cor 8 | JgkSC | STEP | Marak mi ɓi nyima, su yat ti wun diil ɓwaɗan gǝr ma Koǝl pa ɓi ɓoɓa ɓil Yeso ɓa Makidoniya.

2 Corinthians 8

Ba Pa Na Ɓaal Ɗik La Ba Bil Kristi

1 Marak mi ɓi nyima, su yat ti wun diil ɓwaɗan gǝr ma Koǝl pa ɓi ɓoɓa ɓil Yeso ɓa Makidoniya. 2 Koma ya ɓaal bung shangmi nakula ɓaal wangan ma ya kum mudya ɓaali. Pyang na wa, she ɓaal pupna laya ma gullun mak ya ki pak ɓwadan gǝr ɓi ɓiɓo a kap ban pa gǝrɓuk ɓal ya, ko ma ya ɓaal gal tǝr. 3 Ndila na ya pa a tak shiin laya, har tan ɗi shiin laya ma. A pan na yaɗan ɓaal ya ɓoman sǝn mak ya na keˈel la. 4 Yana kam su ɓi su shikya ɓe pak gaan ma yaˈan ɓoɓa kyarasa la Matadla ɓa nzal Yahudiya. 5 Ya pa gǝr ɓuk ya ma mwat taɓi wa ma su rangas ka. She ma ya pa mud ya bi Matadla, kasa na ya pa mudya ɓisu, wama Koǝl yad ka. 6 Ma su sǝn wana su kam Titus, ɓi li dum na gaan ban ram gǝrma ɓi ɓo pa na yaɗan ɓaal mi, ma yina swap tak ban ram. 7 Tun ma wun na gang dum a mud koyap gǝr, a ban mak ɓaal lawun a mud Kristi, a kun ma shaɓan, na ba diil lawun, na ba yad gaan la Koǝl, na wama wun yat su gha mamiin. Nakunla wana su yad ti wun li dum na byal ban pa gǝrɓuk lawun na yaɗan ɓaal. 8 Sǝn shappi wun wa kun keˈel na ɓera, ama na kula ba kam nyap tak la wun nga na la ɓo ɓaan, ɓi su daala na, na kula wana, ɓi kaman ɓyal yad lawun ma miin na. 9 Wun daal la ɓwaɗan gǝr la Matadla Yeso Kristi. Ko ma ye na gǝrɓuk, ama yi kadan mudi ɓi nǝk tǝr na kula wun. Na kunla ɓi wun nǝk ɓa gǝrɓuk a dum Koǝl a kap ban tǝr li. 10 Ama mud kun ma mimi, gǝrma sǝn yina, sham ɓi wun li dum na gǝr ma wun swab tiˈe a bak ma ku, na kunla wun paan na ɓaal wun dik, ba ɓoman na mak wun na keˈel la. 11 Nakunla wana, pak ni gǝrma gam na shiin lawun, malasa gaan ma ɓaal wun ɗappi wun. 12 Na wun nga na ɓaal ma pa gǝr ɓuk la wun, ɓaal Koǝl li pulan na gǝr ma wun pa, ma wun na pam a tak shiin la wun. Koǝl gha yad ɓi wun pak gǝr ma shiin la wun sǝn ka ɓera. 13 Su gha yad ban mak gǝrma sǝn ngaˈal la ɓi ɓoɓan, she su mak ma ngaˈala ɓi wun ɗa, ɓi koyap gǝr rǝk tǝktǝk. 14 Ama na kula bya gǝp gaan mya tǝktǝk, she wun yaˈan ya na ma tutumi, tun ma wun nga na njar ɓan yaˈan ya. Wun kwad a mǝs ma wun nga na yi ɓa, ya kwad ya gha nayi, she ya bya ya yaˈan wun gha. Ban pak wana ma na ko yap gǝr ɓi nǝk ka tǝktǝk. 15 Wa ma a nywangal gha ɓal Kunla Koǝl na: “ɓo ma ram ^▼▼gywak, sǝn modti ɓa, ɓo ma yi ram shung, sǝn kiit ti ɓa”.

Titus na ɓi Liˈi

16 Su kaˈam bi Koǝl, wo ma yi mak ka ɓaal Titus ɓi yaˈan wun nga wama yad ban pak ka. 17 Yi sǝn kaa ban wun na kunla suna kaami ɓa, ama yina nggiɗi na yad ban kaa ban wun, 18 Su tumun yi ɓi kaa ana nyimsu a ban wun, yi ma koyap ban raam la ɓoɓa bil Yeso, ɓi ki kak ɓi nakunla ban shap ɓwaɗan kun la Koǝl. 19 Ba wa mya nggalang ɓǝra, ban ram la ɓoɓa bil Yeso ɗangɗang zaab nayi ɓi ki kaa na su a mud gaan gǝr ɓwaɗan ma mi, ma su pak nakunla ban pa gul li Matadla. Ban pak wana ɓi kaman na su mak ma ɓaalsu na su yaˈan na wun. 20 Su gha yat ti ɓoman gin sang su a mud woma su pak ka na gǝrɓuk wun ma wun pa ɓi su na ɓaal wun mwak ɓa. 21 Su nyap tak yidsu ɓisu pak kunma tǝktǝk ka , ba a dum Koǝl nggalang ɓǝra, ama har dum ɓi ɓo kwad. 22 Su ba tum nyimsu masu pyaˈas mayi tiˈe ɗang ɗang naya, su sǝnǝm nyap tak li, marak mi ma, i tam bi wa ma ye a takwat, wana kwad yi yaˈam tiˈe na wun shangmi. 23 Wun na rangas ma na, Titus ngga ban pak gaan lana, su pak gaan ma ɓi wun. Tiˈes ɓi nyim ɓa yana yi, ban ram ɗang ɗang la ɓoɓa ɓil Yeso na tum ya, gaan ma ya pak ma kwad ɓi ki yunna gulli Kristi. 24 Nakula wa mya, kam na yad mamiin ɗi ɓoɓa ɓiɓi, i mud na ban ram la ɓoɓa bil Yeso ɓa tumya ya waˈan gǝrma wun pak, ɓe daal wal keˈel ma su gha nayi a mud wun mi miin na.