2Ti 1 | JgkSC | STEP | Mi Bulus, Koǝl la tara ɓa nggus muntum la Kristi Yeso, lakunla ɓa shap kun la Koǝl ma i pak alkawari na yi paan wuussi ɓo i kab ban Kristi Yeso,

2 Timothy 1

1 Mi Bulus, Koǝl la tara ɓa nggus muntum la Kristi Yeso, lakunla ɓa shap kun la Koǝl ma i pak alkawari na yi paan wuussi ɓo i kab ban Kristi Yeso,

2 Ɓi Timotawus, ɓola ma mi yiɗi shangmi: Mi kam Koǝl Tad su la Kristi Yeso Matadla la su ɓe yad la ɓe pa sambarka ɓu, a sun shuuru, la ɓe mak ɓu kum ɓaal nwangan.

Ban pa shiin yid ɓi pak tǝktǝk

3 Mi kaak ɓi Koǝl, ma mi dwangat ti wa la ɓi kaak su, la ɓwaɗan rangas bum. Duk la tangal sun ki wuussa mi ki kam Koǝl lakunlu . 4 Mi la rangas ma mirǝn lu, she nzal ban kad sunu wala, lakunla ɓi ɓaala pwal gha shangmi. 5 Rangas ma yak kun mamiin i mud Kristi Yeso ma wu la yi, ɓyal yak kun ma kǝ’u Loyis la ngguu Afiniki yin nga la yi. Ma’am ɓaal na wu gha la yi kwad. 6 Lakunla wa mi yad ɓu rangas ban ki pak gaan na gyaal ma Koǝl paaɓu ma yin mak ɓuk ɓu i mud. 7 Lakunla Koǝl sun pa wuus wuppi su ɓa, ama yi paan wuus la nyap, la yad ban la ban bwal mud.

8 I mud wa, ɓi nzuun ban shap kun la Matadla laa su gan wulu ɓa, ko nzuun mi ma a ma’a i ɓaal nda ma gib ɓo lakunla Yeso. Ama la nyap ma Koǝl pa ɓu, pangat muɗu na mi ɓi su li dum na ban bung lakunla ɓwaɗan kun li. 9 Yi ma yak mud su i tu’ul su ɓi su nǝk i ɓaal ɓwaɗan ma yi yad, ba lakunla ɓwaɗan gǝrmaan ma su pak na ɓa ama lakunla gǝrma i kud i ɓaali la yad li la sambarka li. Yad la sambarka la Koǝl mi a paan ɗi su i kab ban Kristi Yeso kasa ki ban swabtak munnza, 10 ama tutumi a shi’im ɓo gha kab ban yu la Kristi Yeso ma yak mudsu. Yi la ɓun nyap la wu i mwaas njar ma kum wuus la nǝk ma badbad i kab ban ɓwaɗan kun ma i yuun. 11 I mud ɓwaɗan kun mi la a tara ɓa ki shappi ɓo la ɓa nǝk muntum la Yeso la ɓa ki shik ɓo gha. 12 Yi na pak ma mi bung nga mi. Ama nzuun sun wala ɓa, lakunla daal na ɓoma mak ɓaal i muɗi, nya’am kuni na yii waɗan gǝrma shik i bǝni ɓi tuban i Lib ma.

Timotawus la ɓwaɗan kun

13 Wad ɓwaɗan kun ɓa wu wak i bana, la yak kun mamiin la yad ma ɓaal Kristi Yeso. 14 Shik kid ɓwaɗan gǝrma a paaɓu, shik kid ka Wuus la Koǝl ma nǝk i ɓaal su ɓi bilin na wu.

15 U daal ma na koyab ɓoɓa kab ɓa nzaal Asiya ɓiin ma mi na ɓi Faijelus na Hamojenis sa.

16 Ɓi Koǝl sun shuur la la Siporus, lakunla yi wad ti yu shiin yidta kinikini, nzuun sun wuli na a mak na mi nda ma gib ɓo ɓa. 17 Ama ma yi tuban a Roma yi yal ban na mi she ma yi koma. 18 Ɓi Matadla mak na yi kumun sun shuur li i lib ma! Wun daal na ɓwaɗan gǝrɓa i pak ɓa i Afisa.