2Ti 4 | JgkSC | STEP | I dum Koǝl na la Kristi Yeso, ma yi na rang nzu ɓi ɓiɓo ɓa ɓǝs na ɓa wun, Yi kǝr kaɗan yi wnang rangan li, mi tangas kid tu na:

2 Timothy 4

1 I dum Koǝl na la Kristi Yeso, ma yi na rang nzu ɓi ɓiɓo ɓa ɓǝs na ɓa wun, Yi kǝr kaɗan yi wnang rangan li, mi tangas kid tu na: 2 Shap kun la Koǝl; pak yiɗu i koyab mǝs; ɗǝ’ǝs, tangas kid, pa shiin yidti ɓiɓo la bwal ɓaal la ban shik ban jingjing. 3 Lakunla mǝs maan ɓi yuun ma ɓiɓo gha takid ya ɓi ɓwaɗan gǝr ma a shik ya ɓa. I karkuni she ya raam ɓiɓo ɓa shik ya la gǝrɓa ɓaal ya yad. 4 Ya pilǝt kid ya ɓi kun ɓa miin ɓe kumban pilǝp wak zangan nga. 5 Ama wu wad yiɗu a koyab gǝr, wu taa ɓaalu i bung ma nuu, wu pak gaan la ɓoma shap kun la Koǝl ma ɓwaɗan tǝktǝk, pak pyang gaan ma Koǝl pa ɓu.

6 Lakunla ɓaala ka mud ban swab mud gǝr dung na, mǝs ban wu la yuum tuu. 7 Walam lo ma ɓwaɗan, malas ma miir ma, waɗam yak kun mamiin tǝktǝk. 8 Tutumi a shi’im lada ma pak tǝktǝk ɓa, ma Matadla ma rang nzu tǝktǝk ɓi paaɓa i lib ma, ba ɓi mi na nggalang na a pa lada ma ɓa, ama ɓi pyang ɓoɓa yaltak ban taa pur li.

Tǝ’ǝs kun ma shaɓan

9 Pak yiɗu ɓu yu i bana na tak ban, 10 nakunla Dimas yi yiɗan gǝrɓa munnza, yi ɓang shik ma yi kaa ma Tasalonika. Karaska yi kaa ma Galatiya, Titus kwad yi kaa ma Dalmatiya. 11 Luka ɗik na su na yi. Ɗab Markus wun yu na yi, nakunla yi ya’an na mi na gaan la Koǝl. 12 Tumum Tikikus i Afisa. 13 Wu na ban yu, yu na luut ma zub yid ma shik a ban Karibus a Tarawusa, na gǝr ngywangalla. mi yaɗan mamiin ma a gywangal mud nggup ma.

14 Iskandari ɓo ma tul bwal mi yi pa’an nggala ɓi’in gǝrra. Matadla na kwad kun gǝrma i pak ɓa. 15 Wu ma wad jing na yi, nakunla yi ɓiin ma kun la su shangmi.

16 Ma shap kun ma yak mwaɗa ma ɗik ɓomaan sun kudtak ɓa ɓa, she ɗat la ya ya ɓang sha’a. Mi kam Koǝl ɓi gan kad te i mud ta. 17 Ama Matadla zǝ’ǝt tuu naa mi, yi shiin yidta nakunla a shap kun li shangmi ɓi pyang ɓoɓa Yahudawa na ɓa wak. La a ya’a i kun mbwar. 18 Matadla ɓi ya’an mwaɗa i takɓuk koyab ɓi’in gǝr yi kaa na mi i ban nwang rangan li i takkoǝl. Ɓi gul lii gus ma badbad. Ɓi Koǝl yak ti’i.

Lak ban ma malas kuni

19 Wu lak ɓi Bilkisu na Akila, na ɓoɓa la la Onisifaras. 20 Aratas zǝ’ǝt ma a Koranti. Tarofimas ka la ɓǝssa, shik mi Milita. 21 Pak yiɗu ɓu yu kasa ki byang ko. Aubulus na Budis, na Linas, na Kalaudiya, na pyang ɓi nyim ya ban lu’u.

22 Ɓi Matadla nǝk la wu. Sambarka na yad la Koǝl nǝk la pyang la wun.