Act 1 | JgkSC | STEP | Tiyafilus, i ɓaal nggup la maaku, ngywangal na pyang gǝrɓa Yeso swabtak ban pak, la gǝrɓa i shik ɓo gha,

Acts 1

A ɗaɓam Yeso i takkoǝl

1 Tiyafilus, i ɓaal nggup la maaku, ngywangal na pyang gǝrɓa Yeso swabtak ban pak, la gǝrɓa i shik ɓo gha, 2 she ma tuban i lib ma a ɗiɓi i takkoǝl. Kasa ki a ɗiɓi i takkoǝl, i shaɓam ɗi muntum ɓa li ɓa i tar ya, i kap ban Wuus la Koǝl, gǝrɓa ye pak. 3 Takwad bung li, she i purun yiɗi ɓi ɓo ɓiɓi sǝni. I pak gǝrɓa mak ɓe daal gha na, i lwak ma ɓaal kilǝk. I taa purre i nwang ɓa taɓi lumi yiin, yi ki shap kun i mud ban nwang rangan la Koǝl. 4 Ma i yin ɗi li gǝrliin la ɓi muntum ɓa li, she i shappe na, “Gan shik na Urshalima ɓa, ama nǝk na ɓi wun kumban yak gǝrma Taɗa shap na yi paan ɗi wun, wama nyin shap ka ɓi wun mi. 5 Yohana pak baptisma la yam, ama i ɓaal nwang gap ɓa yu, ye pa’an baptisma ɓi wun la Wuus la Koǝl.”

6 Takwad wa, ma ɓi muntum ɓa li raam i ban ma mwak, she a ɗwa’ari na, “Matadla, wu kaɗan na ban nwang rangan la Isrela tutumi ne?”

7 Yeso shappe na, “Ban daal tangal ko lyang ɓa gǝrɓi ɓi pakka, ba la wun na ɓa. Tad ma yi mwak la mak la nyap li. 8 Ama wun kumun nyap ma Wuus la Koǝl la yuuma mud wun; wun la shap kun laa i Urshalima, la Yahudiya pyang, la Samariya, la koyab ban i munnza.”

9 Takwad ma i shap kun mi, she a ɗiɓi i takkoǝl ki ye ban suni she ma yul zuɓi a sun kǝr suni ɓa.

10 Ye mud ban sun takkoǝl, ki yi yap laama, she ɓoɓaan rwap, ɓa mak puupna lu’ut i yid ya, taa pur. 11 Ɓoɓa rwap ɓa, shap na, “Ɓoɓa Galili, wake ki wun jaam ɓi sun takkoǝl? Yeso mi, ma a ɗiɓi i ɓaal wun, a saan i takkoǝl mi, yi kaɗan, wama wun sun ban yap li i takkoǝl mi.”

A tar Mataya i karkun Yahuda

12 She a bwa’al shik taal Zaitun, a kad i Urshalima i mud kwa’at ya. Sa kwa’at ma ya’an i lib Asabar. 13 Ma a tuban, she a yab i nda ma mud nda i ban ma a nǝk ka. Ɓoɓa raam i bana naa ɓi Bitrus la Yohana, la Yakubu, la Andarawus, la Filibus, la Toma, la Batolamawus, la Matta, la Yakubu ɓola Alfayus, la Saminu Zaloti ^{▼▼Zaloti yi na ɓoma yad ban yak mud la nzaal ko yi na ɓoma pak buk nzaal li ma ɓwaɗan}, la Yahuda ɓola Yakubu. 14 Pyang la ya a pangat mud ya a ki kam Koǝl ndwang, la maam ɓa, la Maryamu nggala Yeso, la ɓi nyimǝn Yeso ɓa bid.

15 I ɓaal nwang ɓa, Bitrus lwak i jaam i ɓaal ɓo lumi lum la lumi rwap ɓa yak kun mamiin la Koǝl. 16 She i shap na, “Ɓi nyama ɓa ɓaal Kristi, gusum na kun la Koǝl ma Wuus li yin mak Dauda ɓi shap, i mud Yahuda ma pa nggur Yeso ɓi walan kuni. 17 Yi gha ɓaal su, a tar mi ɓi pak gaan la Koǝl la su.”

18 La wurup ma a pa ɓi Yahuda i mud ɓi’in gǝrma i pak, she i kur pu’ul, bana la i tuko gha, yiɗi ngat, she ɓi tuuɗi ^{▼▼tutuɗi ko tuuɗi} pyang, pur a swap, i nzaal. 19 Koyab ɓo i Urshalima wak kun mi, she a tu’ul pu’ul ma i ging la ya na, Akaldama, yi na, “Pu’ul kil”.

20 Bitrus li dum la ban shap na, “A ngywangal i ɓaal nggup Zabura na,
‘Ɓi la li gus ɓo gha ɓaali ɓa;
ɓi ɓomaan gan nǝk i ɓaali ɓa,’ ^{▼▼Sun kwad: Zab 69.25.}

la,
‘Ɓi ɓomaan gus i karkun gaan li ma ban bil la ɓo.’ ^{▼▼Sun kwad: Zab 109.8.}

21 Lakunla wa, nǝ’ǝm ɓi su i ki’il, ɓi su tar ɓomaan, i ɓaal ɓoɓa ki ɓaal su, ki su la ɓi Matadla Yeso. 22 Ɓi gus na ɓoma i ɓaal su, swabti’i ki Yohana pak baptisma ɓi tuban i lib ma a ɗab Yeso gha i ɓaal su. Ɓi ɓo ma gus ɓoma shap kun, i mud ban lwak li ɓaal kilǝk, wa lasu.”

23 I mud wa, she a purun ɓo rwap. Ɓo rwap ɓa naa ɓi, Yusufu ma ye ki tu’uli na Barsaba ko Yustus, la Matayas. 24 She a kam Koǝl na, “Matadla, Wu la daal ɓaal koyab ɓo. I ɓaal ɓo rwap ɓi, shik su la ɓoma u tar, 25 ɓi li dum la ban pak gaan la ɓi muntum ɓa la Yeso ma Yahuda bwa’al i shik, i ɓeer i bana ya’ani.” 26 She a mak beed i mud ɓo rwap ɓa, la a tar Matayas, a pangat la muntum lum ko mwak ɓa.