Acts 16

Timotawus pangat ma mud la Bulus la Sila

1Bulus yu a Darba na Listra, ɓomaan nga bana ma yi ki bil lu’i na Timotawus. Ɓola nggallap la Yahudawa ma mak ɓaal i kun la Koǝl, ama tǝɗi ɓoma Helassa na. 2Ɓi nyim ɓa bil Yeso a Listra na Ikoniya shap na yi ɓoma kaan na. 3Bulus yad na ɓi kaa na yi i kyan she i pwan dum ɓi, nakunla ɓi Yahudawa ɓa kab ɓa daalla na tǝɗi ɓoma Helassa na. 4Wama a ki bil ɓi nggala gari, she a shap kun ma ɓi muntum ɓa la Yeso na ɓoji ɓa ɓaal Urshalima kud shik ɓi ɓoɓa kum bil gha. 5She Ikkilisiya ɓa shiin i yak kun mamiin, she a ki bǝl koyab lib.

Bulus la ɓoma Makidoniya

6Bulus la ɓoɓa yi la ya ɓeer i nzaal ɓa kab Firijiya la Galatiya, amud na Wuus la Koǝl ɗa’am ya la ban shap kun la Koǝl i nzaal ɓa kab Asiya. 7Ma a tuban i lǝr Misiya a yad ɓe ko i ɓaal Bitiniya, ama Wuus la Yeso ɗak ya gha. 8Lakunla wa she a yaar i gyangat Misiya la a dwang tuban i gari Taruwasa. 9I ɓaal duk she Bulus lwat na ɓomaan i Makidoniya jaam yi kǝmi, yi ki shap na, “Dal ɓu yu Makidoniya ɓu ya’an su gha.” 10Takwad lwat la Bulus ma, she su pak yid su ɗyang ɓi su kumban kaa i Makidoniya, na su ɗab i ɓaal su na Koǝl la tungǝl su ɓi su shap ɓwaɗan kun ɓi ya.

Lidiya ya’am kun mamiin

11Su shik Taruwasa, she su ko a ɓaal kurlukbiin na su ɗab njar ɗes su tuban a Samotraki. Ma duru kwad na su kaa a Niyapolis. 12Ban shik bana na su tuban a Filibi, nggala gari na ma takɓuk nwang rangan la Roma ma gul taanɗi tǝ’ǝs gari ɓa kab nzaal Makidoniya. Su nǝk i bana ɓa nwang ɓaan.

13A lib Asabar su pur i takwad ban ma ko i ɓaal nggal gari ma, su kaa a sal a ban ma su rangas sa a ki kaman Koǝl gha. She su rǝk na su swabtak ban shap kun ɗi maam ɓaan ɓa raam i bana. 14Maam maan na ma lu’i na Lidiya, yi ki ɓwarassa lu’ut shuni a nggal gari ma Tayatira, yi pak dwangat ti Koǝl. Matadla woos ma ɓaal li, ɓi kumban shikkid ka amud gǝrma Bulus ɓi shap. 15A mǝs ma a pak baptisma ɓi na ɓoɓa la li pyang, she yi kam su yi shap na, “Wun na sunum na mi ɓoma mak ɓaal i mud Matadla na, yu ni ɓaal la la, wun rǝk ka.” Ma i shap wama she i nu mudti su.

Bulus na Sila i nda ma gib ɓo

16Lib maan ki su kaa i ban ma kam Koǝl, she ɓyaak mun maan ma la ɓi’in kwa’ar ruub na su, la ɓi’in kwa’ar ma la yi ki shap gǝrɓa pak i dum. Yi ki raam wurup pi ɓa tǝɗi la ban shap gǝrɓa pak i dum. 17Mun mi bil takwad su na Bulus, yi ki ngam i ki shap na, “Ɓo ɓi ɓyaak ɓa la Koǝl ma taɓi koyab koǝl na, a na shap kun ɗi su i mud njar ma yak mud.” 18Yi ki shap wana ma nwang gywak. She ɓaas wal Bulus na yi pilǝt yiɗi yi shappi ɓi’in kwa’ar ma na, “La nyap ma ɓaal lwak Yeso Kristi, pur shik yiɗi!” Na yi pur naama ɗarama.

19Ma ɓi matad mun ma sun na njar ban kum wurup la ya ɓwaram, she a bwal ɓi Bulus na Sila tangas ya kaa na ya a ɓaal kaso, a dum ɓoɓa nwang rangan. 20A yu na ya a dum ɓi ɓoji la ɓoɓa shap nzu, la a shap na, “Ɓo ɓiɓi Yahudawa na, a ban ki nga’at ɓaal li ɓoɓa nggala gari la su mi, 21ya ki shap ɓi su pak gǝrɓa ba pak la su Romawa na ɓa.”

22Ɓoɓa raam a bana ɓa lwak ɓe Bulus na Sila a mud, she ɓi ɓoji ɓa la ɓoɓa shap nzu mak na ɓi wup lu’ut ti ya i yid, ɓi wal ya kwad. 23A takwad ma a walam ya shangmi, she a mak ya ɓaal nda ma gib ɓo, na a mak kudnggin ma gib ɓo ɓi suntak ɓe shangmi. 24Ma i wak wama, she yi mak ya a ɓaal matak nda, yi mak ya turu. 25A kap mudkid duk, Bulus na Sila ka mud ban kam Koǝl ya watti twang nggyal, a ki kaak ɓi Koǝl. Ɓoɓa ɓaal ban ma ki wak ya. 26Wa ban taap mus na she nzaal dǝ’ǝs yiɗi shangmi pyang la tak nda ma gib ɓo ma dǝ’ǝs. Kun nda ɓa na nggiid ya woos ɗyang-ɗyang, nggur lyang ɓa a kud ɓoɓa gha zwat tuko. 27Kudnggin ma gib ɓo ma lwak i tulu yi sun kun nda ɓa gib ɓoɓa woos ma, she yi tangas nggala njangat li ma dǝlǝn ▼

▼dǝlǝn ko lyap

i shi’im tuu ɓi wal muɗi ɓi wu, lakunla pa’an ɗi wa ɓoɓa a gib ya ɓa ɓangam. 28Ama Bulus ngam na shiini yi shap na, “Nggin wal muɗu ɓa! Pyang laa su su gha bǝni!”

29Na kudnggin ma suntak ɓi bana gib ɓo ma shap na ɓe yu na bǝs ma sun ban. Yi ɓang ko ɓaal mwala, yiɗi ki ɓin yi tuko i dum Bulus na Sila. 30She yi purun ya a nza she yi maas ya na, “Wun ɓoji ɓi, mana mi pak ɓa kum yak mud ka?”

31She a kaɗan ɗi na, “Mak ɓaal i mud Matadla Yeso, wu kumun yak mud, wu na ɓoɓa la lu.” 32Na a shap kun la Matadla ɓi na pyang ɓoɓa la li. 33Na yi kaa ra ya a mǝs ma ɗarama na duk ma, na yi gus byang ɓa la ya; sun ganɗa takwad wa na a pak baptisma ɓi na pyang ɓoɓa li. 34Kudnggin ma gib ɓo ma kaa na ya i ɓaal la li yi pa gǝrliin ɓi ya li; ɓaali pwal shangmi lakunla i ma’am ɓaali i mud Koǝl, yi na ɓoɓa li pyang.

35Ma duru kwad, she ɓi ɓoji ɓa la ɓoɓa shap nzu tum ɓi nggala kudnggin ɓi kudnggin ma gib ɓo ma na: “Mak ɓoɓa.” 36Kudnggin ma gib ɓo ma shappi Bulus na, “Ɓi ɓoji la ɓoɓa shap nzu ɓa tumum ɓi mak wu na Sila. Naam ɗarami kaari. Kaari na ɓaal pwalan.”

37Ama Bulus shappi ɓi nggala kudnggin ɓa na, “A walam su i dum ɓoɓa bǝlǝn a sun shap nzu ɓi su ɓa su kwa ɓoɓa Roma na. A dab ɓuk su i nda ma gib ɓo. Naam ɗarami a yad ban mak su ɓi su kaa ɓi ɓo sun daal la? Ka pak ɓa! Shik ya ɓe yu na nggiid ya a purun su.”

38Ɓi nggala kudnggin ɓa shap kun ma mimi ɓi ɓoji ɓa la shap nzu ɓa, she wup wal ya ma a wak na Bulus na Sila ɓoɓa Roma na. 39She a yu ban ya ɓe kumban maas ya ɓe zub mbuk ɓe na ban purun ya i nda ma gib ɓo. Ɓi ɓoji ɓa la shap nzu shappe kaa shik nggal gari ma. 40Takwad ma Bulus na Sila pur a ɓaal nda ma gib ɓo, na a kaa i la la Lidiya ban ma a kum ɓi nyim ɓa bil na a shiin yid tiya. She a kaa.