Acts 19

Bulus i Afisa

1Ki Apolos i Korintos, Bulus bil njar ɓa kab ban ɓa mud ɓi ɗing yi yu Afisa. Bana na yi kum ɓoɓaan ɓa mak ɓaal i mud Yeso. 2She yi maas ya na, “Wun ya’am Wuus la Koǝl i mǝs ma wun mak ɓaal wu?”

She ya na, “Hayo, su sǝn wak na Wuus la Koǝl maan nga ɓa.”

3She Bulus maas na, “Yap ɓyal baptisma na a pak ɓi wun?”

Ya kaɗan ɗi na, “Baptisma la Yohana.”

4Bulus shappi ya na, “Baptisma la Yohanna yi na baptisma ma yak tubi. Yi shappi ɓoɓa ɓe yak ɓoma yu i takuɗi, wato Yeso naa ma.” 5Ma ya wak shap mi, she a pak baptisma ɓi ya i ɓaal lwak Matadla Yeso. 6Ma Bulus mak ɓu’i i mud ya, she Wuus la Koǝl dwang ɓe i mud, she ya shap kun i las ɓaan ya ki shap gǝr ɓa ban Koǝl. 7Pyang la ya ɓo lum ko ɓaari na.

8Ma lyang taat Bulus ki ko i ɓaal nda ban raam la Yahudawa yi ki shap kun i mud ban nwang rangan la Koǝl i woma ɓoɓa yak na miin na. 9Ama ɓoɓaan i ɓaal ya ka la mud yoman; a ɓiin ban mak ɓaal i mud Yeso a shap ɓi’in kun i mud Njar ma Koǝl shappi ɓo bil i dum bǝlǝn ɓo. Lakunla wa she Bulus shik ya. Yi kaa na ɓoɓa ki bil Yeso i ɓaal nggala nda ma Tiranus ki shap kun na ɓi bǝlǝn ɓo yi ki ta ɓaal kun na ya i koyab lib. 10Yi ki pak wa ma byang ɓaari, ɓi pyang Yahudawa na Hellenawa ɓa nǝk i ɓaal Asiya kumban wak kun la Matadla.

11Koǝl pak ɓi gǝr sheel ɓa jiinjiin ɓa ɓo sun ki sun ɗa a kab ban Bulus, 12har ma a na ɗaɓan kun lu’ut ko summa ma duli a kaa na yi ban ɓoɓa yidkwanan, she yidkwanan ɓa ɓwar, a gǝb na ɓi’in kwa’ar ɓa.

13Yahudawa ɓaan dwangal ya ki purun ɓi’in kwa’ar a yad ban pak wami i kab ban tungǝl lwak Matadla Yeso i mud ɓoɓa ɓi’in kwa’ar gha yid ya. A shap na, “I ɓaal lwak Yeso ma Bulus shap kun li, naam na ɓi wun pur.” 14Ɓoɓaan nga kyastaat ya na mun ɓa la Lisakawa, daatban ma mudkid la Yahudawa na, ya waki pa’an wa mi. 15Lib maan, she ɓi’in kwa’ar ma kaɗan ɗi ya na, “Daal la Yeso, daal la Bulus kwad, ama wun, wun yana?” 16She ɓoma la ɓi’in kwaar ma yal i tuko ɓiya i mud shiin li taɓi la ya pyang. Yi swabtak ban wal ya, yi wal ya shangmi she ma ya ɓang shik la ma na lumun yid na kil i yid.

17Ma ɓi Yahudawa na Helenawa ɓa nǝk i Afisa daal pak ma mimi, she wup wal ya, lwak Matadla Yeso kwad kum gul shangmi. 18She Ɓoɓa bǝlǝn ɓa mak ɓaal i mud Yeso ki yu a ki shap ɓi’in gǝr ɓa a ki pak gǝligǝli. 19Ɓoɓaan ɓa bǝlǝn ɓa ki pak mbu’un yuun ngup ɓa la ya, a toon i dum ɓiɓo pyang. Ma ya pak wurup nggup ɓa a kum wurup Azurfa ma kun gaan tangal ma lumi lum ti’i lum la lum ti’i twangan. 20Wana na kun la Matadla kaa koyab ban yi gul na nyap. 21Takwad pak ma mimi pyang, she Bulus kud i ɓaali na yi kaa na Makidoniya na Akaya yi tuban i Urshalima. Yi shap na, “Ri’ǝm ɓa ki’il ɓa kad i Roma takwad ma mi na kaa ma banaaku.” 22She yi tum na ɓo ɓaari i ɓaal ɓa a pak gaan na yi ɓe kaa Makidoniya. Ya na ɓi Timotawus na Erastus. She yi nǝk ji gang i Asiya.

Ban nga’at ɓaal ɓi ɓiɓo i Afisa

23I mǝs mama she gǝr ɓa nga’at ɓaal shangmi swabti’i i mud Njar ma. 24Ɓomaan nga ma tul azurfa a tungeli na Dimitiriyus, yi na pak ɓi mbasak la la azurfa ɓa wa la la maam koǝl Artemis na. Ɓyal gaan ma ɓi yuun na wurup gywak ɓi ɓoɓa pak gaan ma; 25Yi tungǝl pyang la ya ban ma mwak, la ɓi ɓoɓa pak ɓyal gaan ma. Yi shappi ya na, “Ɓoɓi, wun daal ma na su kumun wurup shangmi i mud gaan mi. 26Wun sunum, wun wa’am woma ɓo mi Bulus kaɗan ma rangas kun la ɓiɓo, yi pilǝt ma ɓoɓa bǝlǝn i Afisa la ban ɓa kab Asiya pyang. Yi ki shap na koǝl ɓa ɓiɓi ma a pak na ɓuk ya koǝl na ɓa. 27Ba ɓo ɓi shaɓan ɓi’in kun i mud gaan ɓuk laa su mi kaɗe ɓaa ma ɓiɓo somna pa gulli la la Artemis maam koǝl la, yi ma na nggiiɗi ma a dwangat ti i Asiya na munnza pyang. A gǝɓǝn yi na gulli la ki’il.”

28Ma ya wak shap ma, she ɓaal ya twak, ya swabtak ban nga’at ging ya na, “Artemis la Afisawa na majiin!” 29Sun ganɗa she ɓoɓa ki ngam i koyab ban i ɓaal nggala gari ma bǝl. She ɓoɓa bwal Gayus na Aristakus, ngga ban kaa ken la Bulus tun i Makidoniya. Ya pwan miir na ya wa ɓo mwak na ya ko i bana ɓoɓa nggala gari ma ɓi ki raam gha. 30Bulus yad ti pur i dum bǝlǝn ɓoɓa raam ɓa, ama ɓoɓa mak ɓaal ɓa ɗak na yi. 31Wana na ɓoɓaan ɓa jiin i kab ɓa Asiya, ɓi lak ɓa la Bulus na a tum ɓi na ɓi gan yu i bana ma ɓoɓa nggala gari ma ɓi ki raam nga ɓa.

32Mud ɓoɓa raam ɓa kud: Ɓaan nga’at ging ya ki shap kun ɓaan, ɓaan kwad shap kun ɓa ɗang. Ɓoɓa bǝlǝn sun daal mana yu na ya i bana ɓa. 33Yahudawa ɓa tud Alekzanda ɓi pur i dum, la ɓoɓaan i ɓaal ɓa raam ɓa shap kun ɗi. She i nga’at ɓu’i ɓi ɓo mwad yang ɓi kumban shap kun ma purun muɗi i dum ɓoɓa. 34Ama ma a daal na yi Bayahudi na, she pyang la ya nga’at ging ya wama awa ɓaari, a na: “Artemis la Afisawa na majiin!”

35Ɓo ma ngywangal gǝr ma gari ma mak ɓoɓa raam ɓa ɓe mwad, la i shap na: “Ɓoɓa Afisa, ba munnza pyang daal ma na ɓaal gari Afisa la ki sun tak ɓi la la Artemis majiin la jujut li ma tuko i takkoǝl la? 36Lakunla wa, ma ɓo gha gamban ɓiin kun ɓi ɓa, ya’an na ɓi wun mwad gan kangar na i mud ban pak gǝr maan ɗa. 37Wun yuun ma ɓoɓi i bǝni, ba a ya’an gǝr la ki’il i la la koǝl ko a shaɓan ɓi’in kun i mud maam koǝl la. 38La na, Dimitiriyus la ɓoɓa yi la ya ɓa ki pak ɓyal gaan li ka la kun maan i mud ɓomaan, ɓoɓa shap nzu la ban ɓa shap nzu ka taani, she a saan shap la ya i bana. 39Laa na, gǝr maan ma ye yad ɓi kas nzu ɓe i muɗi suma, she a saan i dum ɓoɓa kas nzu ɓa raam. 40Wup wal ma i mud na ye bwalan su la ban nga’at ɓaal li ɓo i liina mi. Lakunla su gha gamban shap gǝr ma mak ki ɓaal ɓo lwak ka ɓa.” 41Takwad shap mi la i masak ɓoɓa raam ɓa.