Acts 22

Bulus shap kun ma purun muɗi

1“Ɓi nyim ɓa bid la ɓi tad, taana kid wun ɓi wun wak gǝrma mi shap i mud kun ma a shap i mwaɗa.” 2Ma ya wak yi shap kun ɗe i ging Ibraniyawa she ya mwad kyas.

3She Bulus shap na, “Mi Bayahudi na, a ɓil na i Tarsus ma Kilikiya, ama gul i gari mimi. A shik ma shangmi la nzu la ɓi tad su i dum Gamaliel, mi gha na ɓi’in buk i mud kun la Koǝl wa la koyab ɓo i ɓaal wun i liina. 4Paam bung ɓi ɓoɓa bil Njar la Yeso she ma a wu. Ki bwalam ɓi bid na ɓi maam ki mak ya ɓaal ban gib ɓiɓo. 5Ɓi Daatban Majiin la ɓi ɓoji ɓa raam ya gamban shaɓan kun mi i mwaɗa. Ki ya’an nggup ɓa a ngywangal i ban ya kaa ra ya i Damaskus ɓi ɓi nyim su Yahudawa. ki kaa ma bana ɓa kumban yu na ɓi ɓoɓa bil Njar la Yeso wa ɓoɓa a gib ya i ɓaal nda ma gib ɓo na i Urshalima ɓi pa bung ɓe.

6“Ma yu tuu la Damaskus na mudkid tangal, she bǝs ma mwaas ban pur i takkoǝl mwaas ban ma mi gha. 7She tuko i nzaal wak ging maan shappa na, ‘Shawulu! Shawulu! Mana pak ma wu pa bung ɓa?’

8She maas na, “‘Wu yanna Matadla?’

Yi kaɗan na, ‘Mi na Yeso ma Nazarat, ma wu pa bung ɓa.’ 9Ɓi ngga ban kaa ken la sun bǝs ma mwaas ban, ama a sun ta ɓaal ging ɓoma shap kun na mi ma ɓa.

10“She maas na, ‘Mana mi pak Matadla?’ She Matadla shap na, ‘Lwak, wu kaa ɓaal Damaskus. Bana na a shap ka ɓu pyang gǝrma wu pak.’ 11Ɓi ngga ban kaa ken la bwal ɓwa’a ya kaa na mi ɓaal Damaskus lakunla ban mwaas ma ma’am ɓi mwasa taap.

12Ɓomaan ma a tungǝli na Hananiya yu ɓi kumban suna gha. Yi ɓoma bil nzu la Musa tǝktǝk na, ɓi Yahudawa ɓa bana ya ki paan gulli. 13Yi jaam gyang yaɗa yi shap na, ‘Nyama Shawulu, kumban sun ban lu!’ Nama ɗarama she bwal ban sun ban.

14“She Hananiya shappa na: ‘Koǝl la ɓi tad su taram wu ɓu daal gǝrma yi yad, na ɓu sun Ɓo ma pak tǝktǝk i dum Koǝl, wu wak kun ma pur ɓaal kuni. 15Wu gusun ɓoma shap kun i muɗi ɓi ɓiɓo pyang, i mud gǝrma wu sun na ma wu wak. 16Tutumi mana wu yal? Lwak, ɓe pak baptisma ɓu la ɓe gus ɓǝsǝn kun lu i kab ban tungǝl lwak Matadla.’

17“Ma kad i Urshalima, ki mi kam Koǝl i La la Koǝl, she kum mwaɗa wa mi lwat. 18She sun Matadla ɓi shap kun, yi shappa na, ‘Shik Urshalima tutumi, lakunla ya yak kun ma wu shap i mwaɗa ɓa.’

19“She kaɗan ɗi na, ‘Matadla, ɓo ɓiɓi daalla na ki kaa ma nda ban raam la Yahudawa ɗangɗang ki mak ya ɓaal nda ma gib ɓo ki wal ɓoɓa mak ɓaal i muɗu kwad.

20A wal Istifanus ɓi wu lakunla i shaɓam kun lu. Ma a wuli mi gha bana, ya’am ti’i ɓe wuli mi na suntak ɓi lu’ut ɓa la ya.’

21“She Matadla shappa na, ‘Kaa; Mi tumun wu ban ma naatna i ɓaal ɓoɓa Yahudawa na ɓa.’”

Bulus Ɓoma Roma na

22Ɓoɓa raam ɓa ki wak Bulus she ma yi shap na yi kaa na ban ɓoɓa Yahudawa na ɓa. She ya nga’at ging ya, a shap na, “Gan shik na ɓo mi ɓi rǝk munnza ɓa! Yi sun ya’an ban rǝk ɓa!”

23Ki ya mud ban nga’at ging ya, ye ki ɓuk lu’ut ɓa la ya, ya ki myas nzaal i takkoǝl. 24She komanda la kudnggin mak ɓe kaa na Bulus ɓaal ban nǝk la ya. Yi na ɓe wuli ɓe maasi ɓe kumban daal gǝrma pak ma ɓoɓa bǝlǝn mi ki ngaat ging ya ɓi i muɗi. 25Ma a kuɗi ɓe kumban wuli gha, she Bulus shappi nggala kudnggin ma jaam i bana na, “Nzu la su ya’am ti’i ɓu wal ɓoma Roma ma a sun kumi na tǝr ban bil nzu ɓa?”

26Ma kudnggin ma wak wami, she yi kaa shappi komanda la ya ma na, “Mala wu yad ban pak mi? Ɓo mimi ɓo ma Roma na.”

27She komanda ma ɓeer i ban Bulus la i ɗwa’ari na, “Shappa wu ɓoma Roma na?” Bulus kaɗan ɗi na, “Aa, mi ɓo ma Roma na.”

28She komanda ma shap na, “Kwaɗan ban nǝk ɓoma Roma na nggala wurup.” Bulus kaɗan ɗi na, “Laa a ɓil na ɓoma Roma.”

29Ɓoɓa yad ban ɗwa’ari kangar shik bana. Komanda ma na nggiiɗi gǝrma sheeli ma yi daal na yi ma’am Bulus ɓoma Roma, ɓe kuɗi la nggur lyang.

Bulus i dum ban raam la Ɓoji

30Ma duru kwad, komanda la kudnggin ma yad ban daal gǝrma pak ma Yahudawa ɓi shap kun i mud Bulus. Yi mak Bulus she yi mak ɓe raam ɓi daatban ɓa mudkid na ɓi ɓoji ɓa kang la Yahudawa. She yi yu na Bulus yi mi’i ɓi jaam i dum ya.