Act 3 | JgkSC | STEP | Libmaan Bitrus la Yohana, ye yap pi ɓeer i La la Koǝl, i mǝs ma kam Koǝl, i bwal taat ma tangal laama.

Acts 3

Bitrus pa ɓǝs si kam gǝr ma nggurum na

1 Libmaan Bitrus la Yohana, ye yap pi ɓeer i La la Koǝl, i mǝs ma kam Koǝl, i bwal taat ma tangal laama. 2 Ɓomaan nga tun i ban ɓili yi nggurum na. Koyab lib ye ki shi’i ɓi nǝk i ban ko i ɓaal la la Koǝl, ma a ki tu’uli na Ɓwaɗan. I bana la yi ki kam ɓoɓa ko gha i ɓaal ban ɓa yid la la Koǝl. 3 Ma i sun Bitrus la Yohana ma ye ko, she i kam ya ɓe pa wurup pi. 4 Bitrus la Yohana sun nda mushi shangmi, she Bitrus shap na, “Sun su!” 5 She ɓoma sun ya rii, i mak ɓaali na yi kumun gǝrmaan i ban ya.

6 She Bitrus shappi na, “Zinariya ko azurfa mi gha la yi ɓa, ama gǝrma mi gha la yi la mi paaɓu. I ɓaal lwak Yeso Kristi ma Nazarat lwak ɓu sa kwa’at.” 7 She i bwal kun ɓuk ɓi, i nga’aɗi, la ɓuk ma li, kwa’aɗi la mud nzum kwa’aɗi kangar nyap. 8 Ɓoma taa i yal, i jaam i mud kwa’aɗi, i swabtak ban sa kwa’at. She i ɓeer la ya i ɓaal ban ɓa yid la la Koǝl ma. I sa kwa’at, i ki yal, i ki pa gulli Koǝl. 9 Ma ɓi ɓo pyang suni yi sa kwa’at i ki pa gulli Koǝl, 10 she mud ya pwan i mud na, yi na ɓoma yin ki nǝk i ki kam gǝr i ban ko i ɓaal la la Koǝl, ma ye ki tu’uli na Ɓwaɗan mi. She gǝrma sheel ɓoɓa shangmi.

Bitrus shap kun i la la Koǝl

11 Ma kam gǝr ma bwal ɓi Bitrus la Yohana, she sheel ɓoɓa pyang la ya, la a ɓang a yu, i ban ma, ye ki tu’uli na, Butu la Sulemanu. 12 Ma Bitrus sun wami, she i shappe na, “Ɓoɓa la ɓa Isrela, wake ki gǝrmi sheel wun? Wake ki wun swab mus i mud su wa la nyap laasu, ko ban ɓang wup koǝl laasu, la su gamban mak ɓomi ɓi sa kwa’at ka? 13 Koǝl la Ibrahim, la Ishaku, la Yakubu, Koǝl la ɓi tad su, la pa gul li ɓyaak li, Yeso. Wun pa yi ɓi wuli ɓi wu, wun ɓiini i dum Bilatus ma ɗap i ɓaali na yi shi’in Yeso ɓi ɓeer. 14 Wun ɓiin yi ma Koǝl tum, yi ma pak gǝr tǝktǝk. She wun shap na, ɓi mak ɓoma wal ɓo ɓe wu ɓi wun. 15 Wun wal ɓoma pa wuus ɓi wu, ama Koǝl nga’aɗi ɓaal ɓa wun. Su sunum la mus su. 16 La yak kun mamiin i ɓaal lwak Yeso, la ɓomi ma wun sun, wun daal, kum shiin yid ka. Yak kun mamiin i ɓaal lwak Yeso la pa ɓǝs si, wama wun sun na mi.

17 “Tutumi ɓi nyama ɓa bid, ndaal ma na wun pa’an gǝrɓi i ɓaal tǝr daal, wa la ɓi ɓoji ɓa la wun. 18 Ama wami la Koǝl pak gǝrɓa i yin shap na yi pa’an, i takkun ɓi muntum. I shap na Kristi li ɓi bungǝn. 19 Shik na ɓǝsǝn kun ɓa la wun, wun yak Koǝl, lakunla ɓii zub mbuk ɓi wun. She Matadla mak mǝs ma wun tu piiɓi. 20 Yi tumun la Kristi, ma a kud a shik lakunla wun, wato Yeso. 21 Kristi ma ɓi nǝk na takkoǝl, she mǝs la yuum ɓi Koǝl kaɗan koyab gǝr, wama i kud ban pakka ma yin koko, i kab ban ɓi muntum ɓa li. 22 Musa shaɓam na, ‘Matadla Koǝl, ɓi mak muntum li ma wa mi, purun i ɓaal ɓoɓa la wun. Gǝrɓa yi la shaɓam ɓi wun pyang, pak na. 23 Koyab ɓo ma sun ta kiɗi, i wu’i ɓa, ye purun na yi ɓaal ɓoɓa li.’”

24 Bitrus li dum la ban shap na, “Pyang ɓi muntum, swab ti’i mud ɓi Sama’ila ɓi li dum, ɓa yin shap kun, shaɓam gǝrɓa pak i tangal ɓa su gha ɓaali ɓi. 25 Wun na ɓoɓa li mbud la ɓi muntum ɓa la Koǝl, la sheentak ma Koǝl pak la ɓi tad wun. Koǝl shappi Ibrahim na, ‘I kab ban mun ɓa lu, la pyang ɓoɓa munnza ɓi kum sambarka gha.’ 26 Ma Koǝl nga’at ɓyaak li, she i tumi i ban wun kasa, lakunla ɓi wun shik ɓi’in njar ɓa la wun, wun kum sambarka gha.”