Acts 4

Bitrus la Yohana i dum ɓi ɓoji.

1Ki ɓi Bitrus la Yohana i mud ban shap kun ɗi ɓo, she ɓi daatban, laa majiin la kudnggin ɓa ki suntak ɓi La la Koǝl, la ɓi Sadukiyawa yu i bana. 2Ɓaal ya su’um lakunla ɓi muntum ɓa, shik ɓo gha na Yeso lwak ma ɓaal kilǝk, a dab ki shap kwad na, ban lwak i ɓaal wu ka. 3She a bwal ɓi Bitrus la Yohana, ama lakunla kurup na, she a gib ya ɓi duru kwad kasa. 4Ama bǝlǝn ɓoɓa wak kun laya ma, mak ɓaal ya muɗi, she bǝl la bid ɓa sa lumi lum ti’i lum njiri twangan.

5Ma duru kwad, ɓi ɓoɓa nwang rangan, la ɓi ɓoji, la ɓoɓa shik nzu pangat i Urshalima. 6Ɓi Hananiya daatban majiin ka bana, la Kayafa, la Yohana, la Iskandari, la ɓoɓaan ɓa ɓoɓa la daatban majiin na.

7She a mak ɓe yuun Bitrus la Yohana i dum ya. La a ɗwa’ar ya na, “La nyap make, ko la lwak yan, la wun pak gǝr mi gha?”

8She Bitrus ma Wuus la Koǝl bil la yi, shappe na: “Ɓoɓa nwang rangan la ɓi ɓoji ɓa mud ɓo! 9Laana wun tu’ul na su i liina, ɓi su shap kun, i mud ɓwaɗan gǝrma su pak, ɓi nggurum mi, wun dab ban ɗwa’ar su, wama i kum ɓǝs ka, 10she wun la pyang ɓoɓa Isrela, daal na: La lwak Yeso kristi ma Nazarat, ma wun zǝd i mud nggun, ama Koǝl nga’aɗi i ɓaal kilǝk, la ɓomi kum ɓǝs ka, la i gamban jaam nga i dum wun. 11Yi wa, “‘Taal ma ɓoɓa daal ban ɓak ban ɓiin na, yi la gus i kun gǝngǝr ban.

12Yak mud ka kum yiɗi i ban ɓomaan ɗang ɓa, Lakunla lwak ɓomaan na ma a pa i munnza ɓi ɓo kum yak mud ka ɓa.”

13Ma ɓi ɓoji ɓa sun na wup, sun wal Bitrus la Yohana ɓa, dab ban pwan ɗe i mud na, a daal ban ɓal gǝr shangmi ɓa, ya ɓoɓa nggur na. She gǝrma sheel ya, she a wad i ɓaal ya na, ɓoɓi pangat ma mudya la Yeso. 14Ama ma ya gha ban sun, ɓoma kum ɓǝs ma, jaam na i dum ya, gǝrmaan na ma ye gamban shap i mud ya ɓa. 15Lakunla wa, she ɓi ɓoji ɓa, mak ɓe ɗab ɓi Bitrus la Yohana i dum ya. La a li dum la ban shap ɓaal kun ma. 16A ɗwa’ar na, “Wake la su pakka la ɓo ɓi? Koyab ɓo i Urshalima daal ma na, ɓo ɓi pa’am nggala gǝr sheel, su gha gamban ɓiin ɗa. 17Ama lakunla ɓi ɗak gǝrma pak mi, la ban yak ban, su tangas kid ti ɓo ɓi, na ɓe gan shap kun ɗi ɓomaan i mud Yeso ɓa.”

18She a kad a tu’ul ɓi Bitrus la Yohana, a mak ya na ɓe gan shap kun, ko a shik ɓo, i ɓaal lwak Yeso ɓa. 19Ama ɓi Bitrus la Yohana kaɗan ɗi ɓi ɓoji ɓa na, “Wun sun na tǝktǝk na, ɓi su pak gǝrɓa wun mak su gha, ki su sun pak la Koǝl la? 20Nǝ’ǝm ɓi su i ki’il ɓi su li dum la ban shap gǝrɓa su sun, la gǝrɓa su wak.”

21Ɓi ɓoji ɓa sun kum gǝrma ye pa bung nga ɓe ɓa, she a tangas kid ti Bitrus la Yohana shangmi, la a mak ya ɓe ɓeer. A sun gamban jaam i mud ɓyal bung ma ye paaɓe ɓa, lakunla pyang la ɓiɓo, ɓi pa gul li Koǝl i mud gǝrma pak.

22I mud na ɓoma a pa ɓǝs si, i njar ma gǝr sheel ma, byang li taan ɗi lumi yiin.

Kam Koǝl la ɓoɓa bil

23Ma a mak ɓi Bitrus la Yohana, she a kad i ban ɓoɓa laya, a zat pyang gǝrɓa ɓi daatban ɓa mudkid, la ɓi ɓoji shappe. 24Ma a wak wama, she pyang laya, nga’at ging ya, a kam Koǝl. A shap na, “Matadla, wu ma pak takkoǝl, la nzaal, la nggala shiim, la ɓi gǝrɓa ɓaal ya pyang.

25U shap mimi ma Wuus lu mak ɓyaak lu, kaak su Dauda shap na: “‘Wake ki ɓaas wal ɓoɓa tak ya ɗangɗang ɓa munnza, ɓi ɓo kwad, ki kud kun i mud gǝrɓa nggur?

26Ɓi rangan ɓa munnza, pak yid ya, a pangat mud ya, la ɓoɓaan ɓa nwang rangan, ɓe kumban wal lo gha, la Matadla la kristi ma i tum.’

27Mamiin su daal ma na, gǝrɓa u yin shap pa’am, lakunla rangan Hiridus la Buntus Bilatus pangat ma mud ya, la ɓoɓa Yahudawa na ɓa, la ɓoɓa Isrela ɓi nggyak, ɓyaak lu Yeso ma u tar.

28A raam ma mud ya ɓe kumban pak koyab gǝrma u yin shap na ɓi pa’an i kab nyap lu la yad lu. 29Lakunla wa, Matadla sun wama a shap na, ye paan bung nga ɓi su, she wu ya’an ɓi ɓyaak ɓa lu, ɓi su shap kun lu, la bung shiin na.

30Naat ɓu’u ɓu pa ɓǝs, u mak ɓi pak ɓi gǝr sheel la lwak ɓyaak lu Yeso ma u tar.”

31Takwad ban kam Koǝl la ya, she ban ma ya gha ma dǝ’ǝs ▼

▼dǝ’ǝs ko dǝngǝl

. La Wuus la Koǝl wal ɓaal ya, she a shap kun la Koǝl la shiin ɓaal.

Ɓoɓa Yak kun gǝp gǝrɓa ya laya

32Pyang ɓoɓa yak kun la Yeso, gus la ɓaal mwak i gǝrɓa a rangas la ɓa a yad. Ɓomaan sun shap na, gǝrɓa yi la ya, ɓa li na mu’i ɓa, ama i karkuni, she a ki gǝp gǝrɓa ya laya ɓi biib ya. 33La nggala nyap ma Wuus la Koǝl pa ɓe, she ɓi muntum ɓa, li dum la ban ki shap na, Koǝl ma’am ɓi Matadla Yeso lwak i ɓaal kilǝk. Koǝl swap sambarka li gywak, i mud pyang la ɓoɓa yak kun ma. 34Ɓomaan na ɓaal ɓoɓa yak kun ɓa, ma la tǝr gǝrmaan ɗa. Ɓoɓa ya gha la ɓi pu’ul, ko ɓi la, ɓwaran a yuun wurup ɓa, 35a pa ɓi, ɓi muntum ɓa la Yeso. She muntum ɓa la Yeso ɓa, gǝp wurup ɓa, ɓi ɓoɓa yak kun ɓa, i mud wama a yad ka.

36Ye gha mud wa, she Yusufu ma ta’a la Lawi, ɓoma Kubrus na, ɓi muntum ɓa, ki tu’uli na Barnaba, amud na, yi ki ma’an ɗi yid ɓo shiin na. 37I ɓwaran pu’ul li, i yu pa wurup ma ɓi muntum ɓa.