Act 6 | JgkSC | STEP | I ɓaal nwang ɓa, ma ɓoɓa ki bil Yeso ɓa ki bǝl, she Yahudawa ɓa Heleniyawa ɓa ɓaal ya ki rung kun. Rung kun ma na Yahudawa ɓa Ibraniyawa na, ya gha ki pa gǝrliin ɗi bwa’ar maam ɓa la Yahudawa ɓa Heleniyawa ɓa, wama ya’an na ɓa.

Acts 6

Ban tar kyastaat ɓa

1 I ɓaal nwang ɓa, ma ɓoɓa ki bil Yeso ɓa ki bǝl, she Yahudawa ɓa Heleniyawa ɓa ɓaal ya ki rung kun. Rung kun ma na Yahudawa ɓa Ibraniyawa na, ya gha ki pa gǝrliin ɗi bwa’ar maam ɓa la Yahudawa ɓa Heleniyawa ɓa, wama ya’an na ɓa. 2 Lakunla wa, she ɓi muntum ɓa la Yeso lum ko rwap ɓa raam pyang ɓoɓa ki bil Yeso ɓa, a shappe na, “Sun pak tǝktǝk, ɓi su shik ban pak gaan kun la Koǝl, lakunla ban pa gǝrliin ɗa. 3 Ɓi nyama ɓa bid la ɓa nggalap, tar na bid kyastaat i ɓaal wun, ɓa wun daal ma na, Wuus la Koǝl la bil la ya ɓa mud ya pwanam. Suu paan gaan ban pa gǝrliin mi ɓe, 4 lakunla ɓi su kumban mak ɓaal su, i ban kam Koǝl, la ban pak gaan kun la Koǝl.”

5 Kun ma a kud a shik mi, mak ɓi ɓaal ɓo nwang. She a tar Istifanus ma la gulun yak kun mamiin, Wuus la Koǝl kwad la bil la yi, la Filibus, la Burokoras, la Nikanar, la Timan, la Barminas, la Nikolas ma pur i Antakiya, ma yin ki bil njar bil Koǝl la Yahudawa. 6 A pa ɓo ɓiɓi, ɓi muntum ɓa la Yeso. Ɓi muntum ɓa la Yeso ɓa, kam Koǝl, a mak ɓuk ya ɓi ɓoɓa i mud.

7 Lakunla wa, she kun la Koǝl yak ban. Ɓoɓa ki bil Yeso kwa i Urshalima ki bǝl. Daatban ɓa bǝl kwad, a ki pak gǝrɓa ɓaal yak kun mamiin ma.

A bwalam Istifanus

8 Istifanus ɓomaan na ma Koǝl pa nyappi ɓi pak nggala ɓi gǝr sheel i ɓaal ɓiɓo. 9 Ama ɓoɓaan ɓa ɓaal nda ban raam la Yahudawa ɓa kum mud ya swabtak ban shakkid la Istifanus. Ya na ɓi Yahudawa ɓa Kuraniyawa, la Iskandariyawa, la ɓa kab ɓa nzaal Kilikiya la ɓa Asiya, 10 ama a sun gamban shap kun ɓa ta ɓi la Istifanus sa, lakunla Wuus la Koǝl la mak ki i shap kun ɓa gha, i ɓaal sak.

11 She ɓoɓa swaram, a swar ɓoɓaan ɓe shap na, “Su wak ma Istifanus shaɓam ɓi’in kun i mud Musa, la Koǝl.” 12 I mud wama, la a nga’at ɓaal la ɓi Yahudawa ɓaan ɓa, pangat la ɓi ɓoji, la ɓi ɓoɓa shik nzu. She a bwal Istifanus, la a yuuni i dum ɓi ɓoji ɓa kang la Yahudawa ɓa. 13 She a yuun ɓoɓa shap ngwangwa i muɗi. Ɓoɓa shap na, “Ɓomi liim dum la ban ki shap ɓi’in kun i mud La la Koǝl, la nzu ma Koǝl pa ɓi Musa.

14 Su wak ma i shap na, Yeso mi ma pur i Nazarat shap na, yi gwa’as La la Koǝl, yi ma’an ɓi su nǝk ɗang la wama Musa shik ɓi kaak su ɓe nǝkka.”

15 Ki pyang ɓoɓa nǝk i kang ma, ki sun Istifanus shangmi, she a sun ma kun mussi pilǝp ma, wa la muntum la Koǝl na.