Acts 8

1Shawulu gha bana, yi ya’am tak ban wuli ɓi wu.

Ikkilisiya masak nakunla bung

A lib ma dini ma, nggala bung ko i ɓaal ikkilisiya i Urshalima, na pyang ɓi ɓo masak a ɓeer i Yahudiya na Samariya. She muntum ɓa li Yeso na sun masak ɓa. 2Ɓoɓa ɓang wup Koǝl limǝs Istifanus, a rǝk ɓo lu li na piina ɓaal. 3Ama Shawulu swabtak ban myaras ikkilisiya. Yi ko la-la, yi ki bwal bid na maam yi mak ya ɓaal ban gǝb ɓo.

Filibus a ɓaal Samariya

4Ɓoɓa a pid ya ɓe masak ɓa, ki shap kun la Koǝl, a ban ma ya kaa pyang. 5Filibus kaa gari maan i Samariya, yi shap kun la Kristi i bana. 6Ma bǝlǝn ɓi ɓo wak gǝrma Filibus shap, a sun gǝr sheel ɓa yi pak, a ki ta kid ya rii, ɓe wak gǝrma yi shap. 7Na ɓi nyam ▼

▼nyam ko ngam

ɓiɓin kwa’ar pur i ɓaal yid bǝlǝn ɓiɓo, bǝlǝn ɓoɓa kwa’ar nuun kus ya na ɓi nggurum lwak na kus ya, a kumum ɓǝs. 8Ɓaal ɓoɓa nggala gari ma pwal shangmi.

Siman ma ki pak mbu’un

9Ɓomaan nga i gari ma, a tungli na Siman, yi ganam yi ki pak mbu’un, gǝrɓa yi pak sheel la ɓoɓa Samariya. Yi ki wal ki’ili na yi nggala ɓo na. 10Pyang ɓoɓa bana ɓi ɓoɓa jiinjiin na ɓa gap-gap a wa’an kid li. She a na, “Ɓo mi nyap la Koǝl na ma a tungli na Nyap Majiin.” 11A ki bili nakunla yi ganam ban ki pak gǝrɓa sheel ya na mbu’un ɓa li. 12Ama ma a mak ɓaal i ɓwaɗan kun ma Filibus shap i mud ban nwang rangan la Koǝl na lwak Yeso kristi, she a pak baptisma ɓiya, bid na maam. 13Siman na nggiiɗi mak ɓaal la a pak baptisma ɓi. Na yi ki bil Filibus koyab ban, ɓi nggala gǝr sheel ɓa yi sǝn Filibus ki pak sheeli.

14Ma ɓi muntum ɓa la Yeso a Urshalima wak na ɓoɓa Samariya ya’am kun la Koǝl, she a tum na Bitrus na Yohana ɓiya. 15Ma ya tuban, ya kam Koǝl ɓi ya ɓe kumban yak Wuus la Koǝl, 16nakula Wuus la Koǝl sun dwang i mud maan i ɓaal ya kasa ɓa; baptisma na a yin pak ɓi ya nggalang a ɓaal lwak Matadla Yeso. 17She Bitrus na Yohana mak ɓuk ɓi ya i mud, na a yak Wuus la Koǝl.

18Ma Siman sǝn na ɓi muntum ɓa la Yeso na ma’am ɓuk ɓi ɓiɓo ya kumun Wuus la Koǝl, she yi yad ban pa wurup pi ya. 19Yi na, “Paani nyap pa nakula koyab ɓoma mi na ma’am ɓuk ɓi i mud ɓi yak Wuus la Koǝl.”

20Bitrus naɓina, “Wu la wurup lu wun ɓwaran, I mud na wu sun wo ki wu kur ban daal ban pa Wuus la Koǝl na wurup! 21Wu sun gamban ko i gaan ma mimi ɓa, nakula ɓaalu ka tǝktǝk a dum Koǝl la. 22Yak tubi amud ɓi’in kun mi, kam Matadla. Ɓaan na yi zuɓum mbuk ɓu i mud ban rangas ɓyal kun mi i ɓaalu. 23Sǝnǝm na wu gha na ɓiɓin buk ɓǝsǝn kun lu kud ma wu.”

24She Siman kaɗan ɗi na, “Kam Matadla ma ɓa, lakunla mi gha yadti gǝrma wu shap mi, kuma ɓa.”

25Takwad ma Bitrus na Yohana shap ɓwaɗan kun la Matadla, she a kad i Urshalima. A mud njar ban kad ma a ki shap kun la Koǝl ɓi ɓiɓo a gari ɓa Samariya.

Filibus na ɓo ma Habasha

26Muntum la Matadla shappi Filibus na, “Ɗab njar ma pur Urshalima, kaa i Gaza. Njar ma ɓaal zum ma ɓo gha ɓa.” 27Filibus lwak yi kaa, yi ruub la nggala ɓoma Habasha maan ma dumi gha ɓa, yi na ɓoma shik gǝr ɓa la Kandakatu, rangan la ɓoɓa Habasha. Ɓo mi pur i Urshalima ban pak dwangat ɓi Koǝl, 28yi gha mud njar ma kad kaa la, yi rǝ’ǝn i ɓaal amalanke ma pǝrǝs ɓi tangas, yi watti ɓal nggup la Ishaya Muntum la Koǝl.

29Wuus la Koǝl shappi Filibus na, “Lwak, kaa jaam tuu na amalanke ma.”

30She Filibus ɓang kaa ban amalanke ma la yi ki wak ɓoma ɓi ɓal nggup la muntum Ishaya. She Filibus maasi, “Wu pwanam ɓaal gǝrma wu ɓal mi?”

31Ɓoma shap na, “Mi pwan ɓaali wo kya? She ɓomaan na taam ɓaali ɓa kasa.” She yi tungǝl Filibus ɓi ko rǝk na yi ɓaal amalanke ma.

32Ɓo ma dumi gha ɓa ma ɓalan ban ma a ngywangal i ɓaal kun la Koǝl ma shap na,
“A buli wo nzuura, a kaa ra yi ban ma a kǝssi,
la woma mun la nzur a dum ɓoɓa mo ngywang yiɗi mwad yang,
i mud wana ma yi sun ta kuni ɓa.
33A sun karani kun gǝrmaan ɗa, a sun bil kus nzu li tǝktǝk ɓa. Ya na shap kun ta’a li? A ɗaɓam ti’i ban rǝk a munnza.

34Ɓoma Habasha ma maas Filibus, yi na, “Kusuk shappa, muntum la Koǝl ma ɓi shap kun a muɗi ko a mud ɓomaan ɗang?” 35She Filibus swabti’i na kun la Koǝl ma yi ɓal. La yi shap ɓwaɗan kun la Yeso ɓi.

36Aa mud ban kaa, a njar ma, she a kaa ban yam maan. Ɓoma Habasha na, “Yam na bǝni mi, mana pak ma wu gha pak baptisma ɓa ɓa? 37[She Filibus shappi na, “Wu na ya’am na ɓaalu pyang, a pa’an ɗu.” La i kaɗan, yi na, “Ya’am, Yeso Kristi Ɓola Koǝl na.”] 38Yi mak ɓi amalanke jaam. A dwang kaa ban yam ma, she Filibus pak baptisma ɓi. 39Ma a pur ɓaal yam ma, she Wuus la Matadla ɗap Filibus ɓap. Ɓoma Habasha ma sǝn kǝr sǝni ɓa, ama ɓaali pwal shangmi. 40A takwad wana, she Filibus kum muɗi a Azatus. Yi ki ko i ɓaal gari ɓa pyang, yi ki shap ɓwaɗan kun la koǝl gha ɓe, she ma i tuban i Kaisariya.