Gal 1 | JgkSC | STEP | Nggub mimi pur bana mi Bulus muntum la Yeso Kristi. Ba ɓǝsǝn ɓo ɓaan na tar mi ɓa, ko ɓomaan na pak ɓa, ama Yeso Kristi na Koǝl tadsu ma ya’aɗi ɓaal ɓa ɓawun na zab ɓa.

Galatians 1

Ban lak ban

1 Nggub mimi pur bana mi Bulus muntum la Yeso Kristi. Ba ɓǝsǝn ɓo ɓaan na tar mi ɓa, ko ɓomaan na pak ɓa, ama Yeso Kristi na Koǝl tadsu ma ya’aɗi ɓaal ɓa ɓawun na zab ɓa. 2 Ɓoɓa suna ya a bini pyang ana ɓa lak bǝlǝn ɓoɓa bil Yesu ɓa raam na a Galatiya. 3 Ɓi ɓwaɗan gǝr la Koǝl na polan ɓaal la Koǝl tadsu na Matadla Yeso Kristi bil la wun. 4 Yeso Kristi ma pa muɗi nakunla ndarak kun ɓalsu, ɓi kumban yakmud su gha a ɓaal ɓiɓin kun ɓa munnza. Yi pa’an mimi a mud ban yad la tadsu Koǝl. 5 Ɓi ban pa gul rǝk li ma badbad, ɓi Koǝl yak ti’e.

Ɓwaɗan kunla Koǝl ma miin

6 Gǝrɓa wun pak ɓi sheel mami shangmi. Aɓaal mǝs gap wun komban shik ɓoma tungul wun akap ban ɓwaɗan gǝr la Kristi, wun ki bil kun maan ma ɗang la Ɓwaɗan kunla Koǝl. 7 Ɓwaɗan kun la Koǝl maan nga ma ɗang ɓa. Ɓoɓaan ki ndo’ot ɓaal wun, ayad ban kalad miin na ɓwaɗan kun na Kristi. 8 Ama ko suna, ko mayak tak tum la Koǝl ma pur takkoǝl, na shaɓan kunmaan ma ɗang ɓiwun, ɓi Koǝl mak ɓe ta gǝr nggur ma badbad. 9 Woma su yin shabka ɓiwun, mi kǝr shaɓan ɗiwun kwad, ɓoman na shaɓan kunla Koǝl maan ɗiwun ma ɗang na ma wun yak ti’e, ɓi Koǝl mak ɓe ta gǝr nggur! 10 Mi shap kun ma mimi ɓi ɓiɓo yak tiˈǝ gha na mi galang wu? Ayo, gǝrma mi yad yina, ɓi Koǝl yak tiˈe na gǝrma mi pak. Wun sǝn wo mi yad ban pak gǝrma yi pwol ɓaal ɓi ɓiɓo wu? Ayo, kana mi yad ban pwalan ɓaal li ɓiɓo, ngga sǝn rǝk ɓyak la Kristi ɓa.

Koǝl na tungul Bulus Ɓi Rǝk Muntum Li

11 Ɓi nyama, mi yad tiwun daal na, Ɓwaɗan kunla Koǝl mami shappi wun mi, ba pur ban ɓǝsǝn ɓo ɓa. 12 Ba aban ɓǝsǝn ɓo na yak ka ɓa, ba ɓoman na shab tiˈe ɓa ɓa. Yeso Kristi na nggiɗi na wos mǝssa ɓa sǝn gha. 13 Wun wa’am woma yin mi gha, a ɓaal ban bil Koǝl la ɓoɓa Yahuda. A mǝs ma dini, jam ma shangmi i mud ban pa bung ɓi ɓoɓa ki ram na ɓa bil Yeso, har mi yad ban tatak ɓiya katikati. 14 Wun daal la kwat woma, a ɓaal ban bil Koǝl la ɓoɓa Yahuda, yaalla bǝlǝn ɓiɓo ɓasu gulla ya, na ban shikkid na buk a mud gǝr ɓa ɓi kaksu ɓi pak. 15 Ama Koǝl la tara tun ki asǝn ɓela ɓa, yina tungul la a ɓaal ɓwaɗan gǝr li, woma ɓaali yadka 16 ɓi kum ban shik ɓoli Kristi gha a kap bana, ɓa kumban shap Ɓwaɗan kun la Koǝl gha ɓi ɓoɓa ba Yahudawa na ɓa, ma Koǝl tungul la, sǝn ta ɓaal kun na ɓomaan ɗa. 17 Wana kwad sǝn ka Urshalima a ban ɓoɓa rǝk muntum ɓal Yeso kasa mi ɓa. Ama ka nzaal Arabiya, kasa na kar kad ɓaal Dimaskus. 18 Tak kwat byang taat kasa, na ka Urshalima ɓa kum ban sǝn Kefas ma yina Bitrus. Ma rǝk na yi ma nwang lum kwa twangan. 19 Sǝn sin ɓomaan a ɓaal ɓa taktum ɓali ɓa, she Yakubu nyimla Matadla. 20 Koǝl daal lana, kunma ma nywangal liwun mi, mamiin na, ba burra ɓa. 21 Takkwat wana, she ka nzaal Suriya na Kilikiya. 22 Ama ban ram la ɓoɓa bil Yeso ɓa kap nzaal Judiya sǝn ki sǝnna na mǝsya kasa ɓa. 23 A wa’an na kidya na, “ɓoma yin ki pa bung ɓisu mi, tutumi yi gussum ɓoma shabkun la Koǝl, yima yi yin ɗap jang na yi.” 24 She aki pa gulli Koǝl, na kunla gǝrma yi pak a kap bana.