Gal 2 | JgkSC | STEP | Takkwat byang lum kwa yiin she kǝr ka Urshalima. Ken ma mimi su kara Barnabas na Titus.

Galatians 2

Muntum Ɓal Yeso Ya’am Ti’e Na Bulus

1 Takkwat byang lum kwa yiin she kǝr ka Urshalima. Ken ma mimi su kara Barnabas na Titus. 2 Ka bana, na kunla Koǝl na kamɓa ɓa ka. Ma ka she su pangat na ɓi ɓaji ɓaan a ɓaal ban ram la ɓoɓa bil Yeso, she tungul ya i kap ngyangat ban, shap piya woma shap Ɓwaɗan kun la Koǝl gha ɓi ɓoɓa ba ɓoɓa Yahuda na ɓa, na kunla ɓi gaan ma pak na ma mi kǝr pak ɓi gin rǝk ma nggurrun ɗa. 3 A mǝs ma kisu na Titus, yi ɓoma Helini na, a sǝn pwan dum ɓi ɓa, ama pyang na wana, ɓi ɓaji ɓa sǝn na she ana pwanam dum ɓi ɓa. 4 Kun ban pwan dum mi lwak ɓaal ɓoɓa ngwa ngwa ɓa ya shap na ya ɓi nyimsu na, a swaram ako ɓaal su. A ko ɓaalsu ɓe suk ban yak mud masu kum a ban Yeso Kristi. Ya yad ban kǝr kaɗan su byak. 5 Ama su sǝn pa njar ɓiya ɓa ko gab, na kunla ɓi Ɓwaɗan kunla Koǝl mamiin rǝkka na wun. 6 Ama ɓoɓa a dab ya a mud na ɓi ɓajina ma, a sǝn shap gǝrman ɗang a mud kunla Koǝl ma miki kam ɓa. Aba sǝn la, ko wake na ya, dik na pyang na kunla Koǝl gha ta lǝr ɓoɓa. 7 A karkun wana, a sǝnǝm woma Koǝl pa gaan ban shap Ɓwaɗan kunli ɓa, ɓi ɓoɓa a sǝn pwan dum ɓiya ɓa, woma yi pa gaan ban kam Ɓwaɗan kunla Koǝl gha ɓi Bitrus amud ɓoɓa Yahuda ɓa ya pwan dum ɓiya. 8 Koǝl ma tum Bitrus a ban ɓoɓa Yahuda, yi na tuma kwad a ban ɓoɓa ba ɓoɓa Yahuda na ɓa. 9 Ma a sǝn nyap la Koǝl ma yi paɓa, she Yakubu na Bitrus na Yohana a yak su. A yak su mi na Barnabas na ɓaal ɗik, na kunla yana ɓi ɓaji la ɓoɓa ban ram la ɓoɓa bil Yeso. She su yak tiˈe a nzwaksu na, ɓisu ka ban ɓoɓa ba ɓoɓa Yahuda na ɓa, ya kwad ɓe ka ban ɓoɓa Yahuda. 10 Wana kwad, ana ɓisu na, ɓisu gin laɓar ɓoɓa tǝr gǝrɓuk ɓa ko gab a nzwak ya. Mi kwad gǝrma yad ba pak na ma shangmi.

Bulus Tangas Ma Kitti Bitrus

11 A mǝs ma Bitrus yu a Antakiya, shaɓan kunɗi gǝli gǝli na kunla yi sǝn pak tǝk tǝk ɓa ko gab. 12 Ban swap ti’e, yi ki li gǝrliin na ɓoɓa bil Yeso ɓa ba ɓoɓa Yahuda na ɓa. Ama takwat ma Yakubu tum ɓoɓaan ɓe ka Antakiya, she Bitrus ɓiin ban li gǝrliin na ya. Yi pak wana na kunla, yi ɓang wup la ɓoɓa ya yad ɓe pwan dum ɓi ɓoɓa ba ɓoɓa Yahuda na ɓa. 13 Wana kwad na teˈes ɓoɓa bil Yeso ɓa Yahuda pakka a Antakiya woma Bitrus pakka ma, har Barnabas kud tak ɓiya amud ɓiɓin kunma. 14 Ma sǝn na a kyangam njar a mud kunla Koǝl, she na ɓi Bitrus a dumya pyang na, “Wu ɓoma Yahuda na, ama wu pak re’em wo ba wu ɓoma Yahuda na ɓa. Mana pak na wu mak ɓoɓa ba Yahuda na ɓa na ke’el, ɓe bil ban pak la ɓoɓa Yahuda gha? 15 Lasu a ɓilsu su ɓoɓa Yahuda na, ba su ɓoɓa ba ɓoɓa Yahuda na ɓa, ɓa ya pak ndarak kunna ɓa, 16 su daalla na, ɓo gha rǝkma tǝktǝk adum Koǝl amud ban bil nzu la Musa ɓa, she yina yaˈam kun mamiin la Yeso. Na kunla wana, suɓa su yaˈam tie na Yeso Kristi. Su pak wana ɓisu kumban yakmud ka dum Koǝl, akab ban pa mud su ɓi Kristi, ba ban bil nzu la Musa ɓa. Na kunla, ɓomaan nga kum rǝkma tǝk tǝk adum Koǝl a kab ban bil nzu la Musa ɓa. 17 Nana su yad ban rǝk ma tǝk tǝk a dum Koǝl a kap ban ba yak tiˈǝ na Kristi, ki gussum na su ɓoɓa pak ndarak kun na nama. Reˈem na Kristi ɓi kuɗun takkwad ti ban pak ndarak kun nama? Ayo, ba wana naɓa ko gab. 18 Ama mina kǝr swaɓan tak ban ɓak gǝrɓa yin goos, ki reˈem ɓoma kyang njar la Koǝl nama. 19 Akab ban nzu ma wuum, nzu ma na wala ɓa kumban rǝk ɓǝs ka a dum Koǝl. 20 A zǝd ma mi nggun ma zǝd ɓo na Kristi. Tutumi ba mina rǝk ɓa. Akarkun wana Kristi na rǝk aɓaal yaɗa. Rǝkma mi rǝk tutumi a ɓaal ɓisǝn yidmi, rǝkma mak ɓaal ma miin a mud ɓola Koǝl la, yi ma yaɗa ma miin har yi pa muɗi na kunla. 21 Mi gha pak nggur na yaɗ ma miin la Koǝl la. Ama nana ki ɓo kum ban rǝkma tǝktǝk akab ban bil nzu la Musa, ki gussum na ban wu la Yeso reˈem gǝr nggur nama.