Gal 5 | JgkSC | STEP | Kristi yak mudsu nakunla ɓisu kum ban kum mudsu gha. Jaamna na shiini, gi shik na ɓi wun kǝr kwa tak bung ma yi kǝɗan wun ɓi ɓyak ɓa.

Galatians 5

Ban Yak Mud A Ɓaal Kristi

1 Kristi yak mudsu nakunla ɓisu kum ban kum mudsu gha. Jaamna na shiini, gi shik na ɓi wun kǝr kwa tak bung ma yi kǝɗan wun ɓi ɓyak ɓa. 2 Wak na kula! mi Bulus, shappi wun na wun na paam mud wun ɓe pwan dum ɓi wun ɓi wun kum ban kwa ban Koǝl, ashe Kristi sǝn gus gǝrman a ban wun ɗa ko shung. 3 Kǝr shiɓam ɓi koyab ɓo ma yaˈam tiˈǝ ya punam dum ɓi, nuˈum lang-lang na ɓi ɓil ko yap gǝrma a nywangal a ɓal nzu la Koǝl. 4 Wun ɓa wun yad ban rǝk ba na ɓiɓǝn kun ɗa a kap ban ɓil nzu, wun purum a ɓaal ban ɓil Kristi nama. Wun ɓinma ɓwaɗan gǝr la Koǝl. 5 Na kula a kap ban Wuus la Koǝl na ban yak kun ma miin su ba sǝn njar na ban mak ɓaal a mud ban kum kyarasa rǝk. 6 A ɓaal Kristi Yeso, ba pwan dum na tǝr ba pwan dum sǝn gus gǝrman ɗa. Gǝrma a yad yina, ba yak kun ma miin a mud Kristi ma yi mak ɓisu kam yad ma miin a mud ko yab ɓo. 7 Wun ba ɓang mir ma ɓuɗan, yana kwa dum wun ma yi mak ɓi wun gin ɓil kun ma miin ɓǝra mi? 8 Ɓyal ban swar wun ma a pak sǝn pur a ban Koǝl ma tungul wun ɗa. 9 Woma aki shapka na “Yeast shung na mak burodi ɓi mwad.” 10 Ama pyang na wana yaˈam tiˈe na wun. Rǝk lasu ɓaal gaan la koǝl na mak ɓa yaˈa tiˈe na wun gha yak kun la ɓoman ma yaˈal la ɓa. Ama Bo ma yi wat ti yad ban ɓwaran ɓaal li wun mi, yi kumun ban kas nzu, ko yi yana. 11 Ɓi nyima, nana soma ki shiɓan kula ban pwan dum ɓi wun tu ban tutumi, waɓa na soma ki nuun bung wu? Nana wanana, ban wu la Kristi a mud nggun ma pang ɓo ma mi shap mi ka sǝn yuna sheel la. 12 Ɓo ɓa ya ngaˈat ɓaal li wun mi, mi yad ɓe lidum, ɓe kaɗan mud ya wa tiˈǝn na. 13 Wun, ɓi nyima, ya tungul wun na kula ba nuk ma yak mud, gi pak na gaan na ba yak mud mya ɓi wun pak gǝrma yid wun ɓi yad ka ɓa; a kar kun wana ki shik na tak ɓiɓwun a ɓaal yad ma miin. 14 Nzu mi kap ya kaɗan a ɓaal kun ɗik: “Yad ngga ɓan la lu wama wu yad muɗu gha.” 15 Wun na ba wal yit na ba num bib wun, wun na ba shak bibwun wa ɓi nyam zum na, kaɗan na ɓaal wun, na kula wun taantak ɓi bibwun. 16 Gǝrma mi shappi wun na, shik na wuus la Koǝl ɓi bil la wun. Wun na paˈam wana, wun gha pak gǝrma yitwun ɗi yat ta. 17 Nakunla gǝrma yidsu ma mimi ɓi yat, yi pak jang na gǝrma wuus la Koǝl li yat, wana kwat, gǝrma wuus la Koǝl li yat, yi pak jang na gǝrma yidsu ɓi yad. Gǝr ɓa ɓari ɓi ya pak jang na bibya. Yina mak na ki wun pak gǝrma wun yad ban pak ɓa. 18 Nana wuus la Koǝl na bil na wun, wun nga tak ɓuk nzu ɓa. 19 Ɓiɓǝn gǝrba yid ti yad ya gha geligeli. Yana: kula ba ngal ɓi maam na bud ɓa a sǝn kut nggom ɓe ɓa, ba nuk ma dat na mud, tǝr nzuun, 20 ba dwangat mud ti koǝl ɓaan na ba pak mwas, ba ɓiin ɓo, na lo, ba pak buk ɓiɓsu, ba pak ɓaas, ba yad mud, ba ngǝp nzwak, 21 ba pak buk, na gǝr ɓa wal ɓo yid, ban bil nggwam ɓa nggur, na ɓyal ya. Ba tangas kitti wun, wama ɓak tangas ka ɓi wun na, ɓo ɓa ya nuk wa mya ya kum mbut a ɓaal ban nwang rangan la Koǝl la. 22 Ama gaan ɓa Wuus la Koǝl ɓi ki pa na: yad ma miin, pupna ɓaal, Pulan ɓaal, ngyak ɓaal, ban pak ɓoɗan gǝr, ba pak kun ma miin, 23 Ba nwagan mud, na ba bwal mud. Nzu ma sǝn ɗak na gǝrɓa ɓiɓi ɓa. 24 Ɓa ya la Kristi Yeso na, ya paˈngam yid ma mimi na ɓi gǝrɓa yid ɓo ɓi yad a kun nggun ma pang ɓo. 25 Tun ma Wuus la Koǝl na pa ɓǝs si su, mwat ti su shik Wuus la Koǝl ma ɓi bil lasu ɓaal rǝk lasu. 26 Su gin nuk na ɓoɓa ɗap mud ta, ko ba yaˈat ɓaal na ban pak buk bibsu.