Jam 3 | JgkSC | STEP | Ɓi nyama, ɓi ɓoɓaa bǝl i ɓaal wun gan gus ɓoɓa shik ban ɗa lakunla wun daal ma na ɓi kasan nzu ɓi ɓoɓa shik ban taɓi la ɓoɓaan.

James 3

Ban bwal las

1 Ɓi nyama, ɓi ɓoɓaa bǝl i ɓaal wun gan gus ɓoɓa shik ban ɗa lakunla wun daal ma na ɓi kasan nzu ɓi ɓoɓa shik ban taɓi la ɓoɓaan. 2 Pyang la su su ki pa’an ɓǝsǝn kun i njar gywak. Ɓoma sun ki ɓwar i kun ma i shappa, mud ɓaali tǝktǝk na, yii gamam ban bwal nggiiɗi pyang. 3 Ma su la ma’am lyang kun pǝrǝs i kun pǝrǝs ma lakunla ɓi pak gǝrma su yad, su gamban pilǝp na yid pǝrǝs ma pyang. 4 Rangas ɓi kurlukbiin: Ko ma a gulun ki nggala gung maa nyap la ki kwak ya, ye ki pilǝp na ya la mula gǝrma pilǝp kurlukbiin ma koyab ban ma ɓoma kwak ma ɓi yad ban kaa gha. 5 Wa la las ka, yi gap na i yid ɓo, ama yi shaɓan nggala kun i mud gǝrɓa jiin ɓa su pak. Rangas wama kun bǝs ɓi li nggala zum ma. 6 Las bǝs na, i ɓaal gǝrɓa yid ɓo las ka la nggala nyap maa pak ɓi’in gǝr. Yi su’un pyang nggiid yid ɓo, yii mak ɓi bǝs bwal koyab gǝrma i pak ma pyang wuus li. Bǝs ma las ma pur na nda bǝs. 7 Koyab gǝr yal, ɓi nyal, ɓi gǝrɓa tangas bung ya i mud nzaal, la gǝrɓa a pak ya ɓa ɓaal shiim ɓo kud ya a ki nggyak ya. 8 Ama ɓoma nggyak lǝshi gha ɓa. Las ɓi’in gǝr na ma ka nǝk na a nggyak mi ɓa. Yi walam la dafi ma mak wu. 9 La las la su pa gul li Matadla laa su la Tad, la yi kwad la su shap ɓi’in kun i mud ɓo gha ko ma a paˈan ɓo wa Koǝl na. 10 I ɓaal kun ma mwak la ban pa gul la ban shap ɓi’in kun purra. Ɓi nyama mimi sun ɓwad ta. 11 Naki yam ma ɓwadni la yam ma dul pur i mus yam mwak ne? 12 Ɓi nyama, naki nggun kashakshi ɓil zaitun, ko inabi ɓil kashakshi? Wama la mbwang yam zwaar ^{▼▼zwaar ko zang} ka purun ɓwaɗan yam ɓa.

Sak mamiin pur i ban Koǝl

13 Yala sak la ɓaali pwanan i ɓaal wun? Ɓii shik ɓo gha la ɓwaɗan nǝkli la ɓwaɗan pak ɓa li ɓa tǝr ban ɗab mud ma i kum i ban sak. 14 Ama wu la waɗam ɓi’in buk la yad mud i ɓaalu, gan wal kiˈilu i muɗi ko u ɓiin miin ɗa. 15 Ɓyal “sak” mi sun pur i takkoǝl la ama pur i munnza, i ban rangas ban la ɓoɓa ya gha la Wuus la Koǝl la, pur i ban Sheɗan. 16 Lakunla bana buk la yad mud ka, bana la wu kum nǝk ma suk la ɓyal koyab ɓi’in pak.

17 Ama sak ma pur i takkoǝl i ban swabti’i sun suk ɓa, i yad ɓi ɓaal nwang, yi jing, yi mak pa mud, yi walam la sun shuur la ɓwaɗan pak, yi gha ki yad ɓoɓaan ɗang ɓa la yi gha swar ban ɗa. 18 Ɓoɓa ki mak ɓaal nwangan ɓi sunun pak tǝktǝk gywak lakunla a ɓyalan ɓaal nwangan.