Jam 4 | JgkSC | STEP | Mana mak ki wun shakkid la wal yid la biib wun? Ba a pur i ban gǝrɓa wun yad ɓa wal yid i ɓaal wun na ɓara?

James 4

Paana mud wun ɓi Koǝl

1 Mana mak ki wun shakkid la wal yid la biib wun? Ba a pur i ban gǝrɓa wun yad ɓa wal yid i ɓaal wun na ɓara? 2 Wun yad gǝrmaan ama wun sun kumi ɓa. Wun wal ɓo ɓe wu la ban yad gǝrɓa la ɓo maan shangmi, ama wun na kum ɡǝrma wun yadta. Wun shakkid la wun wal yid. Wun sun kum ɓa, lakunla wu sun maas koǝl la. 3 Wun na kamam, wun gha kum ɓa, amud na wun sun maas tǝktǝk ɓa, wun yad ban wal gǝrɓa wun kum ɓa amud gǝrɓa nggur ɓa wun yad.

4 Wun ɓoɓa nwang la ɓoɓa a sun kud nggwam ɓi wun ɗa, wun sun daal ma na ban rǝk laak munnza ɗik na na ban ɗap jang la Koǝl lara? Koyab ɓoma tar ɓi nǝk laak la munnza karan ma muɗi ban jang na Koǝl. 5 Ko wun sun wa a nggur na kun la Koǝl shap na Wuus ma i mak i ɓaal su walam shangmi la buk? 6 Ama Koǝl pa yad la sambarka ɓi su. Na pakka na kun li shap ka na:
“Koǝl ɓiin na ɓo ma sun muɗi na i taanɗi koyab ɓo
ama i pa yad la sambarka li ɓi ɓoma sun ɗap muɗi na yi gǝrmaan na ɓa.”

7 She wun paana mud wun ɓi Koǝl. Ɓiin ban pak gǝrma sheɗan yad ɓu pak yii ɓang i shik nu. 8 Yu tuu na Koǝl yii yuun tuu na wu. Zut na ɓuk wun, wun ɓa pak ɓǝsǝn kun, la kyaras na ɓaal wun, wun ɓa gǝp ɓaal wun rwap. 9 Ɓi ɓaalu suk shangmi ɓo zwal la mirǝm. Pilǝp wal lu i ɓo lu la ɓaal nwangan lu i ɓaal su’un. 10 Kaɗan na mud wun wa gǝrmaan na ɓa i dum Matadla, yi paan gul ɓi wun.

Ban shap ɓi’in kun i mud ɓoɓaan

11 Ɓi nyama, gan shap na ɓi’in kun i mud biib wun ɗa. Koyab ɓoma shap ɓi’in kun i mud nyimi ko i rang nzu ɓi shaɓam ɓi’in kun i mud nzu i rangam nzu ma laama.Wu la rangam nzu ma, nǝ’ǝm na wu gha bil nzu ma ɓa laama, ama u gusum ɓoma rang nzu ma. 12 Koǝl yi mwak la pa Nzu ma yi na mwak la rang nzu ma, yi mwak la gamban yak mud la ban suk. Ama wu, wu yanna ma rang nzu ɓi ngga ban nǝk lu?

Wal kun ki’il i mud lib

13 Tutumi takiɗu, wu ma shap na, “Liina ko lib su kaa ra i nggala gari wuni, su wal byang ɗik, su ki li kaso, su ki li wurup a muɗi.” 14 Wun, wun sun daal gǝrma pak i lib pa. Mana wuus lu? Wu wa ɗya’al na ma pur ma mǝs gap takwad wana she yi ɓwar. 15 I karkuni, ya’an na ɓu shap na, “Matadla la ya’am ti’i na su gha ɓaal ɓoɓa kana ɓǝs su pa’an wuni ko wuni.” 16 Ama i ɗarami wun ɗap mud wun gǝrmaan, la wun ki wal kun ki’il wun. Pyang ɓyal wal kun ki’il mi ɓwad ta. 17 Lakunla wa, ɓoma daal ma ɓwaɗan gǝrma ya’an ɗi pak ki i sun pak ɓa, i pa’am ɓǝsǝn kun.