Jam 5 | JgkSC | STEP | Tutumi taana kid wun, wun ɓoɓa la gǝrɓuk, ɓo na zwal num na miin lakunla ɓi’in bung ma yu ɓi wun i mud.

James 5

Tangas kidti ɓoɓa gǝrɓuk

1 Tutumi taana kid wun, wun ɓoɓa la gǝrɓuk, ɓo na zwal num na miin lakunla ɓi’in bung ma yu ɓi wun i mud. 2 Gǝrɓuk la wun rumum, nggwas liim ɓi lu’ut ɓa la wun. 3 Ɓi zinariya la azurfa la wun nggyaram su’um. Nggyaram la ya ɓi shaɓan kun i muɗu la ɓi liin nyam yiɗu wa bǝs na. U raam gǝrɓuk gywak u ɗa’am nga i tangal ɓa ban masal kuni. 4 Sun! U ɓiin ban kwad ɓoɓa pak gaan i sum lu, tutumi tǝr ban kwad ma ka ɓi ɓo zwal lu i muɗu. Matadla la kudnggin ɓa takkoǝl wa’am zwal la ɓoɓa pak gaan ɗu ma. 5 Wun nǝk i munnza mi ɓi ki li la ban kyam ɓwaɗan gǝr la ban wal wurup ɓa la wun pyang i mud wun. Wun mak ɓi yid wun mwarak ma wa gǝr yal ma yal ɓe kǝshi na. 6 Wun kasam nzu ɓi ɓoɓa pak tǝktǝk na a sun pak tǝktǝk ɓa wun wal ya ɓe wu. Ya kwa a sun ɓiin wun ɗa.

Bwal ɓaal i ɓaal bung

7 Ɓi nyama, ki bwal na ɓaal wun she Matadla la kaɗam. Sun na wama ɓoma bungǝs sum ɓi ki yal ɓi nzaal sak purun gǝrɓa ɓwaɗan na la wama yi ki bwal ɓaal la ɓi mbul ɓa ban swabtak byang la mbul ɓa dum bu’u. 8 Wun ɓa bwal na ɓaal wun, shiin na yid wun lakunla ban yu la Matadla pa’am tuu. 9 Ɓi nyama, gan shap na kun i mud biib wun ɗa lakunla ɓi gan kas nzu ɓi wun ɗa. Ɓoma kas nzu ma gha jaam na yi i kun nda!

10 Ɓi nyama, rangas ɓi mayak taktum ɓa shap kun i ɓaal lwak Matadla i ɓaal bung ama a wad ɓaal ya. 11 Wama wun daal na, ɓoɓa su rangas na ya gha la sambarka ya na ɓoɓa shiin yid ya. Wun wa’am wama Ayuba shiin yiɗi gha, la wun sunum ɓwaɗan gǝrɓa Matadla pak ɓi i ban masal kuni. Wun daal ma kwad na Matadla ki yaɗan ban la ban sun shuur.

12 Gǝrɓa taɓi ɓii pyang, ɓi nyama, na: gan kan kunu la takkoǝl ko la munnza ko la gǝrmaan ɗang ɓa. Ɓi “Aa” lu nǝk aa, “Hayo” lu nǝk hayo, laa wama na ɓa, ye kasan nzu ɓu i mud tǝr ban pak tǝktǝk.

Kam Koǝl la yak kun mamiin

13 Ɓomaan nga ɓaal kun ma kyam mudti? Ɓi kam Koǝl. Ɓomaan nga ma ɓaali nwang? Ɓi twang nggyal ma pa gul li Koǝl. 14 Ɓomaan nga ɓaal wun ma la yidkwanan? Ɓi tuˈul ɓoji ɓa ikilisiya ɓe kam Koǝl li la ɓe bik mutti i mud i ɓaal lwak Matadla. 15 Kam Koǝl ma a pak la yak kun mamiin ɓi ma’an ɓi ɓoma la yidkwanan kum ɓǝs; Matadla ɓi paan ɓǝs si. Yi la paˈan ɓǝsǝn kun, ye zuɓun mbuk ɓi i mud ɓǝsǝn kun li. 16 Lakunla wa shap na ɓǝsǝn kun ɓa la wun ɓi biib wun she wun kam Koǝl ɓi biib wun lakunla ɓi wun kum bǝs. Kam koǝl la ɓoma ki pak tǝktǝk ka la nyap ɓi ma’an ɓi nggala gǝr pak. 17 Iliya yin ɓǝsǝn ɓo na wama su gha, I kam Koǝl laa ɓaali mwak na ɓi mbul gan tu ɓa, mbul sun tu ɓa i nzaal ma ma byang taat la lyang twangsalmwak. 18 I kad kam Koǝl, she takkoǝl pa mbul, la nzaal sak purun gǝr. 19 Ɓi nyama, laana ɓo maan i ɓaal wun ɓi kyang shiˈin njar miin ki ɓo maan sa kaɗani I njar miin ma, 20 ɓi daal na: Koyab ɓoma kaɗan ɓoma pak ɓǝsǝn kun i njar ma miin, yaˈam mudti ɓoma i tak ɓuk wu la yi yuun na njar ma zub mbuk i mud bǝlǝn ɓǝsǝn kun.