Joh 17 | JgkSC | STEP | Takwad ma Yeso shap mi, she yi nga’at muɗi takkoǝl, yi kaam Koǝl yi na, “Tad, mǝs paˈam. Pa gul li Munɓo lu, ɓi Munɓo ma kum ba pa gul gha ɓu.

John 17

Yeso Kaam Koǝl Li Muɗi

1 Takwad ma Yeso shap mi, she yi nga’at muɗi takkoǝl, yi kaam Koǝl yi na, “Tad, mǝs paˈam. Pa gul li Munɓo lu, ɓi Munɓo ma kum ba pa gul gha ɓu. 2 Lakunla wu paam nyap pi Munɓo ma i mud koyab ɓo, ɓi pa ɓǝs ma bad-bad ɓi pyang ɓoɓa wu paɓi. 3 Ba kum ɓǝs ma bad-bad mi yi na, ɓi ɓo daal lu na wu na Koǝl ɗik ma miin, na Yeso Kristi ma wu tumi. 4 Paam gul lu i munnza, a kap ban malas pyang gaan ma wu paɓa pak. 5 Tutumi, Tad, pa gul la i dumu na ɓyal gul ma mi gha na yi kasa ki ban swabtak munnza.

Yeso Kaam Koǝl Lakunla Ɓatar ɓali

6 Malam ba kǝmu ɓi ɓoɓa wu pa ya ɓa i ɓaal munnza mi ɓe daal lu gha. Koko ya lu na, wu na pa ya ɓa, ya bilim kun lu kwad. 7 Tutumi ya daal la na pyang gǝrma wu pa ɓa pur i bunu. 8 Lakula gǝrma wu shap pa kwad shaɓam ɓiya, ya yaˈam tiˈe kwad, ya daal ma shangmi na pur i bunu, ya yaˈam tiˈe mamiin kwad wu na tuma. 9 Mi kǝmu lakun laya. Ba kǝmu lakunla munnza ɓa, she lakunla laya ɓa wu pa ɓa, nakunla ya luna. 10 Gǝrma mi gha na yi pyang luna, pyang gǝrlu kwad lana, a kap ban ya na kum gul gha. 11 Ɓa kad a bunu, mi gha kǝr li dum na ba rǝk i ɓaal munnza mi tutumi ɓa, ama ɓiɓi ya gha i ɓaal munnza kasa. Tad ma kyarassa, sǝntak ya na nyap la luˈu ma wu pa ɓa, ɓe gus ɗik woma su gha na wu. 12 A mǝs ma su gha na ya, sǝnǝn tak ya na nyap la luˈu ma wu pa ɓa. Nyalam ya, ɓomaan gha ɓaal ya ma ɓor ra, she ma ɗik a ɓaal ma a nywangli mud na yi tantak, ama yi ɓor ɓi walan ban shapshik ^{▼▼Shapshik (Ba shap Kun la Koǝl)} la nywangala kun la Koǝl wal gha. 13 Ama tutumi ban yu i bunu. Mi shap kun ɓi ki soma i munnza kasa, lakunla ɓoɓa bila ɓe kum ɓaal fwalanla ma walan i ɓaal ya. 14 Shaɓam kun lu ɓiya, munnza ɓiin na ya, lakunla ya ba la munnza na ɓa, woma mi ma ba la munnza na ɓa. 15 Mi gha kǝmu na ɓu ɗapya i ɓaal munnza ɓa, ama mi yad na ɓu gǝp zwak ya na Yi ma Ɓiɓin ma. 16 Ya la munnza na ɓa, woma mi ma la munnza na ɓa. 17 Mak ɓe rǝk a mwaˈanya i kap ban miin lu, kun lu na miin. 18 Woma wu tuma i munnza, wanana kwad na tum ya i ɓaal munnza. 19 Nakun laya reˈem mi ɗik, nakunla ya ɓa ɓe rǝk na mwaˈanya mamiin.”

Yeso Kaam Koǝl Ɓi Ɓoɓa Ɓili

20 “Mi kǝmu ba nakunla ɓiɓi na nggalang ɓa, ama lakunla pyang ɓoɓa ya yaktak kun laa i kap ban shap laya. 21 Lakunla pyang laya ɓe gus ɗik, woma wu Tad, wu gha ɓaala, wana kwad ya ma ɓe gus i ɓaal su, lakunla ɓi munnza daal la na wu na tuma. 22 Paam gul ma wu paɓa ɓe, ɓe kumban gus ka ɗik woma su gha ɗik. 23 Mi rǝˈǝn i ɓaal ya, wu kwad i ɓaala, ɓe kum ban gus ka ɗik shangmi, ɓi munnza daal la na wu na tuma, ɓe daal la na kwad wu yad naya mamiin woma wu yaɗa mamiin nga. 24 Tad, mi yaɗan ɓoɓa wu pa ɓa ɓe gus na mi pyang ban ma mi gha. Mi yad be sǝn gul ma wu paɓa, gul ma wu pa ɓa lakunla wu yad na mi mamiin kasa ki a sǝn swaptak munnza ɓa. 25 Tad ma pak tǝktǝk, Ko ma munnza sun daal lu ɓa, daal la wu, kwad ya daal la na wuna tuma. 26 Shaɓam woma wu gha ɓe. Mi liin dum la ban shap piya, lakunla yad mamiin ma wu yaɗa ɓi gus i ɓaal ya, mi kwad mi ɓaal ya.”