Joh 2 | JgkSC | STEP | A tangal ma taad a kud nggwam a Gari Kana ma nzaal Galili. Ngga la Yeso gha ban kud nggwam ma.

John 2

Yeso Kalat Ma Yam Ɓi Gus Yam Ɓilǝn Nggun Anab

1 A tangal ma taad a kud nggwam a Gari Kana ma nzaal Galili. Ngga la Yeso gha ban kud nggwam ma. 2 A la’an Yeso na muntum ɓali aban kud nggwam ma kwat. 3 Ma yam anab ma ban kud nggwam ma mal, she nggal Yeso na ɓi na, “Yam anab laya malam.” 4 She Yeso kadan ɗi na, “Nggalap la kana, mana pak ma wu yu gha bana? Mǝs la sǝn da pak kasa ɓa.” 5 She ngga la Yeso shappi ɓoɓa pak gaan a ban kud nggwam ma na, “Pyang gǝrma yi na nam ɓi wun pak, pak ni.” 6 Nggwad ɓa jinjin twangsalmwak ma a ɓak na taal ka bana, ma ɓoɓa Yahuda ɓiki kyaras yidya woma ma nzu ɓal ya shabka, ko ma kya ɓi ɗaɓan yam bang lumi ɓari ko lumi taat. 7 She Yeso shappi ɓoɓa pak gaan i bana na,” Walli nggwad ɓi na yam.” She a wal nggwad ɓa sur sur. 8 Takkwad wana yi na ɓiya na, “Tutumi, taani, kari nayi ɓi ma tad nggwam ma.” She a ta a karayi. 9 She yam ma kalat gus yam anab, she matad nggwam ma bungǝt gap, ama yi sen daal ban ma a kum yam anab ma ɓa, ama ɓoɓa paɓi ɓa daal la, she yi tungǝl ɓoma a kud nggwam ɓi ma a gyangat ban, 10 Yi shappi na,” Koyab ɓo ki paan yam anab ma numun na dum kasa, a yu na ma sǝn num shangmi ɓa. Ama lumi wu swaram ma numun ma she ma ɗarakmi.” 11 Mimi na gǝr sheel ma Yeso swabtak ban pak a Kana ma Galili ma shik ban na i pur na ban Koǝl. Akap wana na Yeso kam gulli gha, muntum ɓali yaktie na yi. 12 A takkwat wana, she Yeso yar ka Kafarnahum, yana nggalap la kǝni, na ɓi nyimi na muntum ɓali. Aji nwang ɓari bana.

Yeso Piid Ɓoɓa Ki Kur Ko Ɓwaras Gǝr A La la Koǝl

13 Ma mǝs nggwam ma dal la ɓoɓa Yahuda shik tuu, she Yeso kaa Urshalima. 14 A mudkit nza ma, la la Koǝl she yi kum ɓoɓa ɓwaras ɓi ndak na ɓi nzur na ɓi kurtuk, tiˈǝs ɓiɓo rǝˈǝn a mud tebur ɓal ya a ki kalad wurup. 15 She Yeso piip mbwar nggur, yi pidya kati kati a ɓaal La la Koǝl ma, na ɓi ndak na ɓi nzur ɓa pang, yi tud tebur ban ɓwaras gǝr la ɓoɓa kalat wurup ɓa, wurup ɓa swab nzaal. 16 She Yeso naɓi ɓoɓa ɓwaras ɓi kurtuk ma na, “purun ni ya bini, gin karan ni lal Taɗa wo kaso naɓa.” 17 Takwad wana, she muntum ɓal Yeso rangas gǝrma a nywangal a ɓaal kun la Koǝl na, “Buk La la Koǝl ɓi tona ɓaal la wo bǝs sa.” 18 She ɓi ɓaji ɓal ɓoɓa Yahuda ɓa maas Yeso na, “Tutumi yab gǝr sheel na wu pak ɓi su kumban sǝn su daal gha na, wu gha na nyap ban pak koyab gǝr wu?” 19 Yeso kaɗan ɗiya na, “Goossi La la Koǝl mi, mi kar ɓa’an a ɓaal nwang taat.” 20 She ana ɓina, “Byang lumi yiin na kuni twangsalmok na a ɓak La la Koǝl mi gha. Na wuna wu ɓak ɓaal nwang taat wu?” 21 Ama La la Koǝl ma Yeso ɓi shab kun nga muɗi, nggi yiɗi na. 22 Takwad ma a ya’ad Yeso a ɓaal ɓa wun, she muntum ɓali rangas gǝrma Yeso shap, she a yaktak kunla Koǝl ma a nywangal a ɓaal nggup, na kun ɓa Yeso shap.

Yeso Daal Na Ɓaal Koyab Ɓo

23 A mǝs ma Yeso gha Urshalima a ban nggwam dal, bǝlǝn ɓiɓo yaktie na yi, nakunla gǝr sheel ma a sǝn yi pak. 24 Ama Yeso sǝn yaktie na ya ɓa, nakunla yi daal la ɓiɓo pyang. 25 Ba she ɓoman na shiɓam kun ɗi mud ɓoman ɗa, yi daal la gǝrma ɓaal koyab ɓo.