John 20

Ɓa Lwak La Yeso A Ɓaal Ɓa Wuun

1Na tak duru a tangal ma ɗik na duru piit ki ban sǝn da mwas sa she Maryamu ma Magadala ka ban kilik ma, she yi sǝn a ngaˈat ma taal ma a kun kilik ma. 2Na yi ɓang kaa a ban Siman Birus na matar ma Yeso ɓi yiɗi mi, yi na ɓe na, “A ɗaɓam yid Matadla a ɓaal kilik ma. Su sǝn daal ban ma a miˈi gha ɓa.” 3She Bitrus na matar ma a kaa ban kilik ma. 4Pyang la ya a ɓang kaa ban kilik ma, ama matar ma ɓang yaar Bitrus yi tuban na dum a ban kilik ma. 5Yi dungant yiɗi, yi sǝn luˈut linen ma a shiˈin, ama yi sǝn ko ɓaal kilik ma ɓa. 6She Bitrus tu ban a takuɗi, na yi yu ko a ɓaal kilik ma yi sǝn luˈut linen ma a shiˈin. 7Yi sǝn luˈut ma nak ɓi Yeso mud ma a shiˈin a ɓan maan ɗang na luˈut linen ma. 8Yi matar ma tuban na dub ma, she yi ko kwad yi sǝn na yi yak tiˈe mamiin. 9Ama ɓi tuban tutumi, ya sǝn pwan ɓaal nggup la Koǝl ma shap na, langlang na Yeso ɓi lwaˈan a ɓaal ɓa wun ɗa. 10Na batar ɓali ɓa kad a la.

Yeso Ta Pur ri Maryamu ma Magadala

11Ama she Maryamu jaam a kun kilik ma a nza yi ki mak zwal, yi gha mud ban mak zwal lama, she yi dungwat yiɗi sǝn ɓaal kilik ma gha. 12She yi sǝn ɓayak taktum la Koǝl ya ɓaari a maˈam luˈut ɓa pupna a reˈen a ban ma luun yid Yeso gha; ma ɗik a kap ban ma a mak muɗi gha, ma ɗik kwad a kap ban ma a mak kussi gha. 13She bayak taktum la Koǝl ɓa maasi na, “Maam mana pakka ma wu mak zwal gha?” Yi na ɓe na, “A ɗaɓam Matadla la! Sǝn daal ban ma a ka gha na yi ɓa.” 14Ma mal ban shap kunmi, she yi pilit yiɗi yi sǝn Yeso jaam na, ama yi sǝn purun ni ɓa. 15Yeso shappi na, “Maam, mana pakka na wu mak zwal gha,? Yana wu yal ban na yi!” Yi sǝn wo yina ɓoma pak gaan sum ma, she yi shappi na, “Ɓoma la, na wuna ɗǝɓi shap ban ma wu shiˈi gha ɓa a kum ban kaa ɗiɓi gha.” 16Yeso naɓi na, “Maryamu, she yi pilit kap ban Yeso yi shappi a ɓaal ging la ɓoɓa Aramaya na, “Rabboni” Ma kam gǝr nama. 17Yesu shappi na, “Gin ɓola ɓa, lakunla a tutumi sǝn da yap a ban Tad ma kasa ɓa. She ɓu kaa a ban ɓi nyama, wu na ɓe na, mi kaɗan a ban Taɗa na Tad wun kwad, ma dungwat la na ma dungwat lawun kwad.” 18She Maryamu ma Magadala kaa yi shappi ɓi ɓatar ɓa na, “Sǝnǝm Matadla!” Na shap gǝrɓa Matadla shappi kwad.

Yeso Taa Purri Ɓatar Ɓa li

19A liɓǝn ɗik liɓǝn Ladi nama, na kurup matar ɓali raam na ban ma dik, ya gǝɓǝn kun njar nda ma ya gha ɓali nakunla a ɓang wuup la ɓi ɓoɓa Yahuda. She Yeso yu jaam i zwag ya yi na ɓe na, “Gapara lawun!” 20Takwad ma yi shappe wana, yi shik ya na ɓi ɓuˈe na ziˈi, she ɓi ɓatar ɓa ɓaal ya pwal ma a sǝn Matadla. 21She Yeso kǝr na ɓiya na, “gapara la wun! Wama Tad tuma gha wana kwad na mi tum wun nga.” 22Ma yi shap wana she yi piip Wuusi ɓe mud yi na ɓe na, “Yak ni Wuus la Koǝl.” 23Ɓoma wunna zuɓum mbuk ɓi a mud ndarak kun ɓali pyang a zuɓum mbuk ɓi nama. Pyang ɓoma wun na sǝn zub mbuk ɓi a mud ndarak kun ɓali ɓa, a sǝn zub mbuk ɓi mud ta nama.”

Yeso Ta Purrin Ɗi Toma

24Toma kwad a ɓaal ɓa lum kwa ɓaari ɓa ma a tungli na Ɓa Passa, yi gha ɓaal ya ɓa a mǝs ma Yeso yu gha. 25She tǝˈǝs ɓatar ɓa shappi na, “Su sǝnǝm Matadla” ama Toma na ɓe na, “Mi na sǝn sǝn da ban ma a pang lyang gha a ɓaal ɓuˈe ɓa, mak moɗal ɓuˈa a ɓaal li ɓa kwad mak ɓuˈa a mbel ziˈi ɓa, me yak kun ma miin ɗa.” 26Nwang keshin takwad wana, ɓatar ɓa gha raam na a ɓaal la ma, Toma gha ɓaal ya a mǝsma, kun nda ma gǝɓǝn, she Yeso yu jaam a mukid ya, yi na, “Gapara la wun.” 27She yi shappi Toma na, “Mak mwal ɓuˈu a bini ɓu wak ɓuˈa gha, mak ɓuˈu kwad a mbel zaˈa. Gin rǝk ɓoma ɓunun ɓaal la she ko ɓu rǝk ɓoma mak ɓaal. 28Toma kaɗan ɗi na, “Matadla la, ma mi pa dungwat ti!” 29She Yeso shappi na, “She ma wu sǝna kasa na wu yak tiˈe gha,” sambarka reˈem ɓi ɓoɓa sǝn sǝn ɗa ama ya yaam tiˈe mamiin.”

Gǝrma Nggup Mi Ɓi Shap

30Yeso paˈam gǝr sheel ɓa bǝlǝn ɗangɗang a dum ɓatar ɓali ɓa, ɓa a sǝn nywangal i ɓaal nggup mi ɓa. 31Ama a nywangal ɓa ɓiɓi ɓiɓo kumban yak tiˈe mamiin nga na Yeso yi na Kristi Ɓola Koǝl, a kap ban yak tiˈe mamiin kwad na wun kum ɓǝs ka a ɓaal luˈi.